ئەڕا چە جەمگەی یارسان هەوەجە وە سازمان سیاسی دێرێت؟

یارسانمدیا
‏21‏ دسامبر‏ 2025

کوڵەباسێک لە سەر زەرورەت سازمان سیاسی لە جەمگەی یارسان وە ویانک چیین وەرەو هەفتمن کونگرەی سدی لە ساڵ ئایندە

نوویسەر: هژمەت خوسرەوی

2025-12-21 Linköping

پێشوەتن:

ساڵگەل فرەیگە ک چەندین پرسیار بنەڕەتی لە سەر پەیوەندی بەین جەمگەی یارسان و سازمان سیاسی، زەین و هووشم وەگەرد خوەیانا دەرگیر کردنەس. ساڵگەل فرەیگە ک تەقالا کردمەس لە دەروەچێگ کەڵک وەربگرم و دەس بیەمە قەڵەم و چشتێگ لەی بارەوە بنوویسم، وەلێ وە خاتر گرفتگەل جورواجوور نەتوانستمە ئی کارە بخەمە بوار کردارییوە. ئاخرەگەی بڕیار دام ک وە دەس جەم و ئلهام وەرگرتن لە یاران تاریخییم و هەمیچ وە پشت بەسان وە ئستدلال و فاکتەی ئاکادیمی، وە نوویسان کوڵە باسێک لە سەر جەمگەی یارسان و سازمان سیاسی، وەزیفەی خوەم وەرانوەر وە مەردم یارسان ئەنجام بیەم بێ ئەوەیکە گەزاف ئەکادیمی بیەمە لێ یا خوەم وە داناتر لە هەر فەردێگ تر بزانم. دڵنیام ئی کاریچمە جوور کارەکان تر بێ کەمووکوڕیی نیە و وەیخاترە کەمترین چەوەڕوانیم لە موخاتبگەل و خسوسەن یاران ئەوەسە ک وە چەوویێک ڕەخنەگرانەوە ئی کوڵە باسە بخوەننوە تا بتوانم لە نوویسراوەگەل ئایندە کارێک بکەم ک شایستەی جەمگەی یارسان بووت.

ئەڕا چە نوویسەر ئی بابەتە ئەو قەرە جەخت لە سەر سیاسەت و سازمان سیاسی ئەڕا جەمگەی یارسان کەیتوە؟

یەکیک لە دەلیگەل ئی کارە وە خاتر ئەوەسە ک ئەلاقەی فرەیگ وە سیاسەت دێرم و لە سن ١٥ ساڵیوە وارد کاروبارگەل سیاسی بیمەس و هەمیچ چەندین ساڵ لە ژیانم ئەڕا خوەندن علوم سیاسی لە دانژگا تەرخان کردمەس. وەلێ لە تەمام ئیانە موهمتر ئەوەسە ک وە قودرەت قەڵەم بتوانم وەزیفەگەل تاریخی، سیاسی، ئخلاقی و ئشتماییی خوەم ورانوەر وە جەمگەی داڵک( یارسان) جێوەجێ بکەم. دەلیل دوویم ئەوەسە ک سیاسەت و سازمان سیاسی زەرورەتێگ تاریخییە ئەڕا جەمگەیێگ جوور یارسان و تەجروەگەل تاریخی نیشان دانەسە ک وە بێ سیاسەت و داشتن سازمان یا حزب سیاسی نە توانیت پارێزگاریی لە کەرامەت و خواستەکان خوەت بکەیت و نە توانیت لە سەر بڕیارگەل سیاسی کاریگەریی داشتوویت. کارەسات هولووکاست دژ وە یەهودییەکان و دەیان کارەسات ترەگ و ئەلخسوس وەچەکووشکردن ئیزەدییەکان لە ناو ئقلیم کوردسان وە وەرچەوو تەمام جەهانوە، نوویسەر ئی کوڵەباسە و فرە لە یاران ترەگ هاوردە سەر ئی باوەڕە ک سیاسەتێک یارسانی و داشتن حزبێگ سیاسی مەخسوس وەی جەمگە نە تەنیا ئەمرێگ سیاسی و حەیاتییە، بەڵکەم هاوزەمان توانێت بووت وە یەکێک لە گەورەترین ئەکتورەکان ئەڕا ڕێکخستن و پاراستن مەردم یارسان وەرانوەر وە تادیدگەل ناوخوویی و ئقلیمی.

لینک مقالە PDF

محتوای مقاله صرفاً منعکس کننده دیدگاه های نویسنده است و یارسانمدیا هیچ مسئولیتی در قبال آن ندارد.

بازدیدها: 1283