مه‌راسم 8 مارس له‌ لاێان کۆمیته‌ێ ژنان فدراسیون یارسان

لە ڕێکەفت ٠٨.٠٣.٢٠١٤ مەراسمێک ئەڕا ڕێز گردن لە ٨ مارس لە شار شوپینگ لە لاێان کومیتەێ ژنان  سەروە فدراسیون یارسان لە وڵات سوئد وڕێوە چی.مەراسمەکە  لە سات  ١٨.٠٠ لە لاێان موجری بەرنامەوە خانم هومەیرا جوانمیری وە وە بەشداربویگەل خەێرهاتن کریا و دەقەێک بێدەنگی ئەڕا ڕێز گردن لە خەبات و تێکوشان ژنەێل ئازادیخواز و بەرابەری تەڵەب لە ئێران،کوردستان و وەگشتی ژنان دونیا  ئێلام کریا.

..پەێام کومیتەێ ژنان لەسەر ٨ مارس و خەبات و چالاکیەکان  ژنان لە کوردستان و ئێران  لە تەرەف خانم مێهرەبان جوانمیریوە پێشکەش وە بەشداران کریا کە فرە مەورد ئستقباڵ قەرار گرد.( لینک پەێام کومیتەێ ژنەێل یارسان لە خوار ڕاپورتەکە دانریەت).

دویای پەێام کومیتەێ ژنان، پەێامێک وە زوان سوئدی لە تەرەف خانم فروزان ڕاهنمافەروە پێشکەش کریا، خانم فروزان لە پێامەکەێ ئشارە وە نەقش ژن لە جامئەێ سوئدی کرد و باوەڕ داشت کە وەدەلیل فەزاێ ئازاد و دموکراسی لە وڵات سوئد ژن لەی جامئە توانستگە نەقش موسبەت خوەێ لە قەبول کردن ئەرک و وەزیفەکان و لە وەڕێوە بردن جامئە بازی بکەێت ، ناوبریاگ نەقش ژن ئازاد لە هەرجامئەێک وە گرنگ زانست و باوەڕ داشت کە وەدەلیل نەوین ئازادی فەردی و دموکراسی و فەزاێ پڕ لە خوشونەت و نابەرابەری  لە ئێران ژنەێل نەتوانستنە ڕەوڵ دروس خوەێان لە ناو کومەڵگەێ کوردستان و ئێران وەگشتی بازی بکەن. ئەو ئشارە کرد کە ئیمە باێەد بتوانیم لەی فەزاێ ئازادە وەشێوەێ دروس کەڵک وەربگریم و بێشتر هەوڵ بیەیم ئەڕا وەدەسهاوردن حەق و حقوقەێلمان. خوەیشکە فروزان ئشارە کرد کە خود ژن توانێت لە موقابڵ تەمام گرفتگەلێک تێتە پێشێ سەر بەرز و سەرکەفتگ بوت وەشەرتێک باوەڕ وەصوەێ داشتوت.

خانم ئانا شەنبەری لە ژنەێل ئاکتیڤ سوسیاڵ دموکراتەکان سوئد لە شار شوپینگ کەسێکتر بی لە قسە کەرەێل جەشن ٨ مارس.

ئەو باسیک ١٥ دەقەیی لەسەر مێژوو ژن باس کرد، ناوبریاگ ژن وە ئونسرێک موهم و گرنگێک زانست لە هەر کومەڵگە و باوەڕ داشت کە هویچ کومەڵگەێک بێ حزور موستەقیم و ئاکتیڤ ژن دروس پێش ناچوت و ئەو کومەڵگە هەتمەن حەتمەن بێ گرفت نیە. ئەو تەقازا کرد لە تەمام ژنەێل بەشدار کە بانە مەێدان و حزور واقەیی خوەێان لە ناو کومیتەگەل ژنان، و نەهادگەل ئازادیخواز و لە ناو جامئە وە گشتی بازی بکەن.

لە ئدامەێ بەرنامەکە پەێامێک لە تەرەف سازمان دموکراتیک یارسانوە لە تەرەف کاک ئەلی ميهرابی وە وەگوش هازرین ڕەسی، ناوبریاگ ئشارە کرد کە تەنیا وە گردن مەرسمێک یا وەرێوەبردن سیمینارێک لە سەر ٨ مارس ناتوانڕیەت بویشیەت کە گشت هەقێک دریاگە ئی ڕوژە، بەڵکە خود کومەڵگە وەگشتی باێەد باوەڕ وە بەرابەری  حقوق بەین ژن و پیاگ بکەێت .  ئەو باوەڕ داشت کە ژن توانێت ئەرک و وەزیفەێ خوەی لە جامئە وەڕێوە بوەێت وەشەرتێک زەمینەێ ئازاد ئەڕ فەئالیەت و چالاکی ژنان بوت.

