یارسانمدیا
‏2026‏/01‏/06

نویسندە: منسور جوانمیری

تهمت، افترا و تەخریب یەکتر تاکەێ

لە حاڵێکا ڕەژیم مەنفور، فاسد و زد ئنسانی و ئازادی جمهوری اسلامی ئێران ئاخرین نەفەسەکان خوەێ سپەری کەێ و مەردم شەریف، ئازادیخواز و شجاع ئێران هانە مەێدان موبارزە و دێرن و ڕوژانە دەێان قوروانی دەن و لە تەرەف جناێەتکاران و دارودەسەێ خامنەیی دیکتاتور وە گولەێ موستەقیم گیانێان سێنن، وەتاێوەت ئیسە کرمانشاە، ئیلام و لوڕسان فرەترین کەسێا گیانێان ئەڕا ئازادی و ژیانێک ئنسانی و عداڵەت اجتماعی بەخت کردنەس ئەما لەی ڕوژگەلا کە مردم احتیاج وە پشتیبانی و اتحاد و یەکڕێزی دێرن، وەلێ دوینیم لە فەزاێ مەجازی و سوسیاڵ مدیا نە فەقەت وەل سەرکوب حکومەتی ڕویوە ڕویمن، بەڵکە دیریم وە شێوەێ جوراوجور سەرکوب تەجروبە کەیم.

هەزف، تەخریب، بەرچەسب داین و تومەتبارکردن یەکتر.

ئەڕا نمونە لە سوسیاڵ مدیا و دونیاێ مەجازی  ئەفراد فرەێک کە فرەێان تەرەفدارجەریان وە یا لایەنگەل موشەخەس سیاسین ئەگەر شکڵ اتراز و ناڕەزاێەتی جور ئەو یا ئەوان نەوت، سەرزەنش، تەهدید یا موتەهم کریەیت.

چما اترازیچ باێەد لە یە الگو یا لە تەرەف جەریان یا شەخس خاسێک تەئید بکریەت تا ڕەوا و ڕێپێدریاگ و قەبول بوت.

وە ئیەیچە دەقیق هەمان ئەو سەرکوت و سەرکوبەسە فەقەت وە زوانێک جیاواز و وە شێوەێک متەفاوت.

ئیمە لازمە فێر بویمن کە توانیم موخاڵف بویمن و جور یەک فکر نەکەیم وەلێ وەیمانا نیە دوژمن یەکیم.

هویچ ئایندەێک وە خەفە کردن و ساکت کردن دەنگەلتر جیاواز دروس ناوت و نەتیجەێ خراو دێرێ لە ئایندە لە سەر جامعە.

حەقیقەت تەنیا چشتێک کە ئیسە لەی شەراێەتا  مردم وە تمام وجود هانە مەێدان ئەڕا سەرنگونی ڕ ج ا ا موهم و زەرورە ئتحاد و یەکڕێزیە. ئتحاد نە وەماناێ جوور یەک بویین بەڵکە لە کنار یەکتر بویین سەرەڕاێ تەفاوەت و جیاوازیە فکری و ئەقیدەکان.

متاسفانە ڕوژانە دوینیم کە یەکی تهمت سلطنت طلبی دەێتە پاڵ ئەوەێتر، ئەوەێتر وە چەپی و مجاهد تومەتبار کریەت و یەکیتر وە نفوزی جمهوری اسلامی و تەرەفدار آخون.  مخالفت وەل سەلتەنەت تەڵەب وەماناێ تەرەفداراری و هماێەت لە جمهوری اسلامی نیە و مخاڵفەت وەل جمهوری اسلامی وەماناێ قەبول دیکتاتورێکتر نیە.

دوژمن ئیمە مەردم نیە، ئەقیدە و باوەڕ جیاواز و متەفاوت نیە، دوژمن ئیمە یەک ساختار سەرکوبگرە کە وە ناو دین قودرەت قورخ کردگە و ژیان ، کرامەت، ئایندە و شادی لە مەردم ئێران وە گرەوگان گردگەس.

ئیمڕوژ تەنیا یەک دوژمن وجود دێرێ:

دیکتاتوری.

چوی مەزهەبی، چوی سەلتەنەتی چوی نزامی وە یا چوی چەپی لە هەرکورە بوت و لە ژێر هەرناوێکتر. ڕێ دروس ئەڕا سازین سوو و ئایندەێ ڕوشن و بێ زوڵم و ستەم و خەفەگان، وە  اترام، ئاگایی، هاوگامی و هامیاری یەکتر و قەبول کردن جیاوازیەکان سەقام گرێ.

مەرگ و نەمان ئەڕا دیکتاتور

بەرقەرار بوت ئازادی و عداڵەت اجتماعی.

محتوای مقاله صرفاً منعکس کننده دیدگاه های نویسنده است و یارسانمدیا هیچ مسئولیتی در قبال آن ندارد.

بازدیدها: 1307