Home / بشیر امیرخانی / نامەێکی دوستانە ئەڕا کاکە سارو خوسرەوی

نامەێکی دوستانە ئەڕا کاکە سارو خوسرەوی

بەشیر: ڕێزدار کاکە سارو ئەزیز من فرە جار قەوڵ دامەسە خوەم کە لە ئی جور نویسانێک، یان جواو دانێک پارێز بکەم، وەڵێ ڕەفیق جاروبار وژدان ئنسان جویلیەت و ناتوانی لە وەرانوەر ڕویداگەکان بێ تەفاوت بوو.

کاکە سارو گیان من نویسراوەێک لە سەرکار دیم لە ژێر ناو
چالاکەیل سیاسی و مەدەنی یارسان و ئەرکان ئایین یاری

هەر لە ئەوڵ نویسراوەکەت خوازیار بیتە کەچالەکەیل یارسان وەرجە هەرچشتێک بایەد ئەرکان دین یاری وە جێ بارن، ئەو وەختە بتوانن خەزمەت کار بوون یان جێ باوەڕ بون!. کاکە گیان تەمام ئەفراد یارسانی چ چالاک و چ ناچالاک بەشەرن و لە کۆمەڵگاێ بەشەری گەورە بینە، هویچکامێان لە کورەێ مریخوە نەهاتنە کە وەل باقی کۆمەڵگاێ بەشەریەت فەرق داشوتون. هەرکام لەی ئنسانگەلە کە چالاکن ل دید خوەێانوە دێرن وە شێوەێکی موسبەت کار ئەڕا کۆمەڵگاکەێان کەن، ممکنە لە دیدگاێ من و جنابتوە موسبەت یا کاریگەر نەوت، وەڵێ هەر ئەوێک جور باقی ناچالاکەکان لە ماڵ خوەێان دانانیشێن و بێ تەفاوت نیەن خوەێ موسبەتە. ئیمە ئەگەر قەرار بیاتا گشتمان سوڵتان سەهاک و پیربنیامین بیاتایم، دیتر کۆمەڵگاکەمان موشکڵ نەێاشت. کۆمەڵگاێ ئیمە کۆمەڵگاێکی ئاسمیلە کریاگە، سەدان ساڵە وە شێواز جوراوجور و ئیستایچ لە پاڵێ بووت، ئاسمیلە کریانە و کریەن و باوەڕ لە ڵێان سەنیاسوە،دی نەبایەد ئنتزار داشتویت چالاک یارسانی یەک شەوە بووتە پیر بنیامین. لە تەمام رێکخریاگە کوردیەکان و قەێر کوردیەکان تماشاە بکە، هەم خزمەتکار دیریم و دوینیمن و هەم ناخزمەتکار و ناپاک و هەر ئی جورە لە تەمام دونیا. براێ بەڕێز لە بەشێکتر لە نویسراوەکەت داوەزیتەسە سەر یەک سری ئەفراد بێ ناو، ئەما وە نا وچاڵآک یارسانی، ئەگەر خوەمان هەڵە نەکەیم و بویشیم یەک و یەک چەنێ کەێت زانیم بوتە دو٢، زانیم کە خاس یا خراو لە بوار یارسانی چاڵاکە، کە من خوەم وە هویر خوەم یکی لەو چاڵاکە یارسانیەیلەمە کە لە دید خوەموە دێرم خزمەت کەم، ممکنە لە دید سەرکاروە جورێکتر بووت.وە باوەڕم ئیمە هەرکامان توانیم بایم لە دیدێکی دوستانە،و دڵسوزانە، بێ ڵایەنانەو ڕخنەگرانە،بایم شیکاری لە کاروبار چآلاکی ڕێکخریاگ یارسانی بکەیم، بایم کەم و کوڕیەکان بخەیمە وەر چەو و لە هەمان وەخت کاریچ بکەیم ئەڕاێ، ئەما ئەگەر بایم لە دیدێکی بێ لاێانانە و تەنیا ئەڕا شکانن بڕێک ئەفراد و تەنیا نویسان بووت، باوەڕ دێرم هویچ لە مەسئەلەکە ناگوڕێ

