Home / بشیر امیرخانی / پەژاک وە دەس خالی لە ڵاێ حزبەکان هاتوە!

پەژاک وە دەس خالی لە ڵاێ حزبەکان هاتوە!

هەر ئەجورەێکە لە میدیاێ پژاک، وڵا بیوە، لە شون کونگرەێ پەنج پژاک و وە سەرکار هاتن ڕەبەری تازەێ ئەو حزبە، سیاسەت دەیشت پژاک ئاڵوگوڕ وە سەرێا هات لە سەر هاوکاری وەل حزبەکان ڕوژهەڵات کوردستان و سەرکرداێەتی حزب ناوبریاگ هان دریان کە وەڵ حزبەکان ڕوژهەڵات بکەفنە دیالوگ ئەڕا ئەوێک بتوانن، دەروەچێک بویننوە ئەڕا بەرەێکی گشتی لە ناو حزبەکان ڕوژهەڵات. هەر لەی ڕابتە سەرکرداێەتی پژاک سەردان چەندین ڵاێەن کوردستانی کرد و پێشنیار خوەێان خستنە وەردەسێان، ئەجورێک لە میدیاێ حزبەکان باس کریەت باوش فرە لە حزبەکان ئەڕا پژاک ئاواڵە نەوی و پێشوازی لە پێشنیارەکەێان نەکریا، ئەویچ وە بەهانەێ ئەوە کە پژاک مستەقڵ نیە و ها ژێر هژمونی پ ک ک.

ئەوەێ پژاک کردەێ لە بەین حزبەکان ڕوژهەڵات چشت تازەێک نیە، ساڵانێەکە هەرکام لەی حزبگەلە وە شیواوز جواروجور وەل یەک دانیشتنە و هەرکام وە جورێک ئەڕا پلانێکی هاوبەش پێشنیار خستنەسە وەر دەم یەکتر، بلام وە بەهانەێک شانە لە ژێرێ خالی کردنە و هازر نەوینە بچنە ژێر بار بەرەێکی هاوبش. دەلیلەکەیچێ بێ گومان ئەوەسە کە بازێک لە حزبەکان خوەێان وە خاون کوردستان زانن و توان قسە کەر ئەوەڵ خوەێان بوون. باوەڕ دێرم ئی سەردان پژاکە تەنیا ئەڕا خوەد پژاک تازەگی دێرێ وە گەرنە چشت فرە تازەێک لە گوڕە پان سیاسی حزبەیل کوردسانی لە ڕوژهەڵات نیە. ئەما ئەوێک پژاک هەڵساسە ئی کارە خوەێ نیشانەێ ئەوەسە کە ئی حزبە خوازیار ئەوەسە کە حزبەکان ڕوژهەڵات بتوانن وارد دیالوغێکی تازە ئەڕا پروژەێکی هاوبەش بوون و ئیە نابەێەد وە دیدێکی مەنفیوە تماشاێ کرد. وەڵێ متاسفانە لە ناو حزبەکان ڕوژهەڵات غرور و براگەوەری کازب بیەسە ڕێ گەر ئەڕا ئی جور پروژەو دیاڵوگە.

من جور کەسێک کە ساڵانێکە چالاک سیاسیم، جەندین دەوەر لە ڕێبەراێەتی سازمان دموکراتیک یارسان کار کردمە و هاوکات چەندین جار وەل ئەندام و سکرتێر و مسئولین پژاک دانیشتن داشتمە توانم بویشم هەم سازمان دموکراتیک یارسان و هەم پژاک نقات مشتەرک فرەێک ئەڕا دروس کردن پروژەێکی هاوبەش دێرن و توانن ئەڕا تحقق ئی پروژە یا هەر هاوکاریکیتر وەل یەک بکەفنە دیالوگ.

