Yarsanmedia Yarsan Democratic Organization Official Website
چەن روژ پێش مەلا حەسیب کە یەکی لە مەلا موسەڵمانە ئایینەکانە لە سڵێمانی و هاوکات ئەندام کومەڵەێ ئسلامیە لە کوردستان لە خوتبەێکی نماز جمعە هەڵکوتاە سەر پەێرەوان ئاین زەردشت و وە کافر و هەلگەردیاگ لە دین ناوزەدێان کرد و لە هەمان وەخت ویشێ تبق شەریئەت ئسلام بایەد سێ ڕوژ موهڵەت بێریەتە ئیانە یا بانوە سەر ئایین ئسلام یا سەرێان بوڕیەت!!!.لە ماوەێ ٢٥ ساڵ حکومەت کوردی لەو بەشەدەێان جار مەلا حەسیب و مەلا ئسمائیل و مەلا حەسیبەکان وە ڕوژ ڕوشناە و لە بلندگو مسجدەکانوە هەڵکوتنە سەر کەماێەتیە ئایینەکان لەوانە یارسان و منافق و مرتد ناوێان بەن و فتواێ قەتڵێان دەن. تەمام ئیانە لە ژێر دەسەڵات کوردی و لە وەرچەو حکومەت کوردی ڕوی داگە و تەنانەت کەسێکیچ لەی ڕابتە نەچیەسە وەردەم دادگاە. شاێەت فرە کەس بزانێ کە وەختێ کاک ئەێاد لە سەر مەلا ئسمائیل لە دادگاێ هەوڵێر شکاێەت کرد، قازی دادگاێ هەوڵێر نەزەر مەلا ئسمائیل تایید کەێت و هازر نیە ناوبریاگ بوێتە وەردەم دادگاە.؟!
سەرەڕاێ ئیانە ئیستاە مەلا حەسیب کە خوەێ ئەندام کومەڵێ ئسلامیە داواکەێ کە زەردشتیەکان یا بانوە سەر دین ئسلام یا سەرێان بوڕن!. حزبێکی ئسلامی کە هیچتان هویچ دەسەڵاتێک نەێری وەیجورە بانگەشەێ دینی کەێت، ئەگەر بڕەسێتە دەسەڵات چوی وەل کەماێەتیەکان هەڵسوکەفت کەێ?، کەمەل ئسلامی چ جواوێک دێرێ ئەڕا کومەڵگاێ کوردی لە هەرچوار بەش کوردستان?. باوەڕ دێرم ئیە نە تەنیا خەتەرێکە ئەڕا کەماێەتیە ئاینیەکان کوردستان بەڵک بێ هورمەتیە وە قانون حکومەت هەریم کە مەڵاێکی ئایینی وەیجورە هەڵکوتێتە سەر کەماێتیە ئاینیەکان و حکم وە قەتڵێان دەێت. سەرەڕاێ ئەوێک زانیم کە هەرکام لەی مەلا و حزبەیل ئسلامیە بانە سەر دەسەڵات بی گومان باێەد لە قانون شەریعت ئسلام پەێرەوی بکەن و قانون و شەریعەتیچ ئەڕا گشت تاکێکی کومەڵگاە ڕوشنە کە چەس، ئەما تاک ئازادیخواز و کەماێیەتیە ئاینیەکان لەوانە یارسان،کاکەیی و زەردشتیەکان نەباێەد لە وەرانوەر ئی بێ هورمەتیە بێ دەنگ بوون و ئیە توانێ زەنگێکی خەتەر بووت ئەڕا دویا ڕوژ ئی کەماێەتیەیلە.
خاسترە داوا لە حکومەت بکەن یان بێ دەنگ نەوون یان بویشن هویچ کارێک وە پێان ناکریەت. ئەگەر قەرارە قانون و دەسەڵات بووت بایەد مەلا حەسیبەکان و مەلا ئسمائیلەکان ڕاپێچ وەر دەم دادگاە بکریەن و ئەگەریچ حکومەت لە ئاست ئی وەزعیەتە بێ دەسەڵاتە یا دادگاکان ناتوانن یا ناتوان وەرپرسیار بوون لە ئاست ئی تەهدیدە، کەماێەتیەکان توانن ڕیگاحەڵگەڵێکتر بگرنە وەر و لە دادگاێ ناودەوڵەتی شکایەت بکەن و تەنانەت تانە لە حکومەت هەریم و دەزگاێ دادوەری ئی حکومەتە بیەن. باوەڕ دێرم ئەگەر بەرخورد قانونی وەڵ مەلا ئسمائیلەکان و مەلا حەسەیبەکان نەکرێەت توانێ وەزعیەت خەتەرناکێک چاوەڕوان قەێر موسەڵمانەکان لە کوردستان عراق بکریەت.
کومەڵەێ ئسلامی باێەد جواوگو بووت، وە حکم ئەوێکە ئی مەلا حەسیبە ئەندام ئەوانە و مسئولیەت ئخلاقی و تاریخی کەفێتە سەرشان ئی حزبە کە هەوڵ دەێت لە ئایندە بوتە دەسەڵات یان بەشیک لە دەسەڵات.
پرسیار
جێ ئیمە یارسانەکان،زەردشتیەکان لە کومەڵگاێ کوردی ها کۆو؟
نەقش قانون ئەساسی حکومەت ئایندەێ کوردی لە ڕژهەڵات کوردستان چەس؟ ئایا ئەوانیچ شەرعیەت ئسلام کەنە بنەماێ قانون ئەساسی، هەر ئەوجورەێک لە باشور کوردستان ئی کارە کردنە.
نەقش دەسەڵات وە تایوەت دەسەڵات قەزایی لە وەرانوەر مەلا حەسیبەکان چەس؟
مسئولیەت حزبەکان لە ئاست ئی بەرپرسیاریە چەس؟ ئایا کومەڵگاێ کوردستان کومەڵگاێکی ئسلامیە یا کۆمەڵگاێکی فرە ڕەنگ و فرە ئایننە؟
نەقش ئحزاب،تاک و ڕێکخریاگەێل یارسانی، زەردشتی و باقی کەماێتیەکان لە سەر ئی وەزعیەتە چەس؟
بشیر
٥.٢.٢٠١٧
بازدیدها: 25