لە بەشێکتر لە نویسانەکەت ویشی
فرە گرنگە هەر یارسانێگ کە باڵ هەڵ ماڵی و تێدە جەوڵانگای کار و چالاکی سیاسی کۆمەڵایەتی و فەرهەنگی ئەرا خزمەت وە مەردم یارسان، ئەوەڵ وە گەرد شەخس خوەی و لە شوونی وە گەرد مەردمەگەی رویڕاست بوود ، کڵاو نەنەیدە سەر مەردم ، شوئار دەی ئەمەڵ وەپێ بکەی ، لە کار و کردەوەی رۆژانەی وە گەرد دەوروەرەگەی شەفاف بوود، ئەما ئیمە دوینیم بەشێگ لە یارسانیەیل وە تایبەت چالاکەیل کۆمەڵگای یارسان چشتێ ویشن، بەڵام خوەیان باوەڕ وەپێ نەیرن و چەواشەکاری بیەسە بەشێگ لە کار و پیشەی رۆژانەیان، لە روی سەلیقەی شەخسی خوەیان مامەڵە وە گەرد رویداوەگان کەن و کارێگ کەن وە دروس کردن پەروەندەی دویر لە راسی و بێ بنەوا خەڵکەیل لە دنیا بێ خەوەر بکەنە لایەنگر خوەیان. یەک ئنسان ناتوانێ وە جارێگ یارسانی بوود و خوەی وە کورد رەسەن بزانێ ، بەڵام ژێروەژێر لایەنگری لە جەریانێگ بکەی کە نە باوەڕی وە مەسەلەی کوردە و نەیش زانێ یارسان چەس. ئەی کەسەیلە بایەد تەکلیف خوەیان لە کۆمەڵگای یارسان رۆشن بکەن. ئیمە لە وڵاتێگ جوور سوێد شاهد ئەوەیم کە کەسەیلێگ یارسانی ئایین کوردی یارسان کەنە وەسیلەێگ ئەڕا ئەوەیگە کوردایەتی وە مەردم بفرۆشن ، بەڵام زەمانێگ فۆرمێگ دەوڵەتی پڕ کەنەو لە بەش زوان داڵگی لە جیاتی ” کوردی، فارسی ” نویسن

براێ ئەزیز نازانم معیار خاسی و خراوی چوی دیاری کریەت?کی تەرازوی هەڵسەنگاندن خاسی و خراوی ها دەسێ?. بێ گومان هەرکەس کار بکەێت ئێرادێچ دێرێ، ئەگەر منیچ لە ماڵ خوەما دانیشیم و وەل دونیاێ دەیش خوەم بێ تەفاوت بووم، بێ گومان هەڵە ناکەم. ئیمە ئەرا بایەد هەمویشە تیشە لە ڕیشەێ خوەمان بیەیم؟. کاکە سارو سەدان ڕێخریاگ کوردی و فارسی و تورکی و عربی و قەێرە وە ناوگەل جوراوجور پویل لە وڵاتگەل اروپاە وە تایوەت سوئد سێنن، و قوروشێکیچێ لە خزمەت نەتەوە و کۆمەڵگاە نیە، ئیمە ئەڕا بایەد گیر بیەیمە ئی چەن کەسە کە لە وڵات سوئد دێرن وەشێوەێک کار فەرهەنگی کەن؟!.

