تیرواران کردن دو ژنە گریلا لە ڵاێەن ارتش تورکیەوە محکوم و شەرمەزار کەم

هەر ئەوجورە لە میدیاکانوە بڵاو کریاوە، ارتش تورکیە دو ژنە گریلا وە شێوەێکی زۆر نامرۆڤانە تیرواران کەن و جەسەێان دەنەوەر گوڵە.

لە مێژوۆ تورکیە هەم دەسەڵات و هەم ئەوانەێک جێ وەجێ کەر دەسەڵاتن لە خۆین ڕشتن سوڵ ناکەن و جور گورگ دەمێان خویناوی بیە، تەنانەت وە ژن و مناڵیچ رەخم ناکەن. لە دەوران ئوسمانی ئنسانەکان جور کاوڕ سەربڕیان و لاشەکانێان خستنە وەر جانەوەر، یانێک ئنسانەکان ئەرزش ئنسانی لە ڵاێ ئەوان نەێاشتن و نەێرن. هەر ئەوەسە دوینیم ئیستاە فەرمانبەر و فەرماندەر لە تورکیە وە ئەو پەڕ دڕندە یوە دویر لە ئخلاق مروفاێەتی وە و لە ور چەو کامێراکان دونیاوە دو ژن دەنەوەر گوڵە وە شێوەکی ئوسمانیانە سەرێان لە ڵەشێان جیا کەنوە. ارتش تورکیە هاوپەێمان ناتوە و پێک هاتەێ ناتو لە وڵاتگەڵیکە کە مافە بنەڕەتیەکان تەنانەت ئەڕا یەک ئەسیر جەنگیچ پارێزیاس. فرە جێ سەرسوڕ مانە کە ارتش تورکیە لە وەرانوەر چەو ناتو وە شێوازێکی دویر لە پرەنسیبە جەنگی، ئنسانی و ئخڵاقیەکان دو ژن ئەسیر وەیشێوە گولەباران کەن. لە قانون وڵاتە بێ قانونەکانیچ یەک ئەسیر جەنگی وەختێ ئەسیر بی، نەبایەد بکوشیەت و ئەگەر ئەسیر گوڵە واران بکریەت تاوان جەنگییە و کە ئیە وە ڕوشنی لە قانون ناودەوڵەتی ئەڕا جەنگ وەپێ ئشارە کریاس.

کورد لە کوردستان باکور، وە شێوەێکی درندانە کەفتنەسە وەر پەڵامار دەوڵەت تورکیە، شاردارەکانێان کە وە دەنگ ملەت و وە شێوازێکی دمکراسی هەڵوژریانە لە ڵاێەن پلیس تورکیەوە دەسگیر کریەن، بێ هورمەتی وەپێان کەن و دونیایچ لە وەرانوەر ئی بێ هورمەتیە بێ دەنگە. وە باوەرم کورد لەو بەشە لە وەرانوەر دو آڵترناتیو قەرار گردگە، یکی ئەوێک وەشێوازێکی مەدەنیانە مبارزەێ خوەێان پێش بوەن، هەر ئەوجورەێک تائیستاەپێش چیەیان ئەوێکە یەک جار ئەڕا هەمویشە وەڵ دەوڵەت تورک تایین تەکلیف بکەن. ئاڵترناتیو یەکم کە متدروژە و دونیا ڵە ڵێ حماێەت کەێ خواست هەر ئنسانێکی ئازادیخوازە و ڕێگاێکی مەدەنیانەس کە بتوانێ زامن ژیانێکی هاوبەش و مساڵمت ئامیز بۆ ئەڕا مڵەتگەڵێک کە لە ناو یەک و لە کنار یەک ژیەن.

