شەخسیەتێگ یارسانی سەر وە دیار گووران، ماڵاوایی لە ژیان کرد

ئەوەڵ و ئاخر یار

شەخسیەتێگ یارسانی سەر وە دیار گووران، ماڵاوایی لە ژیان کرد.

وەپای خەوەرێگ ک وەدەسمان ڕەسییە، هەڵکەفت ٢٤ خرداد ١٤٠٥، شەخسیەت خوەش ناو جەمگەی یارسان و ڕۆڵەی ڕووژە سەختەکان ، محمود مرادیان ناسیاگ وە (محمود مرادی) لە شار خانەقین ، ماڵاوایی لە ژیان کرد.

زنێگ یاد محمود مرادیان هەڵکەفت ٢تیر ١٣١٤ خوەرەتاوی لە بنەماڵەیێگ یارسانی و لە ئاوای بێنەر بان سەر وە ماوای گووران چەوی وە ڕوی دونیایا واز کرد. جێ باسە ک لە ساڵەکان ١٣٤٠ خوەرەتاوی بنەماڵەکەیان تێتە دەماخچەرمگ و لەورە درێژە وە ژیان دەن.

ناو داڵکی ڕەنگینە و ناو باوکی مەحمەد بی و شەش برا و دوو خوەیشک بین ک ئەلان تەنیا یە خوەیشکیان لە قەید حەیات ماگەس و باقیەکەیان کووچ دومایی کردنەس. جێ وەتنە ناوبریاگ لە شوون خوەی کوڕێگ وە ناو نادر مرادیان وەجێهیشتگەس. زنێگ یاد مەحمود مرادی لە تویل ئومر خوەی خزمەت فرەیگ وە مەردم یارسان و تەنانەت کەسگەل قەیر یارسانی کرد. یارسانیێگ ئازا، خاون ئرادە و مەردم دووس و فرە سەرشناس بی. زنێگ یاد وەخاتر لفت و گفت شیرین و شوون و لوون مەعنەوی لە ناو جەمگەی یارسان، خاون هورمەت و خوەشەویستی فراوان بی.

لە وەخت وەسەرکارهاتن دەوڵەت ئسلام سیاسی وە ڕابەریی خومەینی لە ساڵ ١٩٧٩ ئەڕا پاراستن کەرامەت جەمگەی یارسان سەف دەفای زاتی و مقاومەت دژ وە ڕەژیم هەڵوژارد و ئەو خاس زانست ک حزوور ئسلام سیاسی توانێت چ خەتەرێگ بووت ئەڕا سەر جەمگەی یارسان، جەمگەیێگ ئخڵاقی و سیاسی ک ناکەفێتە ناو کاتاگووری ئومەت و خەڵافەت ئسلامی. وەخاتر خوەنەچەمانن وەرانوەر وە ڕەژیم جمهووری ئسلامی لە دەوران جەوانی هاتە باشوور کوردسان و ڕەفیق ( تاهر ئاقا) بی ک ڕەژیم بەئس ئەراق وەخاتر مەسەڵەی کوردایەتی ئێدامی کرد.

زنێگ یاد محمود مرادیان جوور فرە کەس تر لە شەخسیەتگەل وە ناو دەنگ یارسانی تا ئاخرین ساتەوەختگەل ژیانی تەسلیم ڕەژیم ئێران نەوی. بێشک کووچ دومایی ئی شەخسیەتە، لەتمەیگە لە جەمگەی ئجتمایی یارسان.

کومسیوون پەخش و خەوەرڕەسانی حزب دموکراتیک یارسان وەی بوونەوە خوەی وە شەریک خەم و ئاخین خانەوادە و کەسوکار کووچکردێ و جەمگەی یارسان زانید.

دونی سەوز، دەسی لە داوان پیر و دەلیلی نەوڕیەت.

بازدیدها: 284