سیاسەت سازمانی و ڕەفتار سیاسی لە یەک سازمان سیاسی!

یارسان مدیا
‏25‏.10‏.2020

مەنسور جەوانمیری

وەرلەیەێکە بچیمە ناو ئەو باسە، با تەوزیک بویچک بێەم لەسەر  سازمان سیاسی.

یەک گروو یا چەن کەس لە دەور بەرنامەێک جەمەو بوون و وەشێوەێ سازماندریاگ هانە شون بەرنامەێ کاری خوەێان.

هەر سازمان سیاسی یەک تەشکیلات و یەک بەرنامە دێرێ. کار تەشکیلات ئیەسە کە بەرنامە ئامادە و جێوەجێ بکەێ.

سازمان سیاسی ئەندامگیری کەێ، کادرسازی کەێ،( وەشێوەگەل جوراوجور کە یەکی لەوانە تەوزی بەرنام و هەدەفەکان سازمانە لە تەریق سوسیاڵ مدیاوە) کە سازمان دموکراتیک یارسان ئیسە لەی ڕەوشە استفادە کەێ.

جەم کردن کومەک ماڵی، دروس کردن ارتبات سالم وەگەرد مەردم  و فرە چشت تر کە ئیانە گشتێ ها خزمەت پیادە کردن بەرنامەێ سازمانی و وەدەس هاوردن هەدەفگەل دیاریکریاگە. سازمان سیاسی هەمویشە ها مەرحەڵەی مودیریەت و وەخوەێا چینەوەێ فەئالیەتەکان خوەێ تا بتوانێ بەرزترین کارایی ئەڕا تەڵاشگەل خوەێ وەدەس بارێ

ڕەفتار سیاسی!

ئەوەڵەن لازمە اشارە بکریەت کە ڕەفتار و هەڵسوکەفت سیاسی تەنیا ئەڕا سیاسەتدارەێل نیە. ئی مەسەڵەێ سەخت و شاێەت تاڵە هەر کەس ئەگەر لە مودەت کەمێک لە یە سازمان یا حەتا یە جێک کار یا فەئالیەت کردوت، ئی مەسەڵە دەرک کردگەس.

لازم نیە تا لە یە سازمان گەورە چەن هەزار نەفەری کار بکەی تا شێوەی ڕەفتارگەل سیاسی سازمانی بوینی.

حەتا لە یە کار تیمی ٣ێ نەفەریچ توانی سیاسی کاری بوینیت و تەجروبەێ بکەی،.

ڕەفتارگەل سیاسی، ڕەفتارگەلێکن کە لە تەوزی و وەزیفەێ فەرد پێشبینی نەکریانەس و یە کەس کوشێ کە وە اتکا وە ئەوانە، لەسەر دیگەران نفوز بکەێ و و هەمیج لەسەرێانتاسیر دابنەێ.

 

فرە لە ڕیشەگەل ڕەفتار سیاسی لازمە لە وجود خود ئەو کەسە پەێا کرد. وەیمانا بڕێ ئەفراد، زاتەن ئامادەگی فرەترێ ئاڕا سیاسیبازی و سیاسیکاری دێرن

ڕەفتار سیاسی نە تەنیا وەجورێک زاتی مەنفی بوت وەلی توانێ ئەڕا ئەندامەێل یەک سازمان یا خود سازمانەکە وەکەڵک بوت.

لە ناو هویچ سازمانێک ناتوانریەت رەفتار سیاسی لە بەین بوریەت، بەڵکە بایەد کونتروڵ و مودیریەت  بکریەت تا لە رەوڵ حەقیقی و سازندە قەرار بگرێت.

سیاسەت سازمانی!

لە حەقیقەتا سیاسەت کەلەمەێک خراو یا پێس نیە کە جاروبار ژنەفیمەێ،سیاسەت تەنیا یە بازیە کە توانێ وە شکڵێک خروا وەکار بوریەت، جور باقی بازیەکان، ئەما زاتەن خراو نیە.

حەقیقەتەن، مەسەڵە چشتێک خەڵاف ئی مەوزوەسە. سیاسەتگەل سازمان سیاسی ئەمرێک تەبیئی، مەنتقی و وەکەڵکە.

