رۆژ جەهانی کارگەر نەماد مبارزەی کارگەرەیل ئەڕا رەسین وە ژیان خاستر و ئنسانیە!

یارسان مدیا
2026-08-22

ئی رۆژە رۆژ گشت ژنەیل و پاگەیل کارگەرە و دەرفەتێگ ئەڕا پەیوەندی و یەکیەتی ، لە لایگیشەو بەرز کردن دەنگ ناڕزایەتی دژ وە نابەرابەری و بی ئداڵەتیەکانە کە لە جەهان حاکمە.

رژیم ئسلامی ئێران لە ری تاڵان کردن سەرمایەی نەتەوەیی، وە گشت شێوەیگ هێرش کردگەسە سەر چین کارگەر و کەمەر ئەڕا لە ناو بردن ئی چینە بەستگە.

سیستم حاکم ئیسەیی وە شێوەیل جیاواز وەجور دابیین کردن کەمترین حەقدەس، ژیانێگ ناڵەبار ئەڕا کۆمەڵگە هاوردیەسە ئارا کە لە چەو تەوەڕم راسەکانی، فاسلەی نجومی دێری. بوجەگەل کەڵان ئەڕا ئلیت حاکم و کەمترین حەقدەس ئەڕا  باقی خەڵک،سیاسەت یەک بام دو هەوای رژیم حاکم لەبارەی خەڵک، بیەسە بایس نائەمنی شوقلێ، قەرادادەیل وەختی، سیاسەت خسوسی سازی و ئخراج وەرفراوان کارگەرەیل کە ئی رەوشە فشارەیل چەندبەرابەر خستگەسە سەر چین کارگەر . ئیە لە حالێگاس کە کاروەدەسەیل رژیم و ئلیت حاکم وەگەرد خانەوادەگانێان لە گشت جور سروەت و رفاه کۆمەڵگە بەرخوردارن و لە دەسرەنج و زامەت چین کارگەر رۆژ لە شوون رۆژ بەش فرەترێگ بەن.

ئی فشارە لە سەر چین کارگەر وەگشتی و وەتایوەتی کۆمەلگەی یارسان تاسیر جوبران ناپەزیر دێریت. چین کارگەر یارسانی ئەڕا سادەترین و کەم دەرامەدترین شوقلەکان، مەجورن لە هەفت خوان روسەم بوگزەرن و  چەندین فیلتر ئەمنیەتی لە رەنگ مافیایی و سەرمایەداری کە دژ چین کەم دەسن لە پشت سەر بنەن. جوانەیل کارگەر یارسانی ناچارن دیار ئەجدادی و میلکان خوەیان وەجێ بیلن و کوچ بکەن ئەڕا ئوستانەیل مەرکەزی تا شایەد بتوانن وە هوویەتێگ جەئلی کاریگ ئەڕا دابین کردن بژێوەی ژیانێان وەدەس بارن.

ئی شێوازە لە ئەمەڵکرد حاکمیەت، سیاسەتێگە ئەڕا لە یەک‌پاشین جوانەیل لە ئوستانەیل حاشیە و تێکەڵ کردن باوەرمەندیل جیاواز لە کۆمەڵگەی موسەڵمان حاکم ، کە لە راسیا شێوازیگە لە جەنگ نەرمە.

رژیم تاڵانکەر ئسلامی وە ئەنقەس ناوچەیل کوردنشین لە هەرجور ئمکاناتێگ وە جور دابین کردن شرکەتەیل سەنعەتی بێ بەش کردیە تا چین جوان لاواز بکەید و خوەی وە خێاڵ ئازاد وە زوڵم و بێ عداڵەتیەگانێ ئدامە بێەد.

لە ساڵی کە گوزەریا چەندیب مانگردن دریژخاێان کارگەرەیل پرۆژەیی و پەیمانی رەقەم خوارد. لەی راستا، رژیم وەجور ساڵەیل وەرین ئەڕا خەفە کردن دەنگ کارگەر و جمشتەیل ناڕزایەتی، وادەیل دویر لەراسی دا و وەداخەوە لە شوون تویچانن حەڵقەی مانگردن کارەگەریل هویچ وادەیگ  جی‌وەجی نەکریا.

لەی رەوش ئیسەییە تەوەرم بەرز و حەقدەسەیل کەم و وەدویا کەفتگ، کە چەندین مانگ لازمە کارگەرەیل ئەڕای مبارزە بکەن ، ژیان چین کارگەر وەرەو نابودی بەید. ئاشکارە کە ئدامە داشتن ئی رەوەندە چین کارگەر و خانەوادەکانێان رۆژ لە شوون رۆژ وەرەو لە ناوچیین بەید، ئی سیاسەتەیل ناکارامەد رژیم حاکمە لە ئێران ژیان میلونان کەس لە مەردم بن‌دەس و کارگەر وەرەو فەقر موتلەق بەید.

رۆژ کارگەر توانێد سومبلێگ بوت ئەڕا تاکید لە سەر داخواز سەرانسەری کارگەرەیل و دەرفەتێگ ئەڕا داخوازەیل بێجواو ئەوان.

سازمان دمکراتیک یارسان سەربار بمارک بایی یەک مای رۆژ جەهانی کارگەر لە گشت کارگەرەیل جەهان، ئەڕا کوتاهی هاتن وە ئی بەڕبەڕیەتە هاودەنگی خوەی ورگەرد گشت حەقخوازەیل جەهان ئێلام کەید و داوا لە گشت حزب و لایەینەیل سیاسی کەید وە یەکیەتیەو دەنگ چین کاگەر بون .

مەئیشەت و حقوق بەرابەر ، حەق موسەلەم هەرشەخسێکە لە دونیا!

شەورای ناوەندی سازمان دموکراتیک یارسان

بازدیدها: 114