ڕاسە کورد لە تورکیە توانستگە قوناخگەڵێک فرە سەخت بخەێتە پشت سەر و ڕێگەڵێکی فرە سەخت بوڕێ تا ڕەسیەسە ئی قوللە وەڵی ئی یەک ساڵەێ ئاخرە نیشان دەێ کە دەوڵەت تورکیە و رەهبەری اردوغان نە چەوێ ژیان مساڵمەت ئامیز دوینێ، نە ئازادی و دمکراسی تواێ و نە هویچ هەقێک وە کەس ڕەوا دوینێ. اردوغان سەرمەست قودرەت بیە و ئەفکار ئخوانی خوەی تواێ کینە و نفرەت لە ناو چین و کومەڵگاێ کورد و تورک بکاڵێ. ئەردوغان کەسێکە کە تەنانەت ئەڕا حفز قودرەت خوەێ وە نزیکتەرین کەسەکان خوەێ ڕەحم ناکەێ و جور دەوران ئوسمانی دەسەڵات و دین ئەڕاێ خەت قرمزە و کەس ناوت لە ڵێ عبور بکەێ. هەر ئەو جورەیک وەتم کورد لە کوردستان تورکیە ساڵیان تویلانییکە کە ئی ڕێگاە تاقی کەنوە و هەر ئدامە دێرێ، تەنانەت وە تانک و توپ ماڵەکانێان وێران کردن ئەوان هەر ویشن مبارزەێ مەدەنیانە هەڵوژنیم و ئدامە دەیم، پرسیار ئەوەسە ئەێ ئەگەر ئی موتدە جواو نەێا? ئەێ ئەگەر دەوڵەت تورک دەس لە کوشت و کوشتار هەڵنەگرێ، ئەێ ئەگەر دونیاێ دمکراسی وە سکوت خوەێان ئدامە دان،بێ گومان هویچ ڕێ هەڵیکتر نامینێ جیا لەوێکە کوردیچ زیاتر لە جاران بتوانێ دەفاع لە خوەێ بکەێ و ڕێگاکانتر تاقی بکەێتوە.

تا زەمانێک بەین تورکیە وگرد ڕوسیە واسرائیل خراو بی، متاسفانە کورد یا نەتواست یا نەتوانستن لەو هەڵە کەڵک وەر بگرن و پشتیوانی ئەو دو وڵاتە زڵهێزە وە دەس بارن، ئیستاە دویمنیم کە ئی وڵاتگەلە ڕەوابتەکانێان جور جارانە و گویا کیشەکانێان چارە سەر کردنە وەڵێ وە باوەڕم وەیجورە نیە و هەم روسیە و هەم ئسرائیل تازە کیشەکانێان وەل تورکیە دەس وەپێ کەێ. تورکیە کەفتگەسە ناو هەچەڵێک یان خاستر بویشیم خستنەسەێ ناو هەچەڵێک کە دەرهاتن لەی هاچەڵە ئەڕا ای وڵاتە فرە ئاسان نیە و توانێ بوتە زەڵکاوێک کە لە تێ تازە گیر کردگە. لە ڵاێکتروە گرفتاریەکان ناو خوەێ و دەسگیر کردن و لە سەرکار لابردن و زندانی کردن مخاڵفه کان خوەێ گرفتێکە کە دەوڵەت ئەردوغان وەی ئاسانیە ناتوانێ دەربازێ بکەێ. چەندین گرفت داخڵی و خارجی یەقەێ تورکیە گردگەو کورد ئەگەر نەتوانێ لە وەزیەتە وە نەف خوەێ کەڵک وەربگرێ بێ گومان ئەگەر دەوڵەت اردوغان ئی موشکلاتە بخەێتە پشت سەر وە ڕاحتی توانێ کورد بوێتە دویا ئەڕا زەمانێک کە قسە کردن وە زوان کوردی قەێەخە بی.

من جارێکتر گولەواران کردن دو ژنە گریڵای کورد وە دەس نەوەکان ئوسمانی محکوم و شەرمەزار کەم و ویشم خوەیشکەکانم ئیوە فریشتەکان ئازادی وڵاتین، ئیوە توانستین دەوڵەت فاشیست تورک وەی شێوە رسوا بکەین، پەس ئیوە هەرگێز نامرین. سەر شوڕی ئەڕا دەسەڵات دارەکان تورکیەس کە زەڕەێک ئخڵاق مروفاێەتی نەێرن. ڵە حاڵێک نەوەکان ئوسمانی جەسەێ ئیوەێ ئەسیر دەێتە وەر گوڵە، ئیوە وەل ئەسیرەکان ئەوان وە شێوازێک ڕەفتار کەین کە ئەوان ئحساس ئەوە ناکەن کە ئەسیرن، وە نان و ئاو و چای پەزیرایی لە ڵێان کەین، تەنانەت جور مێوان وەڵێانە ڕەفتار کەین نە جور ئەسیر. ئیانە نیشان دەێ کە ئازادی و ئنسانیەت لە وجود ئیوە زنەس نە لە وجود جنوکەکان اردوغان.

سەر تەعزیم لە وەرانوەر گیان پاکتان دانەونم و جارێکتر ویشم ئیوە نامرین.

هەر بژیەی ژنە گریلا،

بشیر

٣٠.١٠.٢٠١٦

بازدیدها: 16