ئاخرین قسە کەر بەرنامەێ ٨ مارس کاک مەنسور جوانمیری بی، ناو بریاگ سەرەتا ٨ مارس لەتەمام ژناێل و دایکەێل دونیا، وەتاێوەت ژنەێل ئازادیخواز و بەرابەرتەڵەب و تەمام ئنسانگەل ئازادیخواز تەبریک وەت و ٨ مارس وە ڕوژێک نەتەنیا ئەڕا ژن بەڵکە، وە ڕوژێک ئەڕا تەمام ئنسانگەل ئازادیخواز و بەرابەریتەڵەب زانست..

ئەو باسێک لەسەر زوڵم و ستەمگەلێک کە لەسەر ژنان لە ئێران وەگشتی پێشکەش بەشداران کرد، ناوبریاگ ئشارە کرد کە لە ناوخوەێ وڵات ڕەژیم کونەپەرەس جمهوری ئسلامی دەێان قانون و تەبسەرە زد وە ژن لە ناو قانون ئەساسی خوەێ داناگە کە بیگەسە بایس منزەوەوی بین و پاسیڤ بین بەش فرەێک لە ژنەێل کومەڵگە، لە ئدامەێ باسەکەێ ئشارە کرد کە تەبئیز، ستەم ،بێڕێزی و هەتک هورمەت و خەفەقان و نەوین فەزاێ ئازاد ئەڕا ژنان، ئێران کردگەسە جەهەنمێک کە هویچ ئومێدێک ئەڕا هویچ ئاێەم ئازادیخوازێک وەتاێوەت ژنان  نەیشتگە. خوەی سوزانن ، خودکوشی وفەرار لەمال نەهامەتیگەلێکتر بین کە جوانمیری خستەێانە وەر گوش بەشدارگەل مەراسمەکە.

دویای ئستراهەتێ ٥ دەقەیی، مەراسمەکە وە گورانی  شاد کوردی وەدەنگ جوانەێل پڕ ئنرژی و دەنگ خوەش، گروو” مورادیان مویزیک”  و وە هەڵپەڕی و شادی  بەشداراگەل مەراسمەکە تا سات ١٢ ێ شەو ئدامە داشت.

جێ دێرێت ئشارە بکریەت کە زیاتر لە ١٠٠ کەس لەی مەراسمە بەشدار بین کە گشت لە وەڕێوە بردن ئی مەراسمە ئبراز خوەشحاڵی کردن و داواێ سەرکەفتن کردن ئەڕا وەڕێوەبەرەێل مەراسمەکە.

کومیتەێ ژنەێل سەروە فدراسیون یارسان لە وڵات سوئد. جێ دێرێت ئشارە بکریەت کە مەراسمەکە وە پشتیوانی فدراسیون یارسان لە وڵات سوئد چیەڕێوە.

٢٠١٤.٠

دایکوپه‌ێام  خوه‌نێاێ له‌ مه‌راسمه‌که‌:

خوەیشکەل ئەزیز، بەشدارەێل جەشن ٨ مارس گشت وەخەێر باین.

ئیمروژ وەخاتر یادکردنەوە و ڕێز گردن لە فەداکاری، کار و چالاکی و گیان بەختکردن ژنان لە سەرتاسەر دونیا و خەبات ژنەێل کوردستان وە تاێوەت ژنەێل موبارز یارسانی کوبیمنەوسە و توایم جارێکتر وە تەمام دونیا بویشیم کە ژن ئیمڕوژ لەهەر وەخت و ساتێک بێشتر و ئامادەترە ئەڕا دەسەبەر کردن ئازادی، بەرابەری و ژیانێک شایستە کە حەق تەبیئی هەر ئنسانێکە، ئیمشەو لەێرە جەم بیمنە تا وەگەرد یەک پەێمان تازەوە بکەیم ئەڕا بێشتر کار کردن و فەئال بینمان تا وەدەس هاوردن حەق و مافگەل دموکراتیک خوەمان.

بەشدارگەل ئەزیز، ٨ مارس ڕوژیکە کە دەنگ ئترازە وە زوڵم، ستەم، بێ حقوقی و نابەرابەری ڕوی وە وجدانگەل زنگێ و ئەفکار عمومیە.

٨ مارس ڕوژ یەکدەنگی ژنەێل و پیاگەێل بەرابەری تەڵەب، ئازادیخواز و زامەتکیشە لە جەهان کە لە یە سەف موشتەرک ئەزم و ئرادەێ خوەێان لە وەرانوەر فەقر و بێ حقوقی سیاسی، فەرەنگی و ئقتسادی ژن وە ئەکسەریەت کومەڵگەێ بەشەری وە گوش دونیا رەسنن.

