یارسان تەسلیم ناوت، ١٣٠٠ ساڵ تێکووشان و پاوەگەزدان وەرانوەر وە ئسلام سیاسی و زوڵم مەزهەبی، حاکم وە سەر ئێران زەمین

حزب دموکراتیک یارسان وە خەم و ئاخین قویل و ئەسەبانیەت ک لە وژدان تاریخ خود مەردم سەرهەڵداگەس، ترور کردن دوو جەوان ئازادیخواز و چالاک فەرهەنگیی یارسان وە ناوگەل مشتەبا و مەیسەم وەیسی لە ڕووژ پەنجشەممە هەڵکەفت ٧ جویەزەردان ١٤٠٥ خوەرەتاوی لە داڵەهوو وە تونی شەرمەزار کەیت و ئی کردەوە وە درێژەدەر گێشت فشار و سەرکوت سیستماتیک زانێت دژ وە ناڕازیگەل و داشدارگەل حقووق بەشەر لە ئێران . ئی تاوانە تەنیا دەرهەق وە دوو کەس نەوی، بەڵکەم تاوانێک ئاشکار دژ وە جەمگەی گەورەی یارسان/ گورانە ک لە تویل ١٣٠٠ ساڵ باج پارێزین هەویەت و کەرامەت ئنسانی، ئازادی وژدان و ماف جیاواز داگەس. لەوە دەردئاوەرتر ئەوەسە ک لەی ساتەوەختە دوو جەوان تر ئی خانەوادە وەگەرد تاوان قورس و چارەنوویس نادیار رویوەروی بینەس، شەرایەتێگ ک بیەس وە مەمەر نگرانی قویل لە لاێ جەمگەی یارسان و تەمام پارێزگەرگەل حقووق بەشەر.

جەمگەی یارسان لە تویل تاریخ خوەی فرە جار قوروانی دوچەوەکی، ئنکار هەویەتی و پایماڵ بین حقووق بنەوای بیەسوە.

یادەوەریی تاریخی ئی جەمگە، دەروڕ ڕەنج و پاوەگەزدانە، یاد نەسلێکە ک باج گەورە داگەس ئەڕا پارێزین فکر و باوەڕ و فەرهەنگ، زوان، ئاینەکان و کەرامەت ئنسانی. یارسانەکان لە بەرزی و نزمیەکان تاریخ هاوچەرخ ئێران، لە پاڵ ئازادیخوازەکان و ئەداڵەتخوازەکان ویسیانەس.

ڕوولەگەل ئی جەمگە لە ئاخێزگەل ناسیاگ وە ( جمشت ژینا و دەی مانگ ١٤٠٤) شوون و لونێگ وەرچەو و کاریگەر داشتنەس و فرە کەس لەوان گیان خوەیان لە رێ ئازادی، ئەمنیەت و ئارمانگەل هاوبەش مەردمگەل ئی سەرزەوییە بەختکردن.

ناو گیانبەختکردگەل، زندانیەکان و قوروانیەکان ئی جەمگە بەشێگ جیانەکریاگ لە تاریخ تێکووشان مەردم یارسان ئەڕا ئازادی و ئەداڵەت بیەس. ئی جەمگە لە تەجروەگەل تاریخی یای گرتگەس ک هەر وەختێگ دەسڵات سیاسی قورخکردن ئیدولوژی و مەزهەبی و هەمیچ ئنکار پلورالیسم وەل خوەیا بارێت، ئەنجامەکەی بووت وە مەمەر مادودکردن ئازادیگەل فەردی و جەمی، زەیف کردن حقووق شاروەندی و وەروڵاوکردن دوچەوەکی فرەتر. هەر وەیخاترە، یارسانیەکان جوور هەمیشە لە پاڵ ئەرزشگەلێک جوور ئازادی ئەندیشە، هاوسانی حقووقی، سکولاریسم، دموکراسی مشارکەتی، حاکمیەت قانوون و ڕێزگرتن لە کەرامەت ئنسانی وسانەسن. لەساڵ ١٣٥٧ فرەیگ لە مناڵگەل ئاگای یارسانی هووشیاری دان لە دەرنجام دامەزرانن ئسلام سیاسیی ئیدولووژی تونڕەو و لەسەر ئەو باوەڕە بین سەقامگیریی دەسڵات لە چوارچوو خوەندنەوەیک فەرمی و تایوەت ئەڕا ئایین، بوودە بایس نواگیری لە گەشەسەندن و ئازادی و هاوژیانی و هاوسانی.

ڕویداوەکان دەیەگەل وەرین ، وە تایوەت تەشەنەسەندن سەرکوت و دوچەوەکی، قەیرانگەل قویل ئجتمایی و سیاسی، نگرانییەکان فرەتر نمایان کردگەس. حزب دموکراتیک یارسان ئێلان کەید ک تێکووشان مەردم یارسان، دژ وە هویچ دین و ئاین و جەمگەیک ئنسانی نییە، بەڵکە تێکووشانیک مەدەنی ،دموکراتیک و تاریخییە لە وەرانوەر ستەمکاری، دوچەوەکی و ئنکار ماف شارومەندی و زاڵبین ئیدلووژی وەسەر چارەنویس ئنسانا. ئیمە باوەڕ دیریم کە ئایندەی ئێران تەنیا وە دامەزرانن حکومەتێک لەسەر بنەوای دەنگ ئازاد مەردم، سەروەری قانوون، جیاکردن دین لە دەوڵەت، زامنکردن ماف بەشەر، هاوسانی تەمام هاووڵاتیگەل و ئتراف وە فرەچەشنی ئتنیکی و فەرهەنگی و زوانیی و ئایینی گشت نیشتەجیگەل ئەو وڵاتە، توانید مومکن و سەقامگیر بوود. ئیمڕووژە لە وەرانوەر خوین براگەل وەیسی و ئەوانەیگە لە ڕێ ئازادی گیانیان لەدەسدانە، پەیمان تازە کەیمەو، پەیمانێک ئەڕا دەفا لە ناسنامەی تاریخیی جەمگەی یارسان و ئازادی ڕاسەقینە و دادپەروەری و کەرامەت ئنسانی. ئیمە ئێلان کەیم کە تروور و زندانیکردن و هەڕەشە و سەرکوت ناتوانیت ئرادەی مەردمانێگ بشکنێت کە چەندین سەدەس ئەڕا پارێزین ناسنامە و ئازادیی خوەی پا داسە گەز. ئی مەردمە لە ئایندەیچ شانوەشان گشت نیروگەل دموکرات و ئازادیخواز و دادپەروەر لە ئێران ئەڕا ڕەسین وە حکومەتێک مەردمی لەسەر بنەوای قانوون وەردەوام بوود. نەمری ئەڕا گیانبەختکردگەل ڕێ ئازادی.

حزب دموکراتیک یارسان

شەورای مەرکەزی ئەوەڵ ژوئن ٢٠٢٦