پەیامی سازمانی دێموکراتیکی یارسان بە بۆنەی کۆچی دوایی جەلال تاڵەبانی سکرتێری گشتیی یەکیەتیی نیشتمانی کوردستان و سەرۆک کۆماری پێشووی عێڕاق

بنەماڵەی بەڕێزی مام جەلال!
ئەندامانی و لاینگرانی یەکیەتیی نیشتمانیی کوردستان!
هاونیشتمانان و کۆمەڵانی خەڵکی کوردستان!
هەواڵی کۆچی دوایی مام جەلال، سیاسەتوان و کەسایەتیکی کاریزما و دیپلماتێکی بە توانای گەلەکەمان لەم کات و ساتەدا کە کوردستان و ناوچەکە بە گشتی دەسخوەشی هه‌لومه‌رجێکی هه‌ستیار و چارەنوسسازە، خەسارێکی گەورە یە.

مام جەلال هەم وه‌ک سه‌رکرده‌یه‌کی سیاسی و هەم وە‌ك رووناکبیر و کەسایەتییەکی کاریزما جێگای دیار و تایبه‌تی خوی له مێژوویی سیاسی گه‌لی کورد له باشووری کوردستان‌دا  هه‌‌یه. مام جەلال سەرکردەیەکی کاریزما پێگەی تایبەتی خوەی لە نێو جەماوەر و قورسایی خوەی لە نێو یەکیەتی و لایەنە سیاسییە نێۆخویی و نێونەتەوەیەکاندا هەبوو. مام جەلال وەک کەسی یەکەمی دامه‌زرێنه‌ری یه‌کێتیی نیشتمانیی کوردستان و سکرتێری ئەو حیزبە، کەسایەتییەکی بەرچاو و دیار و رۆڵێکی کاریگەری لە خه‌بات و سیاسه‌تی کورد لە باشووری کوردستان‌دا و لە عێراق دا هەبوو. .

سازمانی دێموکراتیکی یارسان وێڕای بە داخ بوونی بۆ کوچی دوایی تێکۆشەری کورد مام جەلال، به چاوی رێزو ستایشەوە ده‌ڕوانێته رابردووی خه‌بات و تێکۆشانی و لە دەسدانی بە خەسارێکی گەوەرە دەزانێ.

شک لەوە دا نیە کە کۆچی دوایی مام جەلال بۆشایی و کەلێنێکی گەورە یە لە نێو بزووتنەوەی کورد و زۆر بە تایبەتیش لەم قۆناغەدا کە کوردی باشوور نیازیان بە کەسێكی وە ک مام جەلالە کە بتوانێ نێو ماڵی کورد یەکخاتەوە.

هیوادارین کۆچی دوایی خەباتگێڕی کورد مام جەلال بکرێتە ده‌رفه‌تێک بۆ ته‌بایی و ئاشته‌وایی و یەکیەتی و یەکڕێزی کورد له باشوور.

سازمانی دێموکراتیکی یارسان سەرەخۆشی لە گەلی كوردستان، ئەندامانی مەکتەبی سیاسی و سەرکردایەتی و کادیر و ئەندامانی یەكێتیی نیشتمانی كوردستان و لە  خانەوادەی بەڕێز تاڵەبانی دەكات.
سازمانی دێموکراتکی یارسان

کومیتەی مەرکەزی

2017/10/03

بازدیدها: 27