ئیمە یارسانەکان لە تویل بیشتر لە ٣٥ ساڵ مبارزە وەل جمهوری ئسلامی، لە فرە پیل گوزەر کردیمە و فرە بگار تاقی کردیمەسوە و زانیم ئەڕا ئەوێک کۆمەڵگاکەمان لە ئایندە تویش گرفتێکی ئیزەدی هاوتا نەوت چە وە نەفمانە و وەل کی و کام حزب خاسە بکەفیمە یەک، بەرە و هەوڵ بیەیم ئەڕا دروس کردن پروژەێکی هاوبەش ئەڕا داهاتگ وڵاتەکەمان.

هەرچەن من لە ڕێبەراێەتی سازمان دموکراتیک یارسان نیەم و ناتوانم ئەڕاێآن خەت و نیشان بکیشم وەڵێ باوەڕ دێرم ئی بگاریچە تاقی بکریەتوە زەرەر نەێرێ. باوەڕ دێرم ئەگەر پژاک و سازمان دموکراتیک یارسان سادقانە وەل یەک بکەفنە دیالوگ و خاڵە هاوبەشەکان دەسنیشان بکەن و ئەڕا پروژەێکی هاوبەش بڕەسنە نەتیجە، لە ئایندە توانێ ڕێ وازکەر بووت ئەڕا ئەوێک بتوانیەت وەڵ باقی حزبەکانتر دیاڵوگ بکریەت ئەڕا پروژەێکی گشتگیر و هاوبەش کە تەمام حزبەکان ڕوژهەڵات وە بێ جیاوازی خوەێان لە تێ بویننوە. دیارە تەجروبە نیشان داگە، ئەگەر حزبەکان ڕوژهەڵات نەتوانن بێ لە وەرچەوگردن گەورەی و بویچکی حزبەکان، وارد دیاللوگ ئەڕا پروژەێکی هاوبەش بوون تاریخ قەبوڵ لە ڵێان ناکەێ، کەفنە وەر تانەێ نەسڵ ئایندە، وە قەڵ پێشەنان تاریخیچ تکرار ناوتوە.

ئەوجورە دیارە فرە لە حزبەکان دەس ڕەد نانەسە سینەێ پژاکوە و پژاکیچ حتما قسەێ خوەێ دێرێ وەڵێ وەخت کەمە و هەرچێ زویتر هەرکام لە حزبەکان لە ڵاێ خوەێانوە ئحساس مسئولیت نەتەوەیی بکەن و هەۆڵ بیەن ئەڕا ئی پروژە. با ئیەیچە بویشم هەر هەوڵێک و هەر پروژەێک لە بەین حزبەکان وە بێ بەشداری سازمان دموکراتیک یارسان ئەڕا ئدارە کردن ئایندەێ وڵات مەحکوم وە شکەستە، چویکە یارسانەکان لە ئدارەێ ئایندەێ وڵآت بایەد نەقش ئەساسی داشتون و پشت گوش خستنێان وە زەرەر گشتیە، تا ئەوێک وە زەرەر لاێەنێک بووت.

ئەگەر گشت حزبەکان فکر لە داهاتگ وڵات بکەنوە، بایەد بزانن کە یارسانەکان وەزنەێ تایوەت وە خوەێانن لە مەنتەقە. ئەگەر لە ڕوژهەڵات کوردسان ئاڵوگوڕێک باێتە پێش بێ گومان ایلام و کرماشان وە تایوەت یارسانەکان قسەێ خوەێان دێرن و قسەیچ دێرن ئەڕا وەتن.

وە ئومێد ئەو ڕوژە کە حزبەکان بانە سەر ئەو باوەڕە کە نە یەک حزب و نە دو حزب ناتوانن ئدارەێ ئایندەێ کوردستان ڕوژهەڵات بکەن، بەڵک گشت حزبەکانن وە بێ جیاوازی توانن ئدارەێ وڵآت بوەنە رێوە جویکە هەر ئەوانن خاون خاک و پروژەن ئەڕا ئایندەێ وڵآت.

وەل ڕێز و هورمەت

بەشیر ئەمیرخانی

١٨.١.٢٠١٧

 

Visits: 7