کوبونەوەی تەشکیلاتی سازمان دمکراتیک یارسان لە استوکهوڵم

ڕێکەفت١٨.٠٣.٢٠١٧ لە استوکهوڵم پایتەخت وڵات سوئد مەسئول کمسیون تەشکیلات سازمان دموکراتیک یارسان منسور جوانمیری کوبونەوەێک تەشکیلاتی ئەڕا بەشێک لە ئەندامان سازمان دموکراتیک یارسان وەڕێوە برد.

هەدەف لە کوبونەوەکە تەرمیم کردن کومیتەێ کشوەری بی لە وڵات سوئد.

کوبونەوەکە وە دەقەێک بێ دەنگی ئەڕا ڕوح گیانبەختکرەێل کورد و کوردستان وەتاێوەت یارسانیەیل گیانباختە لە ڕی ئازادی و ماف بەشەر دەس وە کارەکان خوەێ کرد.

بەڕێزێان باسێک کوتا لەسەر زەرورەت تەشکیل سازمان دموکراتیک یارسان و دەسکەفت و کەموکوڕیەکان ئی سازمانە لە چەن ساڵ وەرین داشت.

هەر کومەڵگەێک ئەرا پارێزان موجودیەت و هەویەت و فەرهەنگ خوەێ لازم وە خوەێ سازماندەیی دێرێت. کومەڵگەی یارسانیچ وەخاتر تایبەتمەنندیگەل فەرهەنگی، ئجتماعی، جوغرافیایی و زوانی لە هەر وەخت زیاتر لازم وە خوەێ سازماندەیی و خوەێ جەم کردن دێریت و ئەرا ئەوەی بتوانێت لە ڕویدان ئاڵوگوڕەکان لە مەنتەقە وەتاێوەت لە ئێران جی نەمینیەت. داشتن یەک سازمان سیاسی کە بتوانێت وە شێوەی موسالمەت ئامیز خواستە سیاسی و فەرهنگیەکان کومەڵگەێ یارسان مەترەح بکەێت یەک زەرورەت تاریخیە.

کاک منسور کارەسات شەنگال کە لە تەرەف گرو تروریست داعش وەسەر خوەیشک و برا ایزەدیەکان هات لە باشور کوردستان و بێ ئەهمیەت کردن داخوازیەکان کاکەیەکان لەی بەشە لە کوردستان لە تەرەف حکومەت هەریم کوردستان وە تەجروبەێک تەڵخ زانست. پەس زەمانەت کردن ئەمنیەت و ئاسایش جامعەێ یارسان و نەقش داشتن لە بنیاتنانەوەێ ئیران دویای حکومت اسلامی ئێران نیاز وە ئامادەکاری دێرێت و سدی لازمە ئی مەسئولیەتە لە ئایندە داشتوت و ئی رولە بازی بکەێت.

بەڕێزێان ئشارە کردن کە جمهوری اسلامی ئێران ئیسە لە هەروەخت فرەتر فشارەکانێ ئەڕا سەر کومەڵگەی یارسان فرەتر وەکردگە و ڕوژانە لە کاناڵگەل رەسمی و زوانحاڵ حکومەتی بێڕێزی وە مردم یارسان کەێت و تەمام تەڵاشێ ئەڕا ئاسیمیلەێ زوانی و فەرهنگی ئی جامئە خستگەسە کار و دەێان دام و دەسگاێ جاسوسی و ئەمنیەتی لەسەر ئی مردمە فئال کردگە، کە ئیە بیەسە بایس فشار گەورەێک لەسەر مردم یارسان وەتاێوەت ئی فشارگەلە بەشێک لە مەردم یارسان مەجبور کردگەسە جی هیشتن جی و میلکان خوەێان.

هەر لیجورە ئشارە کرد کە سازمان دموکراتیک یارسان لە ئروپا وەتەمام تەوان خوەێ لە هاوکاری کردن مەردم یارسان لەڕابتە وە کەیس پەنابەری درێخ نەکردگە و لەی ڕابتە سەدان تەیدی ئەرا ئدارات مەربوت وە کەیس پەنابەری لەی وڵاتەێلە کل کردگە و فرەیچ جواگو بیەس.