ئەگەر من دێرم وە فارسی نویسم، تەخسیرم مەگەر، تەخسیر ئەو دەسەڵاتە و حکومەتە بگر کە وە زور زوان داڵکی لە من سەندگە، کاکە سارو فرە لە ڕەهبەران پ ک ک هەمراێ کوردی نازانن، وەڵی هەر وە زوان تورکی دێرن خزمەت وە نەتەوەێ کورد کەن. ئیمە با مەتە لە تەێ خاش خاش بەن نەکەیم، بایم وە دیدێکی ئاڵاوەتروە لە چشتەکە بنوڕیم،گشتمان ناتوانیم شاعر بیمن، گشتمان ناتوانیم نویسەر بیمن، وەڵێ هەر ئەوێک هەرکامان توزێک لە شون خوەمان جویلیەیم با پاێ ئەیچە لە بنا نەوڕێم، بجویڵێ لە نەجویلیانەکەێ خاسترە.

من هام وەڵ بەش فرەێک لە نویسراوەکەت کە بایەد تەحمول ڕخنە داشتویمن، بایەد هەوڵ بیەیم خاستر لە ئەوێک هەس کار بکەیم، وەڵی وەڵ ئەو بەشە کە لە ڕاسی سەرکونە کردن و خراو کردن یەکتری بووت نیەم. چویکە وە قەوڵ پێشەنان مار وە قسەێ خوەش لە کۆنا تێتە دەیشت. سەرکار توانی باید وە شێوازێکی متمەدنانە و ڕخنەگرانە من ئسڵاح بکەی، وەڵێ ئەگەر قەرار بووت ئەوڵ سەرکونەم بکەی، تانە وارانم بکەی، بەعدەن بویشی وەیجورە بکەیم دویر لە ئنساف ڕخنەگرانە و دڵسوزانەس. کاکە سارو ئەگەر قەرار بیاتا گشتمان نیکمرد و رەزەوی بیاتایم، ئەگەر گشتمان تیمور و ئوجەڵان بیاتایم،کۆمەڵگاە دی موشکل نەێاشت.

ئەگەر کۆمەلگاە بێ موشکل بوو، ئەگەر گشت چشتێک دروس و ڕێک و پێک بووت بوو، دی لازم وە من و سەرکاریچ نیە.

کاکە سارو سەرکار لە نەوروز تێ ڤێ کار کەی و نەورز تێ ڤێ ئەڕا خوەێ یەک پرەنسیب و شێواز کار خوەێ دێرێ، من لە دەیشت ئی تلویزیونوە ناتوانم بام خەت و نیشان ئەڕا سەرکار بکیشم و بویشم وەیجورە کار بکە، ممکنە لە دید منوە فرە کار نەوروز تێ ڤێ ئێراد داشتوت، وەڵێ لە دید سەرکاروە دروس بووت، توانم بام پێشنەهاد بێەم و بویشم ئەگەر وەیجورە بوو خاسە وەڵی ئنساف نیە بام تەمام زامەتەکان و کردارەکان نەوروز تێ ڤێ بوەمە ژێر پرسیار،و بویشم نەوروز تێ ڤێ لە کۆ پویل گرێ و چوی ئی پویلە وە دەس تێ و سەرکونەێ بکەم، بەد بام بویشم وەیجورە بکەن. پەس تەمام ڕێکخریاگەکان چ یارسانی و چ قەێر یارسانی وەیجورەسە، لە دەیشتوە ناتوانی خەت و نیشان ئەڕاێ بکیشی، من پێشنیار کەم کە سەرکار باڵ هەڵماڵ و بچوە ناو ڕێخریاگێکی یارسانی و لەورە ئاجندەکان خوەت کە وە دروس زانیتەێ کار ئەڕاێ بکە.هویچکام لە ئیمە فریشتە نیەیم و لە مەێدان فداکاریچ ئەگەر تاقی کریاویمنوە کۆمەڵگاە بڕیار دەێ کە کی تاقی بیەسوە و کی نەویەسوە، وە قەوڵ پێشەنان ئەتر خوەێ بایەد بۆو داشتوت، نە ئەر فروش تاریف لە ڵێ بکەێ.

