حزب دموکراتیک یارسان هێرش تروریستی و ئاماجدار جمهووری ئسلامیی ئێران ئەڕا سەر کومەڵەی زامەتکیشان کوردسان و حزبگەل ترەگ کورد وە تونی ماکووم کەێت

حزب دموکراتیک یارسان، کردارە تروریستییەکان ڕەژیم وە پاماڵکردن ئاشکرای حقوق بەشەر و ناسەقامگیریی فرەتر لە ناوچەگە زانێت.

حزبەکەمان ها لە سەر ئەو باوەڕە ک سیاسەتگەل سەرکوتکەرانە و قەێرانگەل ئێسە، گرفتێگ جدییە لە نواێ وەدیهاتن ئەداڵەت، ئازادی و ئەمنیەت پایار ئەڕا مەردم ئێران و ناوچەگە.

تەجروەی ساڵگەل وەرین نیشانی داس ک وەردەوامی ئی ساختارە، نە تەنیا نەتوانستێە گیچەڵگەل ئیسە چارەسەر بکەێت، بەڵکەم بیەس وە بایس قوویلتر کردن قەێرانەکان.

بێگوومان ئی پەلامارگەل تروریستییە تەنیا ئەڕا نائەمنی و میلیتاریزەکردن ناوچەگە و وەچەکووشی مەردم بێتاوان کوردە.

لە سەر ئی بنەوا، حزب دموکراتیک یارسان، جەخت کەێتوە ک وەبێ گوڕین بنەڕەتی لە ساختار حوکمڕانی، ڕەسین وە ئەداڵەت، ئاشتی و ئەمنیەت پایار ئمکان نەێرێت و جارێک تر پا لە بان حەرەکەت وەرەو رێچارەگەل بنەڕەتی و ئاشتیخوازنە دەێتەگەز.

حزب دموکراتیک یارسان

شەوراێ مەرکەزی

۱٥ ئەپریل ۲۰۲۶

بازدیدها: 50