Home / بیانیە کوردی / سازمان دموکراتیک یارسان ساڵڕوژ ژنوساید ئیزەدیەکان وە یاد تێرێ!

سازمان دموکراتیک یارسان ساڵڕوژ ژنوساید ئیزەدیەکان وە یاد تێرێ!

یارسانمدیا

٣ ئوت ٢٠٢٢ ز

 

 

ئیزەدیەکان جور پێکهاتەێک کورد وە درێژایی تاریخ لە ناوچەێ شەنگاڵ (شنگال)  زنگانی کەن و خاون دین و باوەڕ غەێر ئسلامین وەخاتر فکر و باوەڕ دینییان و کورد بوینێان زیاتر لە هەفتا جار ( وە قەوڵ خوێان) لە لاێەن گروگەل تونڕەو ئسلامیوە وە شکڵگەل جوراوجور کەفتنەسە وەر تونوتێژی، هەڕەشە، بێڕێزی و فرەجار کۆمەڵکوش کریانە.

هەڵبەت کورد خوەێچێ فرە جار لە ژێر کاریگەری و تاسیر دین ئسلام چیەسە جەنگ وەگەرد کەمینە ئاینیەکان جور زەردەشتی، یارسانی و ئیزەدی.

کۆمەڵکوشی ئیزدیەکان لە سەردەم بەدرخان و میرنشین سۆران نمونەگەل وەرچەون لە ژێر کاریگەری خراو ئاین لە سەر تاک و سەرکردە میرەکان کورد.

هەر لە ژێر هەمان هزر و باوەڕ دینی و شەرئیەت دان وە کردەوەکان خوەێان وە هاوردن و ئستفادە کردن لە سورەگەل قورئان، گرو تروریستی و تونڕەو ئسلامی داعش ٨ ساڵ وەرلە ئیسە لە ساڵ ۲۰۱۴ مەردم ئیزەدی لە ناوچەێ شنگال وە دڕندانەتەرین شێوە کۆمەڵکوش و ژنوساید کریان و سەدان مناڵ، ژن و پیاگێان بێ بەزەیانە و تەنیا وەخاتر ئسلام نەوینێان سەربڕیان. کردەوەگەل گرو داعش ئەوقەرە خەشن و ترسناک بوین کە تمام دونیا شوکە کرد. لازمە ئشارە بکریەت کە لە وەخت حەمڵەی داعش ئەڕا سەر شنگال، ناوچەی شنگال لە ژێر دەسەڵات و وەڕێوەبەری حکومەت هەرێم کوردستان و لە ژێر کونتروڵ پێشمەرگەوە بوی، وەلێ لە وەخت حەمڵەی داعش وە سەر شنگال موتەسفانە پێشمەرگە نەک هەر هویچ بەرگری و دفاعێک لە مەردم ئیزەدی و ناوچەی شنگال نەکرد، بەڵکە بێ هویچ وەرگری، موبارزە و دفاعێک، مردم ئیزەدی و شنگال هیشتنە جێ کە بویە بایس کوشیان و بێ سەر و شون بوین هەزاران کەس لە مەردم ئیزەدی لە شنگال.

تا ئەورەێ خود ئیزەدیەکان بەێان کردنە ،ئەوان ئەڕا دفاع لە خوەێان لە حزب و لایەنە کوردیەکان خاون دەسەڵات و پێشمەرگە داواێ چەک کردوین، وەلێ متاسفانە وەخاتر معامڵەگەل سیاسی پشت پردە لاێەنگەل موشەخەس کورد، ئەوان بوینە قوربانی معامڵەگەل ناوچەیی و ئقلیمی. وەداخوە لە وەخت کۆمەڵکوش کردن ئیزەدیەکان هویچ وڵاتێک، بانگخواز و مەلاێک ئسلامی وە حزبگەل کوردی ئسلامیچ ئەو کردەوەێ گروە ئسلامی داعشە مەحکوم نەکردن و بگرە فرەێان وە پاێ شەرع ئسلام و پاساو دان، کردەوەکان داعش وە ڕەوا زانستن.

مەسەڵەێک کە فرە جێ داخە ئیە بی کە لە وەخت ژنوساید ئیزەدیەکان کە لە کوردستان عراق و لە ژێر سایەی حکومەت هەریم ڕوی دا وەخاتر ڕێز گردن و حورمەت ئەو هەمکە ژن و دویەت ئیزەدیە کە جور کەنیز فروشیانە وڵاتگەلتر ئسلامی لە مەنتەقە و ئەو هەمکە ئنسانە کە وە دڕندانەتەرین شێوە کوشیان، نە پارلەمان کوردستان داخریا و نە یەک پارلمانتار ئستعفا دا و و نە یەک کاناڵ کوردی بویە دەنگ ڕاسەقینەی ئیزەدیەکان و نە خوەێ نیشان دان و ناڕەزایەتیک خریا ڕێ زد وە ئەو کردەوە لە کوردستان عراق. هەڵبەت نەقش گریلاگەل سەر وە پارت کارگەرەیل کوردستان پەکەکە لە دفا کردن و نجات دان سەدان کەس لە مەردم ئیزەدی شنگال ناوت نادیدە بگیریەت کە بویە بایس ئەوەێ فورسەتێک پێش بارن کە خود مەردم ئیزەدیچ شان وە شان گریلاکان زد وە داعش بجەنگن و نەیشتن داعش فرەتر پێشڕەوی بکەێ.

مردم کاکەییچ جور پێکهاتەێکی تر کورد و غەێر ئسلامی ئەوانیچ سەدان کەسێان لە لاێەن گرو تونڕەو ئسلامی داعش وەخاتر باوەڕ دینی ،مەرام و فکر جیاواز  بێ سەر و شون کریانە و کوشیانەس. هەر وەیخاترە کاکەیەکان وەخاتر پارێزین ماڵ و گیان خوەێان لە شەڕ داعش و گروگەلتر ئسلامی تونڕەوە مەجبور وە تەرک فرە لە جێ، مکان و مناتق خوەێان کریانە.

 

سازمان دموکراتیک یارسان کە خاون بەرنامە و ئەهداف سیاسیە و ئەڕا ئازادی، دموکراسی و برقەراری حکومەتێک سکولار دموکراتیک لە ئێران موبارزە کەیت، باوەڕ دێرێ کە سازمانگەل حقوق بەشەری و ناونەتەوەیی لازمە کۆمەڵکوشی ئیزەدیەکان جور ژنوساید بناسێنن و ناوچەێ شنگال و ناوچەگەلێک کە کاکەیەکان لە تێ ژیەن، لە ژێر چەودێری و پارێزین نەتەوە یەکگردگەکان بوت تا جارێکتر مەردم شنگال و کاکەی نەونە قوربانی دەس گروگەل تونڕەو ئسلامی و سیاسەتگەل پشت پردە هێز و لاێەنەکان لە عراق.

 سازمان دموکراتیک یارسان یەکجارتر سەر ڕێز و نوازش دانەێ ئەڕا تەمام قوربانیگەل مەردم ئیزەدی.

سازمان دموکراتیک یارسان

شەوراێ مەرکەزی

٣ ئوت ٢٠٢٢ ز

 

 

بازدیدها: 73