من هام وەڵ بەش ئاخر نویسراوەکەت، وەتەمام مانا، وەڵێ وەتم شێواز ڕخنە گردن جیاوازە و من نوعی تماشاە کەم بزانم ڕخنەکان سەرکار وە چ هەدەفێک ڕویوەڕوی من کریاس، ئەگەر بزانم لە دیدێکی یارسانی و دڵسوزانە و ىی ڵاێەنانەس، وە دیدەێ منەت تماشاێ کەم، وەڵێ ئەگەر بزانم هەدەفت تەنیا خراو کردن بوو، پێشنەهادەکەت خاسیچ بوو، کار وە پێ ناکەم. کاکە سارو گیان، ئیمە زەمانێک دەس دایمە چالاکی یارسانی لە دەیشت وڵات کە فرە کەس خەنینێانهات، وەڵی وە دس خالی کارێ کردیم کە ئیستاء کۆمەڵگاێ کوردی کە تا دویەکە مونکڕ یارسان بین، زانن یارسان چەس، لە شون ٣٣ ساڵ هویچ حزبێکی کوردی تەنانەت پیروزبایی خاونکارێکیچ لە لیمان درێخ کردن، وەڵی وە همەت ئی دوستانە و کەسانێک لەی بوارە زامەت کیشانە یارسان بیەسە باس ڕوژ.ناو یارسان وە همەت ئی دوستانە چیەسە مقر سازمان ملل و ئتحادیە اروپاە. کەم کەس هەس ئیستاء نەزانێ یارسان چەس، یارسان بیەسە باس ڕوژ تڵویزیونەکان، پەس ئیە نەتیجەێ کار و چالاکی بڕێک ئەفرادە کە توانن هەلەیچ داشتون.

