Home / بشیر امیرخانی / وە یەک کردن چوار پارچەێ کوردسان شعار یا واقعیت

وە یەک کردن چوار پارچەێ کوردسان شعار یا واقعیت

فرە جار شنەفیم و لە فرە لە کوڕ و کوبوەنەوەکان، وە ئحساساتێکی فرەوە باس لەوە کریەت کە کردستان یەکیکە و باێەد هەر چوار پارچەێ کوردستان بوتە یەک. فرە لە ئحزاب و سەرکردەکانیچ هەر ئی شعارە دەن و فرە جار ئەڕا ئەوەێک خەڵک تویش ئحساسات بکەن و لە هەمان کات ئەڕا تەبلیغات حزبی خوەێان کەڵک لەی جور شعارێک وە بگرن، ویشن هەر چوار پارچەێ کوردستان بوتە یەکی. تازە لەویچ زیاتر حزبگەل فرەێک هەن کە شعارەکەێان اتحاد هەر چوار پارچەێ کوردستانە

ئەوەێک ڕاسگو بوت و خوەێ گوڵ نەێەێ زانێ ئی شعارە نە تەنیا ناچوتە بوار پراکتیک بەڵک چشتێک لە خەێاڵ زیاتر نیە. تەجروبەێ سەدان ساڵ وەرین ئحزاب کوردستان لە هەر چوار پارچەکە ئی واقعیەتە خەستگەسە روی و وە تەجروبە دوینیم تەنانەت لە ناو هەرکام لەی پارچەگەلە ئتحاد و یەک پارچەی نیە. لە ڕوژهەڵات کوردسان دوینیم کە حزبەکان ئەرا شیرە مالین وە سەر دیگەران، هەرکامێان خوەێان وە نوینەر ئەو بەشە زانن، یان لان کەم ویشن ئیمە نوینەر ئەکسەریەتیم، وەڵێ وەختێک نەوبەت ڕەسێتە خوەێان دوینیم ئەڕا وە دەس هاوردن دەسەڵاتێک کە نەێرنەێ توان یەکتر تیکە پارە بکەن و بگرە فرە جارێچ هەر ئی کارە کردنە

لە شون ڕمیان حکومەت سەدام کورد وە جورێک لەو بەشە بینەسە خاون دەسەڵات و جور دەوڵەت وەڵ دونیا ڕەفتار کەن، ئەما دوینیم کە لە شون ئی چەندین ساڵ تویلانیە هەمراێ دو حزب لە ناو یەک بەش لە کوردسان نەوینەسە یەک و نەتوانستنە ئدارەێ دو شار بکەنە یەک ئدارە. ئەگەر خوەمان گوڵ نەێەم و هەر کەس چیوتە کوردستان عراق زانێ کە لە سڵێمانی و هەوڵێر وە ئاشکارا دو سیستم و دو ئدارە پەێرەو کریەت. ئەگەر لە هەوڵێر قاتڵ بیت لە سڵێمانی ئازادی و ئەگەر لە سڵێمانیە قاچاخ بیت لە هەوڵێر ئازادی. نزام ئمنیەتی کە لە هەر وڵاتێک بایخ فرەێک وەپێ دەن و فرە موهمە بەڵام لە کوردستان عراق دو نزام ئمنیەتی یا وە قەوڵ خوەێان ئاسایش هەس و هەر کامێان پەێرەو حزب تایوەتێکن

هەر ئی حزبگەلە فرە جار خوەێان شعار دەوڵەت کوردی دەن، وەڵێ یەک جار فکر لە خوەێان ناکەنوە کە دەوڵەت کوردی وە چە تێتە دی؟ چوی دروس بووت؟ ئایا خوەێان لە شون نزیک بیست ساڵ حکومڕانی توانستنە سڵێمانیە و هەوڵیر بخەنە یەک؟. فکر کەم خوەڵ وە چەو مەردوم کردنە کە ویشن دەوڵەت کوردی دامەزرنیم. ئیستا دوینیم ماوەێکە باس سەروکاێەتی هەریمە کریەت و وەزەکە فرە ئاڵوزە و کەس هازر نیە کەس قەبوڵ بکەێ، بێ گومان ئەگەر داعش لە بن گوشێان نەویاتا جەنگ داخڵی فرە محتمڵ بی، ئیستایچ دوینیم کە ئی بەشە لە کوردستان وە دەس یەک قەبوڵ نەکردن لە چ قەێرانێکی ئەمنیەتی و اقتسادی گوزەر کەێت، کەس هازر نیە بویش وە خاتر کورد، وە خاتر کوردستان دەس لە دەسەڵات خوەم هەڵگرم، دەس لە ماف حزباێەتی خوەم هەڵگرم

وە باوەڕ من ئەگەر فشار ئامریکا و غرب نەوت، جەنگ داخڵی یا لان کەم اعلام دو ئدارەیی کەریەت. پەس نەتیجە گریم کە نە تەنیا چوار ناوتە یەک، بەڵک یەک توانێ بوتە چوار

پەس با هەم مەردوم و هەم حزبەکان لە هەر چوار پارچەێ ئی کوردسانە بزانن کە

هەر چوار پارچە ناوتە یەک، چویکە یەک قەبوڵ کردن نیە، ئعتماد نیە،دەسەڵات حزبایەتی زاڵترە تا منافع ملی و هەزاران چشتتر

با حزبەکان وە خاتر منافع خوەێان خوڵ نەکەنە چەو خەڵک

با بزانیم تا وە شێوەێکی ئنسانی و بەرابەر حەق یەکتر وە ڕەسمیەت نەناسیم و یەک قەبوڵ نەکەیم، یەک پارچەیچ توانێ بوتە چەن پارچە

ئەما ئەگەر هەر چین و کومەڵک خوەێ وە خاون حەق بزانێ، ڕێز لە ڵێ بگیریەت، پرس و ڕاوێژ وە پێ بکریەت، لە دەسەڵات و ئقستاد شەریک بکریەت، لە گشتێ مهمتر ئعتماد لە بەین بوت و بمینیەت،تازە ئەو وەختە توانیم بویشیم هەر پارچەێک توانێ ئەڕا خوەێ دەوڵەتێک داشتوت

بەشیر

فنلاند

١٩.٨.٢٠١٥

Visits: 22

دیدگاهتان را بنویسید