لە ساڵیاد ٨ مارس، ئی ڕوژ گەورەێ زەڕینە لە مێژوو موبارزەێ ئدالەتخوازی و بەرابەری تەڵەبی بەشەر، زەرورە تا خەبات خوەمان زد نابەرابەری ژن و پیاگ لەموقابڵ نزام و ساختارەێلێک کەچەوێان ئازادی ژن ناوینێت و لە موقابڵ هەرجور ئازادی،داخوازی و بەرابەری ژن لە کومەڵگە وسن دەنگ بەرزوە بکەیم و ئتحاد و هاوخەباتی و هاوفکری و رزگاری ئنسان لە بن دەسی وەتاێوەت ژنان بکەیمە بەرنامە و هەدەف ڕوژانەمان و لەی راسا تەڵاش و کار بکەیم. بەشداران ئەزیز رەژیم دیکتاتور پەروەر و مەزهەبی جمهوری ئسلامی ئێران لە ڕوژ وەسەرکار هاتنێ تا ئیسە روژ لە دویاێ روژ هەوڵ داگە ژن جور بەردە و کاڵا مامەڵە وەپێان بکریەت و هەمویشە لە موقابل بویچکترین ئازادی و حقوق ژن پیلان و بەرنامە ئەڕا تەسکوەکردن ئازادیەکان ژن داشتگە و هەیسیەت و حورمەت ژن جور بەشێک لە کومەڵگە لەکەدار کردگە و تا ئیسە سەدان ژن ئازادیخواز ئەڕا وەدەس هاوردن ئازادی، بەرابەری و کەرامەت ئنسانی خوەێان لە جامئە لە زندانە ترسناکەکان ڕەژیم کونە پەرەس جمهوری ئسلامی ساتەکان ژیان خوەێان گوزەرنن و لە موقابڵ تەوهین،شکەنجە و ڕەفتارگەل نا ئسانی و نائخلاقی مقاومەت کەن. تا ئیسە سەدان جار لەڕەسانەکان و دونیای مەجازی و خەوەرگەل باوەڕوەپێکریاگ ژنەفیم  کە ڕەژیم ئەڕا شکانن شەخسیەت ژنەێل لە زندانەکان وە شێوەی نا ئخلاقی و دویر لە بنەما ئنسانیەکان تەجاوز وە زندانیەڵ ژن کردگە، کە هەدەف لەی کارە ئیەسە کە قشر ژن لە خواستەکان خوەی پەشیمان بکەێتوە و دویرێان بخەێتوە لە موبارزەێ ئدالەتخوازی و ئیجور ئقدامقەێل بێ شەرمانەێ بکەێتە دەرس ئەڕا دیگەران و ژنان بترسنێ لە هاوار کردن و داواێ حەق و حقوق خوەێان.

هەڵبەت ژن کوردیچ بێ بەش نەویە لەی زوڵمگەل رەژیمە، تا ئیسە دەێان ژن کورد ئەڕا وەدەس هاوردن ئازادی و حقوق دموکراتیک و ئنسانی خوەێان گیانێان فداێ ئدالەت و بەرابەی کردنە کە ژن یارسانیچ لەزمن ئی بەشە قەرار گرن.

ژن یارسانی لە ئێران سەرەڕاێ ئەوەێ جور ژن لە تەمام ئازادی و بەرابەری بەین ژن و پیاگ بێ بەش بیگە و قانون پیاگ سالاری لەسەرێ حوکم کردگە، بەڵکم زوڵم نەتەوەیی و ئایینیچ وەی زوڵمگەلە توانریەت ئزافە بکریەت. ژن یارسانی لە ئێران وە هویچ لەون ناتوانێت وەپاێ ئارەزوەکان خوەی ئدامەێ تاسیل بێەیت و لە ئدارات حکومەتی ئەسڵەن وەرناگیریەت و دەێان قانون و تەبسەرە زد و ژن و حوق ژن لە قانون ئەساسی جمهوری اسلامی وەرلە هەرجور پێشرەفت ئی بەشە لە جامئە گرن . تەبئیز، نائدالەتی، نابەرابەری، ستەم، هەتک هورمەت و شکانن شەخسیەت واقەیی ئنسانە ئازادیخوازەکان هەمویشە بەرنامە و هەدەف و کردار وەڕێوەبەرەێل ولاێەت فەقین ئەڕا کومەڵگەێ ئیران و کوردستان کە ژن وەگشتی بێشترین سەهم بەشێە لەی هەمکە بەدبەختی و زوڵم و نابەرابەریگەلە. ژن لە ناو خوەێ وڵات هویچ ئومێدیک وەئایندە نەێرت و هەمیشە وەدەلیل تەمام وەربەسەکان لە کومەڵگەێ ئێران و کوردستان  دروس کریانە ژن نەتوانستگە یا نەیشتنە نەقش ئەساسی و موسبەت خوەێ لە ژیان ڕوژانەێ خوەی و لە ناو کومەڵگە بازی بکەێت. بەش فرەێک لە ژنيەێل ئێران و کوردستان ناتوانن وە ئارەزو و مەیل خوەێان لەسەر ژیان و سەرنوشت خوەێان خاون تەسمیم بون. ژن لەسیستم وەڕێوەبەری لە ئێران هویچ حەقیک نەیریت و لە تەسمیمگیرەکان ناو وڵات خاون هویچ بڕیارارێک نیە و حزور واقەی ژن لە ناو دەسەڵات خالیە.