بشیر امیرخانی
بشیر امیرخانی

کاکە سارو گیان، تەمام حزبە سەرەکیەکان و پژاکیچوە وەڵ کوڕ شاە دیدارها داشتنە، ڕاوێژ کردنە وەڵێ تەنانەت حزبەکان خوەێانیچ لە ڵی بێ خوەر بیین!، وەڵێ ئیمە جور یارسانی دیدارێکی شەفافانە و ئاشکەرا وەڵ ئی برادەرە ئەنجام دایمن، هەر ئی دوستان خوەمانە کردنەسەێ شەویەکەێ ئوسمان ئەڕامان!. نە وەل ئتلائات برون مەرزی ئێران دانیشتیمە و نە وەل دەوڵەت سعودی، بەڵک وەل کەسێک دانیشتیمە کە ئێرانیە و هاوسەرنوشت من و سەرکارە ئەڕا ئایندەێ ئێران. موشکڵ ئیمە چشتێکترە، زەربول مەسئەڵێک هەس ویشێ دو برا بینە چینەسە پا ێ دار سێفێک، یەکیان چیەسە بان و خەریک سێف خواردن بیە، ئەوەکە نەتوانستەگە لە دارەکە بچوتە بان، دەس کردگەسە هاوار کردن، ڕویارێک هاتگە وەتگە برا ئەڕا هاوار کەی تویچ بچوە بان، ئەیچ وەتگە نە موشکڵ نیە تو فەقەت ئەوە ئەڕا من بارە خوار. ئی داستانە دروس تاک کۆمەڵگاێ ئیمەس، تعدادێک لە سەر گیرفان خوەێان،بێ هویچ پشت و پەناێکی دەرەکی دێرن خزمەت کەن، ئەما من کە ناتوانم هویچ هەنگاوێک هەڵگرم ویشم با ئەوابیچ بانە خوار.
براێ ئەزیز کاکە سارو گیان با ئەوانەک توزێک ئمکان کار کردن دێرن ئەویچ لە ڵێان نەسێنیم، وە یارێان ناویم وە خارێانیچ نەویمن، قەوڵ شەرەف دەمەپید خراو خراوەکەێان خراوی یارسان ناتواێ و هوەڵ دەێ خزمەت وە یارسان بکەێ، توانێ هەلەیچ بکەێ کە هەڵەکەێ توانیم وە شێوازێکی دوستانە و یارسانیانە چارەسەر بکەیم.باوەڕ دێرم سازمان دمکراتیک یارسان توانێ لەوێک هەس خاستر و کاراتر وە بۆو وە همەت گشتمان، چویکە ئیستاء تەنیا سازمانیکە وە نوینەراێەتی یارسان دێرێ چالاکی کەێت. با بایم دەس بیەیمە ژێر بارێ نە ئەوێکە هەس ڵە ڵێ بسێنیمەێ. نازانم هەر ئی دوستانە کە شەو و ڕوژ کار کەن، کونفرانس گرن، کونگرە گرن و تیەن لە کنار سەرکار لە تڵویزیون لە سەر یارسان قسە کەن، مەگەر ئیانە ناچنە قاڵب خزمەت وە یارسان؟. مەگەر خزمەت کردن چوی تعریف کریەت؟. من باوەڕ دێرم ئیمە سەڕەڕاێ کەم و کوڕیەکانمان ڕێ یەک ساڵە وە یەک شەو بڕیمنە. کارێ کردیمنە کە سو لا ئایندەێ وڵات کەس ناتوانێ یارسان نادیدە بگرێ. هەر ئەوێک مجمع مشوەرەتی یارسانی وە شێوەێکی چەو نەترسانە تیەن دەفاع لە یارسان کەن، نەتیجەێ کار و چاڵاکی ئی مەردومەسە لە دەیشت وڵات. هەر ئەوێک سەرکار تیەی ڕخنە لە لێان گری خوەێ نیشانەێ ئەوەسە کە کار کریاس، وەختێ کاریچ کریەت بێ گومان هەڵەی هەر هەس. سەرکار بەو تماشاێ ئحزابێک کە دەێان ساڵە کار و چالاکی کەن بکە، بزان لە کۆ هاتنەسە کۆ. پەس ئەگەر بتوایم لە قافڵە جێ نەمینیەیم جێ دێرێ گشتمان وەل یەک بێ تانە و تەشەر دایین لە یەکتر ئی بار سەنگینە بوەیمە وارگە. براێ ئەزیز وە کام ئمکانات و پشتەوانە ئی دوستانە بان کار تەحقیقی یا مینەوانی لە سەر یارسان بکەن؟مەگەر کەم تەحقیق کریاس، مەگەر کەم نویسیاس، من باوەڕ دێرم هەر ئەوێک هەس بکریەتە دەس مایە توانیم بەهرەێ خاس لە ڵێ وە دەس باریم. با لە سەرکاروە شروع بۆۆ، بەشێک لە نەوروز تێ ڤێ ئختساس بیە ئەو کارە و کارناس و مینەوان یارسانی بار لەی باروە ڵێکۆڵینەوە وەڵیانە بکە، تا منیچ بام دەس خوەشی لە لیت بکەم. ئیمە ئەڕا بایەد بویشیم نەکەێ، یا ناکەن، ئەڕا نەویشیم ناکەیم،؟ ئەڕا مسئەڵە تەرح کەیم و خوەمان ڵە ڵێ دویر گریم.

ئاخر نویسانەکام وەی شعرە کوتایی تێرم همیوارم گشتمان دوستانە و یارسانیانە هەوڵ بیەیم ئەرا خزمەت وە کۆمەڵگای یارسان

ئەگەر گشتمان بویمن وە یەک دەس
ئەگەر وە یەکوە بکیشیم نەفەس
ئەگەر ئوقدە و کیین دەر کەیم لە قەفەس
ئەگەر پاکی و نیکی بکەیمە قەرار
بار و بارخانە بەیمن وە هەوار (مەنزڵگاە)

وەڵ ڕێز هورمەت

بەشیر

٧.١.٢٠١٧

Visits: 30