تروور حکومەتیی دو چالاک فەرهەنگی و ئجتمایی جەمگەی یارسان

یارسانمدیا
٣٠ می ٢٠٢٦

تروور حکومەتیی دو چالاک فەرهەنگی و ئجتمایی جەمگەی یارسان

وە ئەو پەڕ خەم و ئاخینەو، خەوەر تروور حکومەتیی دو جەوان یارسانی وە ناوگەل مەیسەم” و “موجتەبا وەیسی” خەڵک کرماشان، جارێ ترەک ڕویمەت ستەمکار و تروورسیست و کەڵەکباز جمهووری ئسلامی ئێران ئاشکرا کرد. ڕژیمێگ کە دەیان ساڵە بیەسە دەلیل بنەڕەتی کوشتن، زوڵم، تروور، نەداری، دوچەوەکی و لەناوبردن کەرامەت ئنسانیی مەردم ئێران.

مەیسەم و موجتەبا وەیسی دوو جەوان ڕووشنویر و ئاگای یارسانی بوین کە ژیان خوەیان سەرف مەردمەکەیان و فەرهەنگ ئازادی کردن. خوین ئەوان یەکی ترەک لە تاوانەیل سیستماتیک دەسڵاتە کە هەر جوور دەنگێ ئازاد و سەروەخوەی وە هەڕەشەیک ئەڕا سەر ماناوەی خوەی زانێت.

ئیمڕووژە وەزیفەی مەردم یارسان و گشت ئازادیخوازەکانە کە وە وریایی فرەتر هەڵسوبنیش بکەن. ساڵگەلێکە جمهووری ئسلامی لە ڕێ تووڕ و جەلەسە و جەریانگەل وە ڕواڵەت فەرهەنگی، کوومەڵایەتی یان سیاسی، چالاکیگەل موستەقڵ و جەوانگەل ناڕازی شناسایی کەن و لەناویان بەیت. فرەیگ لەو جەریانگەلە وە ئاگایی یان نا ئاگایی بینەسە وەسیلەی پرووژەی ئەمنیەتی ڕەژیم.

هاوەخت ماشین تەبلیقاتیی ڕژیم و بڕێگ دەزگا و خەوەرڕەسانی گوماناوی تەقالا کەن ڕوایەتگەل چەواشەکارانە و یەک لایەنە لەباوەت هویەت کوشیاگەکان و مەفووم تاریخی یارسان / گووران ڕویماڵ بکەن. ئەوان هەوڵ دەن یارسان/ گووران  تەنیا جوور مەزهەبێک یان گرووپێک وەرتەسک نیشان بێیەن، لە وەختێکا یارسان/ گووران هویەت تاریخی، فەرهەنگی و ئجتمایی فراوانێکە کە نەتەوە و گرووپگەل جیاواز لە خوەی گرێت.

ئی ڕویداوە هوشیاریک جدییە ئەڕا جەمگەی یارسان و بایەد بزانیم وەگەرد چ جەریان و کەسانێک هاوکاری کەیم و چ جوورە ئامانجێگ لە پشت شوئار وە ڕواڵەت مەدەنی و فەرهەنگی قایم کریاگەس. هەر جەریانێگ، مەردم لە مەسیر ئازادی، هەقیقەت و هەویەت موستەقڵ یارسان دویر بخەیتوە، لە ئاخرا خزمەت وە مانەوەی ساختار سەرکوت کەیت.

یاد و ناو مەیسەم و موجتەبا وەیسی لە هویرمان مەردم یارسان مینێت. خوینیان ناود بووتە دەلیل ترس و بێدەنگی. بەڵکەم بایەد بووتە مایەی ئاگایی، یەکڕزی و ئدامەی مبارزە ئەڕا ئازادی و  دادپەروەری.

سەرسڵامەتی لە بنەماڵەی وەیسی و جەمگەی فەرهەنگیی یارسان کەیم. ڕێ ئازادی، دادپەروەری و کرامەت ئنسانی وەردەوام بووت.

بازدیدها: 283