ئازادی شەنگاڵ بیەسە ململانی بەین ئحزاب کردستانی

هەر ئەو جورەێکە گشت ڵاێک زانن، ساڵ و چەن مانگ وەرجە ئیستا شەنگاڵ وە شێوەێکی تەمومژ و گومانئاوی کەفتە دەس چەتەکان داعش و ئی نێروە وە شێوەێکی دڕندە کەفتنە گیان ئەو خەڵک بێ دەفاع و صدان کەس لە لێان تیر واران کردن و هزاران کەسیچ لە ڵێان وە دەس داعش ئەسیر کریان کە فرە لەوانە ژن و مناڵ بین کە هیچتان چارە نویس فرە لەوانە نادیارە. وە قەول شاهدگەڵ مەێدانی نزیکەێ ٨٠٠٠ پێشمەرگە سەر وە پارتی لەو مەنتەقە حزور داشتنە و گواێا پارێزەر ئەو مەنتەقە بینەسە، فرە لەو شاهدگەلە ویشن داعش وەختێک هات زیاتر لە ٢٠٠ نەفەر نەوینە و وە چەندین ماشین و دوشکاە ئەو حملە ئەنجام دانە. ئەوێکە ٨٠٠٠ پێشمەرگە نەتوانست لە مقابڵ ٢٠٠ چکدار تروریست داعش مقاومت بکەێت و وە ڕاحتی شەنگاڵ دانە دەسوە، قسە فرە ها پشتێ و لەی بارەوە وە فرە شێوە باس کریەت، کە وە باوەڕم وە مرور زەمان تاریخ جواو ئی پرسیارگەلە دەێت و معلوم بووت کە کی لە پشت قەتڵ ئام شەنگال بیە.

ئەما ئەو جورەێکە دیارە شەنگاڵ ساڵ و چەن مانگێکە ها دەس داعش و فرە جاریچ ویشن تعداد ئەو داعشگەلە کە هانە شەنگاڵ فرە کەمن و لە وەرانوەر پێشمەرگە ناتوانن خوەێان ڕا بگرن!؟

دوینیمن کە لەی ساڵ و چەن مانگە فرە لە شونەکان کە کەفتوینە ژێر دەس داعش وە قهرەمانی گریلا  و پێشمەرگە ئازاد کریان و بگرە زەربەێ کوشندەیچ لەی ماوە لە داعش دریاس، وەڵێ ئی نیرو قودرەتمەندە کە غەربیچ باس لە ڵێ کەێت ئەڕا تا ئیستا نەتوانستگە یا نەتواستنە شەنگاڵ ئازاد بکەن؟

دیارە ئازادی شەنگاڵ بیەسە معماێک جور تەسلیم کردنێ کە کەم کەس زانێ ئەێ شەنگاڵ ئەڕا ئازاد ناکەن؟ ئایا پێشمەرگە ناتوانێ، یا ئجازە نەێرن کە شەنگاڵ ئازاد بکەن.؟

وە قەوڵ کوردی خوەمان شەنگاڵ ئەڕا حکومەت هەریم بیە باووک و ئەڕا ملەت شەنگاڵ بیە بەدبەختی. شەنگاڵ بایس بی کە دونیاێ غەرب وە کو دەنگی بانە جواو و حکومەت هەریمیچ وە تایوەت پارتی لەی وەزە وە نەف خوەێ کەڵک وەر گرێ و گردگەیچە، ئەما ئەڕا خود شەنگالیەکان چە کریاس؟ وە باوەڕ من تەنیا لە سەر تلویزیون شەنگاڵیەکان کەفنە فکر مسئولین هەریم و بەس.

