قاسم سڵێمانی و چەن قسەێک!

یارسان مدیا
‏یەکشەممە‏، 12‏ کانوونی دووەم‏، 2020

هاۆسەرۆکایەتی سازمان دموکراتیک یارسان:
بێ شک قاسم سڵێمانی یەکی لە شەخسیەتگەل نزامی- ئەمنیەتی جمهوری یسلامی ئێران بی کە نە تەنیا لەسەرکوپ نەێروگەل سیاسی ناڕازی لە داخڵ نەقش موهم و سەڵاحیەت و دەس باڵاێ داشت، بەڵکە ئەرا نفوز و جێ وەجێ کردن پروژەگەل نزامی، ئەمنیەتی وە سیاسی لە ولاتگەل مەنتەقە نەفەر ئەوەڵ ئێران و رەژیم حەساو کریا.

ڕوژانە شاێەت سەرکوت جمش و ناڕەزایەتیگەل سیاسی، کۆمەڵاێەتی و کارگەری لە داخڵ ئێرانیم و رەژیم لە پاڵ ژنەێل، خوێندکارەێل و فەعالەیەل فەرهەنگی، نەتەوەگەل قەێر فارس و گروگەل دینی و مەزهەبی وە شێوەێ سیستماتیک مەورد دوچەوەکی قەرار دەێت.

نەهادگەل دەوڵەتی، حکومەتی و نەهادگەل وابەستە وە وەڵاێەت فەقی هەرکامەیان وە نەوبەێ خوەێ وە هاوکاری یەکتر و یا وە شێوەێ جیاجیا و وە کەڵک وەرگردن لە وەسیلەێ قودرەت و بڕیاردان لە هویچ جناێەت و زولمێک دژ ئنسانی وە دژ ئی کۆمەڵگە ترس و گومانێک نەیرن. لە عەین وەخت ئی ڕەژیمە لە گروگەلێک جور حەماس، حزبولاێ لوبنان، شێعەکان عراق، یەمەن، بەحرەین ، پاکستان و عەرەبستان سعودی دژ وە ئسرایل و حاکمگەل مەنتەقە پشتیوانی کەیت و وە پشتیوانی نزامی، عەقیدەتی، ئیدولوژیکی و ئقتسادی هاوکارییان کەێت، لە حاڵێکا کوردەکان، لوڕەکان، ئازەریەکان، تورکەمەنەکان و بەلوچەگەل سونی وەخاتر مەسەڵەێ نەتەوەیی و مەزهەبی سەرکوت کەێت و خەبات و وتێکوشانێان وە وەتومەت دەخالەت و هاوکاری وەگەرد بیگانە سەرکوت و نامەشروع زانێت ( نەتەوەگەگل کە ئشارە وەپیان کریاگەس پێکهاتەگەلێک گەورەێ شیعە و یارسانیچ شامڵ بوت)

قەتڵ سڵێمانی لە لاێان ئامریکاوە وەخاتر ژێر پا کردن ماف ئنسان و سەرکوت ئێرانیگەل ئازادیخواز ئەنجام نەگرد، بەڵکە وەخاتر پارێزان مەنافە وە ناو ‌”ملی” ئامریکا و توڵەێ “خوین” یە ئامریکای ئەنجام گرد. ترامپ وە اێلان دکترین “آمریکا ئەوەڵ” خوین ئامریکایی خەت قرمز سیاسەت خارجی خوەێ دەسنیشان کەێت و لە نەقس کردن حەق حەق حاکمیەت وڵاتگەل تر ئەڕا ئنتقام و وەرگردن خوین هاوڵاتیگەل نزامی و سڤیل خوەێ هیچ باکێ نەێرێ.

ئامریکا وە ڕابەری ترامپ هەرماێ ئامادەێ موزاکرەس وەگەرد خامنەیی دیکتاتور ئەڕا مامەلەێک خاستر. ڕەژیم ئێرانیچ جور عەرەبستان سعودی توانێ هەزاران ئنسان ناڕازی جور خاشقچی- کە لە ماوەێ ٤٠ ساڵ کوشتگە س، بکوشێ وە شەرتێک لە داێرەی دکترین سیاسەت مەنتەقە و جەهانی ئامریکا و منافەێ ئی وڵاتە نەچوتە دەیشت. پەێام فەرمان پمپئو وە دەسگاێ دیپلماتی ئەرا هاوکاری نەکردن نەێاران و موخالفەیل ڕژیم جمهوری ئسلامی ئێران نیشاندەر ئی حەقیقەت ڕوشنەسە.

فاشیزم مەزهەبی و ناسیونالیزم ئێرانی خەتگەل هاوتەریب و ئسولگەل جور یەک وەگەرد لیبرالیسم ئقتسادی هار ئامریکا دێرن.

فاشیسم ناوت تەنیا وە ڕژیمگەل ئسلامی و رەژیمگەلێکتر لەیجورە ناو برد، فاشیسم وە هەڵسوکەفتگەل ئنتخابی و سیاسەت یە بام و دوهەوا ئنسانەکان وە خودی و قەێر خودی تەقسیم کەێت.

ئیجور ڕەفتارگەلە نە فەقەت ئسول بنەڕەتی سیاسەتگەل ڕژیم سعودی و ئێرانە،موتاسفانە هاتگەسە ناو فەرەنگ سیاسی حزب ولایانگەل و کەسایەتیە سیاسیەکان وەناو موخاڵف ڕەژیم.

ئەردەشێر زاهدی و مەحمود دەوڵەت ئابادی نوینەرگەل ئیجور نوڕین و هەڵوێست فاشیستیەن.

دەولەت ئابادی هەر ئەوجورەێ لە کلیدر هامدڵ و هاوڕاێ ” گول محمد و خان عمو” بوت وەگەرد کردەوەگەل و رەفتارگەل سڵێمانی و خامنەیی مەوافقە.

وەنەزەر ئیمە تەویسا گەوهەر ئخڵاقی فکر و ڕەفتار سیاسی سازمانەکان، حزبەکان و وڵاتەکان وەپاێ ئسولێک بوت کە حورمەت وە ماف ئنسانەکان و پارێزان کەرامەتێان بێ لەوەرچەو گردن مەسائڵ دینی، نەتەوەیی، نژادی و کۆمەڵاێەتی لە بان گە چشتی قەرار بگرێت.

سیاسەت و دیپلماسی نەهادگەل بان تەویسا بێ لەوەرچەو گردن مولاحزەگەل تاکتیکی و سازشکاریگەل سیاسەتبازانە بوت.

هورا کیشان ئەڕا مامو ترامپ ولە خەم نیشتن ئەڕا قەساو خوەرهەڵات ناوەڕاس ناتوانێ دەسکەفت خاستر و خوەشتر ئەرا مەردم ئی مەنتەقە داشتوت.

هاۆسەرۆکایەتی

سازمان دموکراتیک یارسان

١١/٠١/٢٠٢٠

بازدیدها: 138