بەشداری سازمان دموکراتیک یارسان (سدی) لە رێوڕەسمێک تایبەت به جەژن نەوروز، لە ئوسلو

روژ چوارشەمە رێکەفت ٢٢.مارس ٢٠١٧ کۆمیتەێ دیپلۆماسی هاوبەش پارت و رێکخراوە کوردستانیەکان لە وڵات نروژ کە لە ١٥ پارت و رێکخراو هەرچوارپارچەێ کوردستان دروس بیە، وەبونەێ جەژن نەوروزوە مێوانداریێک ئەڕا دوس و کەسگەل سیاسی و روشنفکر و ئەکادیمی و رووژنامەوان نروژی رێکخستوین. لەسەر داووەت رەسمی ئەو کۆمیتە، شاندێک لە نمایندەگەل سازمان دموکراتیک یارسان لە وڵات نروژ کە پێکهاتوین لە ڕێزدارێەل کاک حوسەین خەلیفە، فرامەرز سەلیمی و شادوست کەریمی بەشدار ئەو مەراسمە بین و لەلاێەن کۆمیتەێ وەڕێوەبەری مەراسمەکە کە لە نوینەرگەل احزاب کوردستانی هەرچوارپارچەێ کوردستان پێک هاتوین، وەگەرمی پێشوازی وەلێان کریا.

لە سەرەتاێ ڕێوڕەسمەکە، پەێام کۆمیتەێ دیپلۆماسیی هاوبەش پارت و رێکخراوە کوردستانیەکان لەلاێەن رێزدار رەفیق قەفاروە خوەنیاوە. پەێامەکە وەزوان نروژی ئامادەکریاوی و تیشک خستویەسەر وەزیەت نەتەوەێ کورد لە هەرچوارپارچەێ کوردستان وەتایوەت وەزیەت باکور و رۆژئاواێ کوردستان و هێرش داگیرکەرانەی دەوڵەت ترکیا لەو دوو پارچە و وێران کردن ماڵو هاڵ هاووڵاتیگەل بێ دەفاێ کورد لەو بەشە.

جێ باسە کە تەمام بەرنامەکە وەزوان نروژی وەڕێوە بریا. بەشێ فرەێک لە قسەکەرەکان ئەو مەراسمە پێکهاتوین لە چەندین کەساێەتی و ئەندام پارلەمانگەل نروژی ناو حزبە جیاجیاکان وەڵات نروژ. هەرکام وەنەوبەت خوەێان پیرۆزبایی جەژن نەوروز لە نەتەوەێ کورد کردن و ئاواتەخواز بین کە هەرچێ زویترە، نەتەوەێ کورد وەمافە نەتەوەیەکان خوەێ بڕەسێ و ئازادی خوێان وەدەس بارن. ئەوان وەئاشکار نگرانی خوەێان لە سیاسەتەکان رەجەب تەیب ئەرووغان دەربڕین و ناوبریاگ وە دیکتاتور لەقەڵەم دان.فرەلە باسەکانێان لەسەر ئەوەبی کە دەوڵەت ترکیا وەگشت شێوازێک و وەگشت جورە چەکێک لە نەناو پەێمان ناتو وەدەسێ هاوردگە، بێ بەزەییانە درێژە وە هێرشەکانێ لە ناوچە کوردنشێنەکان دەێت و گشت یاسا ناونەتەوەیەکان لەژێرپا ناگە و شارو ئاوایەکان کورد لە باکور کوردستان وێران کردگە و لە هیچ کوشتو کوشتارێک دەس نەپارێزیگە. هەر ئەوجورە درێژە وە زندانی کردن سیاسەتمەدارەکان کورد لەو وڵاتە دەێت تاکو دەسڵات تاک لاێانەێ خوێان زیاتر وەهێزتر بکەێ.

هەر لە پەراوێز مێوانداریەکە، نوینەرگەل پارت و ڕێکخراوەکانتر خوەێان لە نوینەرگەل سازمان دموکراتیک یارسان نزیک کردن و تەمایل ئەڕا کار هاوبەش نیشان دان. نوینەرگەل سازمان دموکراتیک یارسانیج لەسەر ئەو باوەڕە بین کە گشتمان وەگەرد یەکا قورساییمان زیاترەو توانیم خاستر خزمەت وە نەتەوەکەمان بکەیم.

بەشێکتر لە بەرنامەکە ئەڕا نانخواردن و موسیک و گورانی دانریاوی کە فرە جێ رەزامەندی مێوانەکان بی.

نوینەرایەتی سازمان دموکراتیک یارسان لە نروژ

بازدیدها: 35