پەیام حزب دموکراتیک یارسان وە بوونەی ئەوەڵ مانگ مەی ، ڕووژ جەهانیی کارگەر

پەیام حزب دموکراتیک یارسان وە بوونەی ئەوەڵ مانگ مەی ، ڕووژ جەهانیی کارگەر

یەکم مەی، ڕووژ جەهانیی کارگەر، نمادێگ تاریخییە ئەڕا تێکووشان، پاوەگەزدان و داواکاریی ملیونها ئافرەت و پیاگ زامەتکیش لە سەراێسەر جەهان ئەڕا وەدەسهاوردن ئەداڵەت، کەرامەت ئنسانی و هاوسانی ئشتمایی. ئی ڕووژە دەروەچێگە ئەڕا ئەوەێگە جارێک تر وژدان ئنسانی بتوانێت جواو ئی پرسیار بنەڕەتییە بیەێتوە: ئەڕا چە کارگەرەکان، گەرد ئەوەیا وە قودرەت و هاز کار، ئازار، خوین و ئارەق خوەیان بینەس وە  بنیاتنەر خۆشبژیوی و پێشکەفتن جەمگەکان، وەلێ هەمراێ لە بەش ئادڵانەی خوەیان لە سامان، ئەمنیەت و قودرەت بێبەشن؟

لە سەردەمێکا ک بەشەریەت رەسیەسە ئاست بەرزێگ لە بوارگەل ئلمی، تکنولووژی و ئقتسادی  و توانای دابینکردن سامان و خوەشبژیوی لە هەر ەمانێگ فرەتر بیەس، وەلێ بیین فەقیری، منفەیەت تەڵەبی نائەداڵەتانە، شکاف چینایەتی، ناوهاوسانی هەقدەس، هەلوومەرج سەخت کار و بەشکردن سامان گشتی وە شکڵ نائەداڵەتانە، نیشانەی داسەپانن قودرەت، دووچەوەکی و فەسادێگ وەروڵاو دژ وە مەردم و جەمگەکانە.

لە ئێران، ڕەژیم جمهووری ئسلامی ک وە شوئار ئەداڵەت ئشتمایی و پاڵپشتی لە ماروومەکان قودرەت گرتە دەسوە، لە مودەت ٤٧ ساڵ حوکمڕانی خوەیا نە تەنیا خەیانەت وە قەوڵ و بەڵینەکان خوەی کردگەس، بەڵکەم وە دامەرانن فەساد سیتماتیگ، ڕانتخوازی، خویشاوەندسالاری (Nepotism)، سەرکوت رێکخریاگ و جەمەوکردن قودرەت سیاسی و ئقتسادی لە دەس سپای پاسدارگەل و توڕگەل سەر وە وڵایەت فەقی، جەمگە پەلکیش کردگەس وەرەو مەسیر فەقیری، دووچەوەکی و داڕمیان ئقتسادی. لە جێ ئەوەێگە سامان نەتەوەگەل ئێران ئەڕا مەسەڵەی خوشبژیوی، دەروەچ کار، پەڕەپێدان و ئایندەی هاووڵاتیگەل وەکار بارێت، ئەما لە ڕێ قورخ کردن قودرەت سەرکوتکەرانە لە ناوخوو وڵات و پاڵپشتی کردن لە گرووپگەل نیابەتی و ئیدولووژییەکان لە ناوچەگە، داهات و سەروەچەگەل نەتەوەیی تاڵان و هەراجفرووش کردگەس.

لەی بەینە، جەمگەی یارسان- مەخسوسەن ئوستانگەل کرماشان، لووڕسان و هەمەدان- جوور ناوەند تاریخی و فەرهەنگی خەڵق یارسان، وەل ماروومیەت دوو قات، دووچەوەکی سیستماتیک و سەرکوت چەن لایەنە رویوەروی بیەس.

کارگەرگەل یارسانی نە تەنیا لەوەر شوون و لوون چینایەتیان، بەڵکەم وەخاتر ناسنامەێ فکری، تاریخی، کولتوری و زوانییان، کەفتنەسە ژێر فشار سیستماتیگ و دووچەوەکی. ئەوان جوور هەڵگر ناسنامەێ یارسانی و هەمیچ ئەندام تەبەقەێ کارگەر، هاوزەمان بینەس وە قوروانی نائەداڵەتی لە بوارگەل جورواجوور، نائەداڵەتێگ ک ناچاریان کەێت ئەڕا کووچکردن، قەبوول کردن سەخترین کار، هەقدەس کەم و ژیانێگ لە حاشیەیا.

حزب دموکراتیک یارسان ها لە سەر ئەو باوەڕە ک ڕزگاریی کارگەرەکان، کووتایهاوردن وە دووچەوەکیگەل نەتەوەیی، ئاینی و چینایەتییەکان، تەنیا لە ڕێ تاوڵات بنەڕەتی لە سیستەم ستەمکار جمهوری ئسلامی و دامەزرانن سیستمێگ دموکراتیک و سکولار لە سەر بنەواێ ئەداڵەت ئشتمایی، حقووق بەشەر و دابەشکردن قودرەت و سامان گشتی وەبێ دووچەوەکی ئمکان دێرێت.

ئیمە جەخت لە سەر پابەندبین تەمام وە بنەوا و ئستاندارە ناودەوڵەتییەکان کار کەیمنوە. وە پاێ کوونڤانسیوون و چوارچێوەکان ڕێکخریاگ ناودەوڵەتی کار (ILO)، و ئەوە پرسنیپگەلە جوور  بەشێک جیا نەکریاگ لە نووڕین سیاسی و بەرنامە ئستراتیژیکییەکان حزب دموکراتیک یارسان زانیمن.

لە ئی ڕووژ گەورە، وەگەرد ڕێزگرتن لە تەمام  کارگەرەکان، زامەتکیشان، مالمەکان، خانەنشینانەکان و تەمام نێرووە بەرهەمهاوەرەکان جەمگە، جارێک تر جەخت لە یەکیەتی، تێکووشان هاوبەش و زەرورەت ڕێکخستن خوەمان ئەڕا وەدەسهاوردن ئازادی، ئەداڵەت و  کەرامەت ئنسانی کەیمنوە.

یەکم مانگ مەی پیرووز بووت.

حزب دموکراتیک یارسان

بازدیدها: 259