هەر سازمانێک سیاسی لازمە، ئەهداف، بەرنامە واستراتژیک موشەخەس، ڕوشن و دیاریکریاگێک داشتوت تا بتوانێ ڕەفتارگەل سیاسی و تەشکیلاتی خوەێ بەر ئەساس ئەو بەرنامە و ئەهدافە تەیین و دیاری بکەێ و هەنگاو هەڵگرێ.

لە واقەێا اجرا کردن سیاسەت سازمانی لازمە جورێک بوت کە لەتمە نەێەی لە بەدەنێ تەشکیلاتی و باێەد ڕابەراێەتی ئەو سازمانە بتوانن وە شێوەی دروس و وەلەوەرچەو گردن زەوابت تەشکیلاتی وحفز مەنافەێ سازمانەکە وەگەرد موشکڵات دەرون تەشکیلاتی بەرخورد اساسنامەیی بکەن و ئەڕا حەل نزاگەل دەرون تەشکیلاتی و دویر لە ڕویکەرد موقابڵە گەرانە وەگەرد سیاسەتگەل سازمان ئەمەڵ بکەن.

نەتیجەگیری!

لە نەهاێەتا ئیە ئنسانە پا نەێتە ناو مەێدان سیاسەت. لە نەتیجە بووین جورێک لە لە اختڵاف نەزەر لە ناو هەر سازمان سیاسی و قەێر سیاسی مەسئەڵەێک تەبیئی و حەتا پێشبینی نەکریاگەس.

ئەما هەر سازمان و تەشکیلاتێک سیاسی ئەڕا بێشتر موەفەق بوین لە بەرنامە و ڕەسین وە ئەهدافە سیاسیەکانێ لازمە هەمویشە بەدەنەی ئەو جەریانە و لە مەرهەڵەێ ئەوەڵ ڕابەری ئەو جەریانە بتوانن لە یەک ڕاستا فەئالیەتەکان خوەێان قەرار بیەن کە خود سازمانەکە دوچار گرفت و چاڵش نەوت، بەڵکە منافەێ کومەڵگەێک کە ئەڕاێ خەبات کریەت هەمویشە لە سازمانەکە و لەفەرد فرەتر لەئەولەویەت بوت تا فرەتر مەورد اتماد و اتمینان بوت، کە ئیە توانێ لە دەراز مودەت بێشتر هەرسازمان یا حزبێک سیاسی لە ڕەسین وە ئەهدافەکانێ نزیکتر و موتمەئنتروە بکەێ.

سازمان دموکراتیک یارسان کە خاون بەرنامە و ئەهداف سیاسی موشەخەسە لەی یەک دو ساڵ وەرین وە تەڵاش شورای مەرکەزیەکەێ و وەتاێوەت ڕابەری هاوبەش ئی سازمانە، تەڵاشیێ ئیە بیەس کە ئی سازمانە هەرچێ فرەترە نەهادینە بکریەت و تەمام کومسیون و کومیتەکانێ فرە ئازادانە بتوانن کار و فەئالیەت بکەن و وەڕوشگەل دموکراتیک ومودرن و جەهان شمول لە تەمام تەسمیمگیریەکان هەم دەخالەت بکەن هەمیچ خاون دەنگ و رەئێ مساوی بون تا بتوانێ بەدەنەێ سازمانی و تەشکیلاتی خوەێ وەگەرد بەرنامەێ سیاسی خوەێ گرێ بێەێت تا بتوانێ  متودگەل تازە و دموکراتیک بکەێتە مبناێ ڕەوش کاری خوەێ کە تا ئیسە ئی جور متودێک نەتیجە بەخش بیەس .

پەس نەتیجەتەن سیاسەت و ڕەفتارسیاسی لە شێوەگەل موهم و حەساس سازمانیە، کە مەرزگەل ڕەفتاری هەر فەرد،ڕەوابت ومئامڵات ڕوشن وەکەێت. بدون سیاسەت هویچ قانونێک سابت وجود نەێری و ئەڕا پێش چین هەر سازمان یا حزب سیاسی مودیریەت سیاسی لە شێوەگەل موهم و تاسیردانەرە.

مەنسور جەوانمیری

٢٠٢٠.١٠.٢٥

[wpforms id=”4110″ title=”true”]

 

 

بازدیدها: 233