ئەما ئەوجورە دیارە و فرە جار فرماندە مەێدانیەکان باس لە ڵی کەن باز هەم ئازادی شەنگاڵ بیەسە ململانی و بازیچەێ دەس ئحزاب کوردستانی و لەوانە پارتی و پ ک ک . ئەو جورە دیارە پارتی ویشێ ئیە ئامادەیم ئەڕا ئازاد کردن شەنگاڵ وەڵی پ ک ک ویشێ بدون حزور ئەوان ئمکان نەێرێ شەنگاڵ ئازاد بکریەت و کورت و کورمانجی پارتی ویشێ زەمانێک کار کەیم ئەڕا ئازادی شەنگاڵ کە پ ک ک مەنتەقە چوڵ کردووت و پ ک ک ئی ئولتیماتوم پارتیە قەبوڵ ناکەێ  و ویشێ پارتی ناتوانێ وە تەنیا شەنگاڵ ئازاد بکەێ و ئیمە لە شەنگاڵ خوین دایمە بایەد حزورمان لەێرە وەر چەو بووت.

لەێرە دیارە کە نە پارتی و نە پ ک ک منافەێ خەڵک شەنگاڵ لە وەرچەوێان نیە و تەنیا هژمونی خوەێان ئەڕاێان موهمترە. ڕاسە ئەگەر پ ک ک فریاێ شەنگالیەکان نەکەفتا، شەنگاڵ ممکنە فرەتر لە ئەوێک بی ئنفاڵ بکریاتا، ئیە هەم خەڵك شەنگال و هەم دیگەران زانن. ئەما ئەوێک ململانی سیاسی بین ئی دو حزبە بایس بووت کە شەنگاڵیەکان فرەتر زوڵم لە ڵێان بچووت هویچ پاساوێک ئەڕا هویچکامیان هەڵ ناگرێت. دو فرماندەێ مەیدانی شەنگاڵی بەرێز قاسم شەشو و بەڕێز حیدر شەشو کە هەردوکیان شەنگاڵین وە داخوە جورێک ئەوانیچ بینەسە بازیچەێ دەس حزبەکان. من باوەڕ دێرم ئەگەر ململانی ئحزاب کوردستانی بیڵێ خود ئیزەدیەکان توانایی و پتانسیل ئازاد کردن شەنگاڵ دێرن و ئەگەر فەرماندە ئیزەدیەکان شەنگاڵ داوا لە مەردوم بکەن ئەڕا ئازادی شەنگاڵ وە دەس خوەێان نە تەنیا ئیزەدیەکان، تەنانەت یارسانەکان دەیشت وڵاتێج ئی ئامادەگیە دێرن کە بچن ئەڕا ئازادی شەنگاڵ گیان خوەێان بەخت بکەن. وە باوەڕم هەم لە بار ئخڵاقیوە و هەم لە بار ئنسانیوە وەزیفەێ فەرماندە مەێدانیەکان ئیزەدیە کە دەس بیەنە دەس یەک و ئولتیماتوم بیەنە حزبەکان و بویشن با ئیوە و بێ ئیوە ئیمە شەنگاڵ ئازاد کەیم و هەرکامتان شەرکیمانین پاتان وە بان سەر و هەرکامتان تواین وە بان شەنگاڵوە کاسبی بکەین مزڵتان شەڕ کەن و بچن. با حیدر شەشو و قاسم شەشو و فرماندەکانتر ئیزەدی، یەک بیانیە بیەن ئەڕا خەڵک ئیزەدی و یارسانی ئەڕا ئازاد کردن شەنگاڵ ئەو وەختە دیار دەێ کە چەن نەفەر هازرن ئەڕا پاک وە کردن شەنگاڵ لە دەس ترور دەوڵەت ئسلامی داعش، گیان خوەێان بەخت بکەن. من سەرەڕاێ تەمام گیر و گرفتەکان ئەگەر ئی جور داواکارییک بکریەت هازرم وە سەر بچم نەک وە پا.

ئومێدوارم ئحزاب کوردستانی دەس لە کاسبی کردن لە سەر شەنگاڵ هەڵ بگرن

بشیر

٨.١١.٢٠١٥

بازدیدها: 22