لە ئدامەێ کوبونەوەکە کاک علی عسکر خوسروی سوخنگو سازمان دموکراتیک یارسان باسێک داشت لەسەر گرفت پەنابەرەێل یارسان لە وڵاتگەل ئروپا وەتاێوەت وڵات سوئد، و لەی رابتە پیشنیار وڕێنوینیەکان خوەێ دا ئەندامان و ئشارە کرد ک سدی لەی ڕابتە مکاتباتگەلێک داشتگە وەگەرد مقامات ئی وڵاتگەلە و لە ئایندە تڵاش فرەتر کەێت کە موزو کەیس پەنابەرەێل یارسانی بێشتر تەوەجە وەپێان بکریەت وەخاتر شەراێەت تاێوەت وە ئی کومەڵگە لە ئێران.

کاک یونس سنجابی ئەندام کومیتە مەرکەزی دویای کاک علی ئشارە کرد کە گەشت ئنسانگەل فئال ئی جامئە لازمە وەزیفە وە ئودە بگرن و لە ڕاستاێ وەدەس هاورد حق و حقوق لەلێ سنیاێ ئی جامئە لازمە ئەرک ئخڵاقی و دینی خوەێان وەجێ بارن ، ناو بریاێ ئشارە کرد کە سازمان دموکراتیک یارسان وە داشتن باوەڕ وە ئازادی و حقوق بەشەر و جور زەرفێک سیاسی توانایی وەر گردن پتانسیلگەل ئی جامئە لە ناو خوەێ دیرێت و ئی سازمانە دیریت خوەی ئوپدەیت کەیت ئەرا تەغیرات و وەر گردن دەمچەوگەل تازە لە سەت ڕێبەری ئی سازمانە و تا ئیسە تەمام دەرەکانێ وەڕوی هەر یارسانیک کە خوازیار خدمەتە وە جامئەکەی خوەێ نەوستگە کە ئیە جێ خوەشحاڵیە.

لە ئدامەێ کوبونەوەکە سدی گوش دا لە نەزەر، پێشنیار و ئنتقادەکان ئەندامان خوەێ، ئەندامان لە باسەکان بەشداری کردن باوەڕ داشتن کە سدی ئیسە یەکی لە وزیفەکانێ ئیەسە کە فشار بخەیتە سەر مقامات وڵاتگەل ئروپایی ئەڕا تەوەجە کردن وە وەزیەت یارسانیەێل لە وڵاتەکانێان ، هە ئیجورە ئشارە کردن کە متاسفانە وەخاتر کەم تەجروبەیی بڕێک لە کارمەندەێل ئی مقاماتە و کەم زانی بڕێک لە مەردم یارسان لە سەر موشکڵات یارسان لە ئێران و هەرلێوا فەرق و جیاوازیەکان دین یاری وەگەرد دین اسلام، ئیە بیەسە بایس ڕەدی فرەێک لە کەیسەێل یارسانی و ئەگەر ئی رەوەندە ئدامە داشتوت مەردم فرەێک مەجبور بون کە روی بونە قەبولکردن دینەێلێک تر وەخاتر گردن اقامەت لەی وڵاتەێلە.

لە دمایی کوبونەوەکە ئەندامان کومیتە مەکەزی قەوڵ دان کە پێشنیار،ڕخنە و دیدگاکان ئەندامان وە گوش کومیتە مەرکەزی ڕەسنن.

لە دویای تەمام بین کوبونەوەکە، ئەندامان کومیتە مەرکەزی وەگەرد ئەندامان کومیتەێ کشوری بەشداری کردن لە مەراسمێک کە فدراسیون یارسان لە استوکهوڵم وە خاتر ڕێزلێنان لە خەبات و تێکوشان کاک ابو کەریمی خستویەێ ڕێ.

لە مەراسمەکە پەێام سازمان دموکراتیک یارسان لە تەرەف کاک منسور جوانمیری پێشکەش کریا.

کومسیون تەشکیلات لە وڵات سوئد!

ڕێکەفت ٢٠١٧.٠٣.١٨

Visits: 26