یاران ئەزیز!

سەرەڕاێ تەمام ئی فشار، ستەم و ناحەقیگەلە کە لەوەرانوەر ژن ئنجام گردگە، وەلێ ژن تا ئیسەیچ هالە موبارزە ئەڕا ژێانێک شایستە و بەرابەر لە کومەڵگە. ئیمڕوژ خوەشبەختانە وەدەلیل دونیاێ ئازاد مەجازی خەبات و فەئالیەتەکان تا هەدێک ئاسان وەبینە و ژنان توانن وە هەوڵ و کوشش بێوچان خوەێان، وجودێان لە ناو سازمان و حزب و نەهادگەل حقوق بەشەری و ئتحادگەل ژنەێل ئاکتیڤ و تاسیردانەر بووت، ژن باێەد خوەێ ئەڕا شکانن تەمام ئی مەرزگەلە و ئەڕا سابت کردن وەزن و قورسای شەخسیەت واقەی خوەێان لە کومەڵگە بانە مەێدان موبارزەی وەشێوەێ ئاکتیڤتر لە جاران.  جێ دیرێ ئسارە بکریەت کە ژن یارسانی بێشتر زەمینەێ ئازادی و فەئالیەت ئەڕاێ واز بیە و وەجورێک لە ژێر فشارگەل مەزهەبی و ئفراتگەرانەێ ئایین نەویە و جامەئەکەێ لە دویر زەمان تا ئیسە جاێگاێ خاس و ئەرزشمەنێک ئەرا ژن داشتگە کە تەویسا ئیسە دایک و خوەیشکەێل یارسان نەقش فرەێک لە مەسولیەت پەزیری و فەئالیەت ئەڕا وەدەسهاوردن حوقەێل ئجتمای و ئنسانی، ئقتسادی و فەرەنگی و بەرابەری خوەێان بێاشتان. ئیسە دوینیم چەندین تەشەکول فەرەنگی و سازمانێک سیاسی (سازمان دموکراتیک یارسان) لە دەیشت وڵات ئاکتیڤن ئەڕا وەدەس هاوردن حەق و داخوازیە ڕەواو دموکراتیک و ئنسانیەکان ئی جامەئە کە ژنەێل یارسانی باێەد لە ئایندە نەقش دروس خوەێان لەناو ئی جەریان و ئەنجومەنگەلە بازی بکەن. چوین ئیمڕوژ ژن لە جامعەێ دموکراتیک وڵاتەێل ئروپایی وە تەمامی لە ئازادی و بەرابەری بەین ژن و پیاگ بەرخوردارن و فرەتر زەمینە هەس ئەڕا کار کردن و تەقالا کردن، ئیمە تەویسا بیاتایمە هاوارگەل کپوەبیگ ژن یارسانی و وەگشتی ژنەێل ناوخوەی و وەزیفە  دیریم وەگەرد پیاگەل ئازادیخوازا دەنگ و هاور ژنان ناو وڵات ئێران بویمن و هاوارێان برەسنیمە مەحافل بەینەلملەلی و حقوقبەشەری. وەزیفەێ ئیمە ژنەێل دەیشت وڵات فرە قورسترە و ناوت ئنتزار لە هویچ کەس،لاێان وە یا حزبێک بکەیم  کە حقوق و ئازادیەکانمان  بەراوەردە بکەن، بەڵکە تەنیا خوەمان وەباوەڕ وەخوەێ داشتن و کار و چالاکی توانیم مافە ڕەواو دموکراتیکەکان خوەمان مسوگەر بکەیم و حزور واقەیی خوەمان لە جامئە بسەڵمنیم.

یەجارتر ٨ مارس لە تەمام ژنان دونیا پیروزبای ویشم.

نەمان ئەڕا قانون پیاگسالاری ، ژیان ئەڕا بەرابەری و ئدالەت ئجتمائی لە کومەڵگەێ بەشەری.

وە ئومێد ڕەهایی، ئازادی و بەرابەری.

٢٠١٤.٠٣.٠٨

کومیتەی ژنان یارسان سەروە فدراسیون یارسان لە وڵات سوئد.

بازدیدها: 53