Home / پانل آزاد / گوفتمان ڕابەرەیل بێکاریگەر لە وەرانوەر گوفتمان ڕادیکاڵ شووڕشگەرەیل  کەف خەیاوان

گوفتمان ڕابەرەیل بێکاریگەر لە وەرانوەر گوفتمان ڕادیکاڵ شووڕشگەرەیل  کەف خەیاوان

یارسان مدیا
‏21‏.11‏.2022

 

ن.حشمەت خوسرەوی

ستوکهوڵم

ڕابەرەیل کاریزماتیک و بیکاریگەر  حزبەیل  سیاسی ڕووژڵات کوردسان نەک هیچ قسەیگ ئەڕا خەڵک نەیرن، بەڵکەم وە پەیامەیل قەیر ڕیالیستی خوەیان تەقەلا کەن ک کاریگەری گەن لە سەر شووڕشگەرەیل و ئازادیخوازەیل  بێ پشت و پەنا لە کەف خەیاوانەکان دابنەن. زوورم ڕابەرەیل ئردووگانشین، 44 ساڵە خەو وە وەرگرتن دوو وەزیر و چەن ئوستاندار لە تەێران دوینن و ئەلانیش تەقەلا کەن ک وە  زوانێک قەیر عەقڵانی، ترمز خەیاوان بکیشنووە یا سوونامی سیاسی و مەدەنی جەوانەیل دژ وە نزام ئسڵامی ئێران خەمسارد بکەنوە. ئەو کەسەیلە داوا لە جەوانەکان کەن ک خوەیان لە تون و تیژی دوویر بگرن، ئەگەینا ڕەژبم دەس دەیتە قەتڵ و عام شوورشگەرەیل ناو خەیاوان و تەنانەت کەسەیل بێ تەفاوەتیش. گفتمانێگ لەیوا نەک هیچ سازگاریێگ وەل تایوەتمەندیەیل خەیاوان نەیرێت، بەڵکەم لە بنج و بناوانوە، ریتوریکێک فرە خام و بێ مایەس، چوویکە ئەوە ڕەژیمە ک لە هیچ تاوانێک دژ وە ئازادیخوازەیل دەس ناپارێزێت.، نەک بەیداخهەڵگرەیل ئاخێز مەدەنی لە ناو وڵات.ئەوە ڕەژیم و جیرەخوەرەکانیە ک تەنانەت لە وەرچەو جەمگەی جەهانییوە مناڵەیل بێبەش کوردسان و ئقلیم یارسان دەنە وەر تەقە و کوشنەیان و جەهانیش چەو خوەی لە وەرانوەر ئی تاوانەیل دژ ئنسانییە نویقانیەس.

لە لایێک تروە، ڕابەرە بێکاریگەرەکان وە شکڵێک جێ گوومان توان وە ریتوریک لاواز خوەیان کاریگەری مەنفی لە سەر خەیاوان دابنەن، وەلێ ئیمە دوینیمن ک سەحنە ( مەرکەز یارسان), سنە( پایتەخت مقاومەت خەیاوان) ، مەهاباد و بووکان (شووڕشگەر) ، کامیاران و دیواندەرە( پشتیوان خەیاوان)، نزیک وە دوو مانگە پاوەگەزدانێک شکوومەندانە دژ وە ڕەژیم داگیرکەر و فاشیست تەێران دەسوەپێکردنەس. ئیەیچە مانای ئەوەسە ک خەیاوان و ڕابەرەکانێ دی جواو ڕابەرە ئردووگانشینەکان لە (کویە و زرگوێز )نایەنوە، چویکە دی زوانێگ هاوبەش لە بەین ئی دوو جەریان فکرییە یانێ خەیاوان و ئەوان وجوود نەیرێت. تاریخ شایەتی دەیت ک ڕەژیم تروریستی، توتالیتەر و تئوکرات جمهووریی ئسڵامی لە ماوەی ۴۴ ساڵ وەرین و مەخسوسەن لە جەریان ئاخێز ئنقڵابی خەڵقەیل ناسیاگ وە ” جمشت ژینا”، لە هیچ تاوانێک دژ وە شووڕشگەرەیل و ئازادیخوازەیل دەس نەپارێزاس. لە گێشتی وەرچەوتر ئەوەسە ک ڕەژیم لە تەێران دژ وە موخاڵفەکانێ باتوم ئسفادە کەیت، وەلێ لە کوردسان و ئقلیم یارسان بەرزترین ئاست خشونەت(تفەنگ و گولە) بەیتە کار. لە بار فرموڵ سیاسیوە فامین ئی دوگانەگی سیاسییە کار سەختێک نیە. وە قەوڵ کوڕ یەکیک وە گیانبەختکردگەل بووکان، ڕەژیم جمهووریی ئسڵامی لە تەێران فاشیستە، وەلێ لە کوردسان داگیرکەرە.

ڕابەرە بیکاریگەرەکان!

