Yarsanmedia Yarsan Democratic Organization Official Website
پێم وا نیە هویچ کەس و ڵاێەنێک شەک لە دڵسوزی و قارەمانی پێشمەرگە داشتوت. پێشمەرگە لە تویل تاریخ وە وجود هاتنێ هەمویشە گیانێ لە سەر دەسێ بیە و مەرگێ لە وەرچەوەێ بیە. ئی باسێکە کە من کەمەێ هویچ لە جوامیری و قارەمانی و فداکاری پێشمەرگە کەم ناکەێتوە، وەڵێ لە فکرمان نەچوت لە تویل تاریخ فرە جار فەرماندە، فەرماندەێ لەشکەرێک یا محوەرێک توانستگە وە خەێانەت وڵاتێک بەێێتە دەس دوژمن. کە من ئومێدوارم کە حادسەێ شەنگاڵ تەنیا یەک هەڵە بیوت نە یەک خەێانەت.
چەن ڕوژ وەرجە ئیستا دیمن کە وە شێوەێکی نادیار و بێ مقاومەت لەشکرێکی گەورە و پێشمەرگەێکی فرە وە دەستور فەرماندەێ محوەرەکەێان لە ناوچەێ شەنگاڵ عەقب نشینی کردن و وە ئاسانی ئەو ناچە دانە دەس چەتەکان داعش و ئەو جورە باس کریەت بیەسە کارەسات مروفاێەتی لە ناوچەکە.
وە باوەڕ من لە سەر سەروک هەریم ڕێزدار بارزانی و وەزیر پێشمەرگە و ناوەندە پەێوەندیدارەکان فەرزە کە لە سەر ئی وەزیەتە و شێواز و چوینیەتی عقب نشینی ئەو پێشمەرگەگەلە کە لەو ناوچە عقب نشینی کردنە تحقیقات لازم بکەن و بزانن ئەڕا و لە سەر بڕیار کی و وە دەس کی ئی کارە سورەت گردگە. ڕاسە وەی خاترە وە خاتر ئی کەمتەر خەمیە لە شەنگاڵ کارەسات مروفاێەتی روی دا و فرە لە خوەیشکۆ برا ئیزەدیەکانمان کەفتنە وەر پەلامار چەتەکان داعش و گیانێان لە دەس دان، ئەما لێ کولینەوە لە سەر بابەتەکە لە ڵاێەن دەسگاە پەێوەندیدارەکانوە نە تەنیا وە خاتر شەنگاڵ بەڵک وە خاتر خاک و نیشتمان، چویکە هەر ئەو جورە وەتم لە تویل تاریخ فرە جار تکرار بیە و بۆوت کە فەرماندەێک وە یەک خەێانەت یا وە یەک هەڵە وڵاتێک ڕادەس دوژمن کردگە. لە فکرمان نەچوت کە چەتەکان داعش هەم وە پویل و هەم وە فکر کونە پەرەستی ئایینی تواننن فرە کەس و ڵاێەن بسێنن و ئەڕا مەبەستە شومەکانێان وە کارێان بارن. ئەگەر سەروک هەریم ڕێزدار بارزانی هەرچێ زویتر وە شێوەێکی شەفاف و تەنیا لە بەرژەوەندی خاک و نیشتێمان ئی ڵێپرسینەوە لە فەرماندەێ محوری و باقی فەرماندەکان ئەو مەنتەقە نەکەێ دویر نیە ئی کارەساتە لە هوڵێر،سڵێمانیە و جێگاکانتر ڕوی بێەێ. لە فکرمان نەچوت کە تەقینەوەێ چەن ساڵ وەرجە ئیستاێ هەوڵێر کە دەها مسئوڵ لە یکیتی و پارتی گیانیان لە دەس دان وە خەێانەت چەن کوردێک ئەنجام دریا، ڕاسە ئنتەحارەکە عرب بی وەڵێ لە ڵاێەن کوردوە ئاسان کاری ئەڕا ئەو تروریستە کریا کە خوەێ بڕەسنێە ناو بارگاکە. شەک لەوە نیە کە هەزاران کەس جور من چاوەڕێ ئی ڵێکوڵینەوە لە رێزدار بارزانی کەن.
بژی پێشمەرگە
وە هیواێ هاوکاری زیاتر ئەڕا خویشکۆ براە ئیزەدیەکانمان
بەشیر ئەمیرخانی
٥.٨.٢٠١٤
ئیمڕوژ لە چەندین دەسگاێ ڕاگەێاندن هاتوی کە بەڕێز مسعود بارزانی سزاێ چەندین فەرماندەێ محوەر شەنگاڵ داگە. ئی جور خەوەرێکە فرە جێ قەێر زانی و دڵخوەشکەرە، وەڵێ کافی نیە، چویکە خەڵک بایەد بزانێ ئەڕا چە شەنگاڵ بیە قوربانی. بێ گومان ئەگەر هەڵوێست سەروک هەریم ڕیزدار بارزانی لە بارەوە شەفافتر بۆوت بەڕێزێان ئەقەێترە ڵاێ خەڵک خوەشەویستر بۆوت
بازدیدها: 85