Home / پانل آزاد / وە ناو سایو کەرەم، شا سوڵتان سەهاک، پادشای پردێوەر

وە ناو سایو کەرەم، شا سوڵتان سەهاک، پادشای پردێوەر

یارسان مدیا
31.01.2021

 

کانوون ئایینی پەردێوەر لە دەیشت وڵات

یارەیل ئەزیز یارسانی(کاکەیی). وە بۆنەی  رووژێ قەوەڵتاس ، میرات کانوون ئایینی پەردێوەر و جەشن قەوەڵتاس، جێ خوەیە  لە تای دڵموە بمارک بایی بوویشم وە رەهبەریی، ئەندامان و هەوادارەیل ئی جەشن و ئایین ملیی و بێ وینە. تەمام رووشنویرەیل و مینەوانەیل تاریخی هان لە سەر ئی باوەڕە ک لە زەمانێگ خاک کوردسان لە ژێر پای خارەیل و چەپاوڵگەرەیل وە لەرزە دەرهاتوویی و هەزاران هاووڵاتی خەڵتان وە خوین بوویین، ئا لەو وەختە، رەهبەریێگ جەوان و دانا لە ژێر ناو (( شێخ ئسحاق بەرزەنجی، فەرزەن ((شێخ عیسی بەرزەنجی)) وەل چەن نەفەر لە یارەیل خوەی بەنا وە نیوق زاتی و توانایی مانەوی وە ئتمینان تەماموە وارد نەبەردێگ نابەرابەر بین.

جێ وەتنە ک شێخ ئسحاق(( سوڵتان سەهاک)) وەگەرد یارەیلی توانستن لە خەلال سێ شەوو و رووژ سپای خوینرێژ کوردەیل شارەزوویر شکس بیەن. لە نەتیجەی ئی بڕیار چارەنوویس ساز و جەسورانە، توانستن گیان فرە کەس لە مەردم کوردسان نجات بێەن. لە ژێر سایەی رەهبەریەت حەکیمانە و کاریزماتیک کەسێگ جوور سوڵتان سەهاک و یارەیلی، مەردم یارسان یا کاکەیی ئەڕا جار یەکم لە تاریخ کوردسان بین وە خاون جوورێگ لە حوکمەت بوومی یا خودموختار خوەیان لە پەردێوەر جوور مەرکەز یا ماوای ئی نزام ئخلاقی، سیاسی و ئشتماییە ک وە بێا و بەس یا شەرت و شوون یا شەرت و قەرار ناسیاس. لەو زەمانە تا ئیسە ک فرەتر لە ٧٠٠ ساڵە، ئیمە جوور مەردم یارسان خاون ئایین موستەقڵ خوەمانیمن.

لە لایێگ تروە، فرە جێ خوەشحاڵییە ک ئیمرووژ کورد لە بەشێگ وە کوردسان خاون حوکمەت و پارلمان  خوەیە. وە باوەڕ فرە وە نوخبەگەیل و یاری ناسەیل ئیسە وەخت ئەوە هاتگەس ک حوکمەت ئەقلیم کوردسان وە بڕیاریێگ تاریخی ئایین یاری هەر جوور باقی دینەیل ترەگ لە ئەقلیم کوردسان،  لە دەستوور هەرێم کوردسان وە ڕەسمیەت بناسن. بێگومان ئی کارە هەم توانێت بووت وە مایەی یەکگرتن کوردسان و هەمیچ دڵخوەشی گەورایگە ئەڕا جامگەی یارسان ک نزیک وە ١٤٠٠ ساڵە بێ وچان دژ وە پەلامار و پلان نەیارەیل وە مەیزوور لە ناوبردن فەرهەنگ و تاریخ مللەت کورد، پاوەگەزدان کەیت.

جارێگ تر جەشن قەوەڵتاس لە هاووڵاتیەلمان لە ئەقلیم کوردسان خسووسەن هەر سێ رەهبەرییەگە یانێ رەهبەریی ئەقلیم کوردسان، سەرۆک وەزیرەیل و رەیس پارلمان کوردسان ، بمارک بووت.

گەرد ڕێز و هورمەتمان،

کانوون ئایینی پەردێوەر لە دەیشت وڵات

وە لایەن،ئەلی ئەسکەر خوسرەوی

ستوکهوڵم

2021.01.29

بازدیدها: 30