ئیوە لەیاقەت ئەوە نەیرین ک نووسخەی سیاسی ئەڕا خەیاوان بپێچین ، وەختێک خوەتان و مناڵەکانتان پاسپوورت وڵاتەیل قەربی ها لە گیرفانتانا؟

ئیوە کەی هاین لە خەم ئەو مناڵ ۱۲ ساڵە لە مەهاباد ک هاوار کەیت:

“بابە فریام کەوە، بابە فریام کەوە با لێرە بڕوین”؟

ڕابەرە بێکاریگەرەکان!

گفتمان  مامووساگەیل ئایینی لە مەریوان و هەورامان فرە ڕادیکاڵترە لە پەیام و گفتمان سیاسی ئیوە.

هەر ئەلان ( مەهاباد) و (سنە) ها لە وەردەم وەچەکووشی یا جینووساید و دەیان کەس وە یاران جەمگەی یارسان لە زندان (دێزڵ ئاباد ) کرماشان دەسوەسەرن،  وەلێ ئیوە ک لەیاقەت شکوو مەردم مەهاباد و سنە و کرماشان نەیرین ، ئەڕا تواین جمهووریی ئسڵامی وە بێدەنگی مەردم ئی شارەیلە خەڵتان وە خوین بکەیت ؟

ئیوە کیین ک بتوانین خەت و نیشان ئەڕا شووڕشگەرەیل و ئازادیخوازەیل ناو خەیوان بکیشین؟

مەیەر ئیوە نازانین ک فرە وەختە تاریخ مەسرەف سیاسیتان وە سەر چیەس؟

مەیەر ئیوە خوەتان نازانین ک ئیوەیچ بەشێک لە ڕابەرەیل کاریزماتیک و شکستخواردگ  دوو دەیەی ئاخر قەڕن بیستم و  ئەوەلەیل قەرن بیست و یەکمن ک دی  هەڵگر تایوەتمەندی و کودەیل رابەرێگ سەرکەفتگ نیەین؟

ڕابەرە بێکاریگەرەکان!

گیانلەوەرەکانیش لە وەرانوەر دڕندەیی ئایەمەکان دژ وە وەچکەکانیان مقاومەت کەن، پەس چ جوورییە ک مقاومەت خەیاوان ئەڕا پاراستن ئزەت نەفس و کەرامەت خوەیان چووتە قاڵب تون و تیژی؟؟؟؟؟؟

 

باوک ئەو مناڵە لە مەهاباد ک لە ترس دڕندەیی نێروگەیل ڕەژیم، هاوار و قیژەی دەنگێ گووش فەڵەک کەڕ کەیت چە بکەیت ؟ وە قیمەت گیان خوەی پارێزگاری لە گیان مناڵەکەی و شکوو نیشتمان بکەیت یا جوور ئیوە خوەی بچەمنێت؟

ڕابەرە بێکارریگەرەکان!

چە وە سەر « ڕاسان»  هات؟ خو ئیوە قەوڵ بی موبارزەی شاخ و شار وەل یەکاخ گرێ بیەین؟

ئیوە بایەس جارێگ ئەڕا هەموویشە دەرس لە تاریخ وەربگرین و بزانین ک نەسڵ دەیەگەیل ٧٠ و ٨٠ ی خورەتاویی فرە لەر ئیوە ڕادیکاڵتر و سیاسی ترن. ئیوە بایەس بزانین ک ئەوە ژنەیلن ک بینەس وە پێشقەیەم جمشت ” ژینا” ،نەک ڕابەرەیل بێکاریگەر و کاریزماتیک. ئیوە لەیاقەت ڕابەریی رووژڵات کوردسان و ئقلیم یارسان نەیرین، بەڵکەم ئەو ژنەیل و جەوانەیلن ک ئیمڕووژ  بینەس  وە ڕابەر خەیاوان و فەراتر لە زامەیل سەر ئەنام نیشتمان، وە مەدەنی ترین شێوە پاوەگەزدان کەن.

لە ئاخروە، خاستر ئەوەسە ک لەوە فرەتر وە قسەگەل بێ بنەوا و قەیر عەقڵانیتان و جوور باوک ڕووحی نوسخەی سیاسی ئەڕا خەیاوان مەپێچن، چویکە ئەوان لە شوون نەمان نزام وڵایەت فەقیە، وەل ئیوەیچا تەسفیە حەساو خوەیان کەن. ئیوە لەیاقەت ڕابەریەت خەڵق کورد نەیرین و لە نەوین قاسملووکان، مسەفا سولتانییەکان، سدیق کەمانگەرەکان و شێخ ئزدەینەکانە ک ئیوە ئیسە ناو خوەتان ناینەسە ڕابەر سیاسی. وە نسبەت ئقلیم یارسانیش ئیمە خوەمان ڕەهبەرەیل فرەیک دێریمن ک لە ئیوە زاناتر و کاریگەرترن، کەواتە نە خەیاوان ڕووژهەڵات هەوەجە وە ڕابەرەیلێگ بێکاریگەر جوور ئیوە دێرێت و نە ئقلیم یارسانیش هەوەجە وە ڕابەر سەفارشی ، قەیر بوومی،ناوچەگەرا و سوونەتی دێرێت.

 

Visits: 39