Home / بشیر امیرخانی / فیان دەخیل و خەڵآت لانتوس

فیان دەخیل و خەڵآت لانتوس

ئیمروژ لە مجلس سەناێ ئامریکاە یا کونگرە، جایزەێ لانتوس بەخشیاە ژنە ئیزەدی فیان دەخیل. جایزەێ لانتوس لە بار حقوق بەشەریوە جایزەێکی پڕ بایخ وە نرخە کە هەر ساڵە دریتە کەسێک کە شایستەێ ئەو خەڵاتە بووت. لانتوس کەسێکی یەهودیە کە لە کومەڵکوژی نازیەکان ڕزگارێ بی و چیە ئامریکاە و لە ئامریکایچ ٣٠ ساڵ نمایندەێ مجڵس بیە.

bashir-vian

سەرەتا فرە خوەشحالم که خوەیشکە فیان ئەڕا ئەوێک خەڵاتێکی گەورەبەخشیا پیت. لە ڕاسی خەڵاتەکە ڵایقت بی، چویکە ئەو هاوارەێ کە تو لە پارلمان عراق کردیتەێ دونیا هەژان. ئەو هاوارەێ تو کردیتەێ نە پارلمان عراق و نە پارلمان کوردستان ئەڕا ئیزەدیەکان نەکردنەێ. هاوار کردی و وەتی لە ژێر ئاڵای اللەو اکبر جینوسایتمان کەن و قەتڵئامان کەن، وە ڕاسی سەدان ساڵە لە ژێر ئاڵای اللە و اکبر قەتڵ عامان کەن ئیە ڕاسییکی هاشاهەڵ نەگرە.

دو گلەای لە خوەیشکە فیان
ئیمڕوژ وەختی خەڵاتە گردی دو چشت ئەڕا من جێ نگرانی بی کە تواستم لەێردا بارمەێ زوان و بنویسمەێ. زانم ئی نویسانە نە خوەنیتەێ و نە دوینیتەێ وەلێ ئەڕا تاریخ نویسمەێ و ڕوژێک هەتمەن وە یەک ڕەسیمن. خوەیشکە فیان سەد جارتر و هەزار جارتر تەبریک وەپید ویشم و پڕ وە دڵ خوەشحالم کە جور ژنێکی ئیزەدی ئەو خەڵآتە دریا پید، ئەما ئیە هویچ لەوە کەم ناکەێتوە کە لە ناخ دڵوە گلەی لە لیت نەکەم.

ڕاسە مێژو ئیزەدی و یارسان یەکیە و لە بنە ڕەتا لە یەک منبع سەرچاوە گرن، فرە لە هویر و باوەڕێان یەکیکە و تەنیا دابڕیان لە یەک و شەرایەت ژیان و جوقرافیا باعث بیە فەرق و جیاوازی بکەفێتە بەینمان. خوەیشکە فیان ئیمەێ وک یارسانی هەر لە ئەوەڵ روژ تا ئیستایچ وەڵیا بو جینوسایت و قەتڵ عام خویشکۆ برا ئیزەدیەکانمان بیەسە کورەێ دڵمان و لە هەر شون لە هەر نویسان، تەزاوراتێک داکوکی لە خوەیشکۆ برا ئیزەدیەکانمان کردیمە و کەیمیچ، هەلبەت ئیە منەت نەێرێ و ئەڕا خوەمان کردیمەسەێ و هویچ لە ئی کردەێ خوەمانە پەشیمان نیەیم و خوەمان وە هاوچارەنویس یەک زانیمن.

خوەیشکە فیان، ئەوەڵ
ڕاسە تو پارلمانتر عراقیت، وەڵێ نوینەر کوردی لەورە.تو لە شونێک قسە کردی کە معهد دمکراسی و ئازادی و قسە کردنە وە زوان داڵک، تو هاتی وە بەهانەێ ئەوێک ترجمەکەت کوردی نازانێ، وە زوان عەرەبی سخنڕانی کردی، وە زوانێک کە لە ساێەێ ئەو زوانە و ئەو زوانە خوەیشکەکانت، دایکەکانت، برا و باوک و مناڵەکانت تیرواران کریان، تەجاوز وە پێان کریا و بێ سەروشون کریان. هەر وە ئەو زوان عربیە بێ هورمەتی وەپێان کردن، هەر وە ئەو زوان عربیە معامەڵەێان کردن و فروشتنەێان، هەر وە ئەو زوان عربیە دوا ڵێان کردن بوونە مسەڵمان یا کوشیمەتان، ئەوان تەرجیح دان بمرن تا وە ئەو زوانە قسە بکەن. خوەیشکە فیان، تو لە جیاتی ئەوێک وە کوردی زوان داڵکی خوەت قسە بکردای هاتی وە زوانێک قسە کردی کە ممکنە نیمەێ ملەتەکەت لە ڵێ هالی نەون. تو توانستی وە زوان داڵکی خوەت قسە بکەی و هاوکات وە عربی و انگلیسیچ ترجمە بکریەت!! ئەما داخی کەم.

گلەی دوم
لە بان وەتم کە یارسان وئیزەدی یەک ڕیشە دێرن و جیاوازی نەێرن. خوەیشکە فیان لە سخنرانیەکەت، ناو لە مسیحیەت، تورکمان، شەبەک، شیعە،و باڵندەیچ بردی! وەڵێ داخەکەم زوانت نەچەرخیا بویشی خوەیشکۆ برا کاکەیەکانمان(یارسانی) ئەگەر لە ئیزەدیەکان فرەتێر وە سەرێان نەهاتو کەمتر نەهاتگە. یەک جاریچ هازر نەویت ناو هاوکیشەکان خوەت باری کە هاوچارەنویس خوەتن و جور تو زوڵم لە ڵیان چیە و چووت. پرسیار من لە خوەیشکە فیان ئەوسە، ئایا تو نازانی چەنها ئنسان کاکەیی لە موسڵ، کرکوک، خانقین،داقوق،و شونەکانتر وە دەس کەسانێک کوشیانە کە خوەیشکۆ برائیزەدیەکان من و تو جینوسایت کردن؟.

نازانی، یا زانی و ناویشی؟. ئەگەر تویچ جور باقی خوەت لە مەسئەڵەی یارسانەکان بشاریتوە تاریخ لە لید ناگوزەریەت. جێیک که تو قسە لە تێ کردی فورسەتێک بی کە بتوانی یارسانەکانیچ وە کونگرەێ ئامریکاە بناسنی و بویشی ئەوانیچ جور ئیمە زوڵم لە ڵێ کریاگن. داخەکەم وە کی هاوار بوەیم؟ فیان خان، خۆ تو لە خوەمان بید.تو کەسێک بیت هاوار کردی و ئارەزو داشتی کەسێک هاوارت بشنەفێ، منیچ لەێرداوە هاوار کەم و ویشم فیان خان ئەڕا هاوار ئیمە نەشنەفتی، لە حاڵیکدا هایمە پاڵ دەست و لە نەهامەتیەکانمان خەوەر دیری.

جارێکتر پیروزبایی لە لیت کەم ئەڕا ئەوێک توانستی شایستەێ ئەو خەڵاتە بیت.

بشیر امیرخانی

فنلاند

٧.٢.٢٠١٧

Visits: 17