Home / پستهای تازە / سازمان دموکراتیک یارسان هێرش و توپوارانەکان ڕەژیم جمهوری ئسلامی ئێران ئەڕا سەر هەریم کوردستان عراق مەحکوم کەێ.

سازمان دموکراتیک یارسان هێرش و توپوارانەکان ڕەژیم جمهوری ئسلامی ئێران ئەڕا سەر هەریم کوردستان عراق مەحکوم کەێ.

یارسان مدیا
28.09.22

 

سازمان دموکراتیک یارسان هێرش و توپوارانەکان ڕەژیم جمهوری ئسلامی ئێران ئەڕا سەر هەریم کوردستان عراق مەحکوم کەێ.

مەردم شەریف ئێران ومەردم شجاع و خەباتکار کوردستان!

هەر ئەوجورەێ موشەخەسە کە زیاتر لە دو هەفتەس اعتراز و ناڕەزاێەتیەکان وەخاتر قەتڵ عمد  ژینا ئەمینی وەدەس گەشت ارشاد سەروە ڕەژیم، لە کوردستان و فرەێتر استان و شارگەل گەورەێتر جور تەێران وکرمانشاە و دەێان شار و ئوستانتر هەر ڕوژ فرەتروە بوت.

وەداخوە لە ڕوژ ئەوەڵ اتراز و ناڕەزاێەتیەکان تا ئیسە زیاتر لە 40 نەفەر لە لاێەن هێزگەل سەروە ڕەژیم گیانێان لە دەس دانە و سەدانتر زەخمی و بێ سەروشونن، وەپاێ خەوەرگەل جێ باوەڕ کە وە دەس سازمان دموکراتیک یارسان ڕەسیەس تا ئیسە چەندین کەس لە مەردم یارسانیچ دەسوەسەر کریانە و چەن کەستر گیانێان بەخت آزادی کردنەس.

متاسفانە ڕەژیم وەتەمام قودرەت وە تونو تێژی، گردن و قەتڵ کردن جواو مەردم دەێ و لە هویچ کردەوەێک نا ئنسای و غەێر اخڵاقی خوەێ ناپارێزێ.

مودەت چەن ڕوژە  ڕەژیم دەسداگەسە توپواران کردن مەقەڕ و بنکە و بارگاێ حزبگل کورد ئێران نەێار خوەێ لە کوێە و زڕگوێز لە هەریم کوردستان. وەپاێ خەوەرگەلێک کە لە سوسیاڵ میدیا و دونیاێ مەجازی پەخش بویگەس، ڕەژیم لە تەێارە بێسەرنشینیچ استفادە کردگەس کە متاسفانە تا ئیسە لەی هێرشە چەندین کەس گیانیان لەدەس دانە.

سازمان دموکراتیک یارسان قەتڵ ژینا ئەمینی و باقیتر گیانبەختریاگەکان مەحکوم کەێ و له هەمان وەخت جارێکتر لە اعتراز و ناڕەزاێەتیەکان مەردم کوردستان  وەگشتی ئێران  پشتیوانی کەێ و باوەڕ دێرێ کە ڕەژیم لە موقابڵ اتحاد و هامگامی و هاوسوزی مەردم شکست خوەێ و ناتوانێ بەرەج ئی هەمکە موج اعترازاتە لەداخڵ ئێران بگرێ.

سازمان دموکراتیک یارسان باوەڕ دێرێ کە ڕەژیم لە توپواران بارگاگەل احزاب کورد لە هەریم کوردستان چەن هەدەف دێرێ.

یەکم بێ دەسڵاتی و زەعف ئی ڕەژیمە نشان دەێ و لە هەمان وەخت تواێ مسئەلەێ اترازەکان سیاسی وە بکەێ و پەێوەسێ بێەێتە حزبە کوردیکان تا بتوانێ نفاق و دودەسەگی بخەێتە بەین مەردم کورد و فارس و باقیتر نەتەوەکان لە داخڵ ئێران،کە گشت یەک دەنگ  شعارگەل هەنجار شکن دەن و کولیەت ڕەژیم گردنەسە هەدەف، لە هەمان وەخت ڕەژیم تواێ هەوەس مەردم ناڕازی بوەێت ئەڕا جێکتر خارج لە ئێران و مەردم لە اعترازەکان ساردوە بکەێ.

سدی باوەڕ دێرێ کە ئی بەموارانە  نەقس کردن خاک وڵات عراق و کوردستان عراقە و دویرە لە پروتوکولگەل دیپلماسی ناونەتەوەیی و ئەقلیمی.

سدی جارکتر توپواران ڕژیم جمهوری اسلامی ئێران ئەڕا سەر حزبگەل کوردی لە هەریم کوردستان  مەحکوم کەێ و لە هەمان وەخت سەرەخوەیشی خوەمان پێشکەش کەێتە سەرکرداێەتی، کادر و پێشمەرگەکان حزبەکان کوردستان ئێران لە هەریم کوردستان عراق و بنەماڵەێ گیانبەختکردگەکان.

شوراێ مەرکەزی سازمان دموکراتیک یارسان!

2022/09/28

Visits: 67