ڕفراندوم لە باشور کوردستان و چەن قسەێک

وەرجە هەرچشتێک بایەت بویشم،ڕفراندوم و ماف چارەێ خوەێ نویسین حەق متمدنانەێ هەر ملەتێکە لە ڕوی ئی کورەێ خاکیەزنەی کەێ و ئی هەقیچە لە جارنامەێ نەتەوە یەک گردگەکان و دەوڵەتە دموکراتیکەکان جور ئروپا گونجیاس و باس لە ڵێ کریاس. ملەت کورد یەکی لەو ملەتگەلەسە کە لە تویل سەدان ساڵ وەرین ئەڕا وە دەس هاوردن ئی هەقە و ماف چارەێ خوەێ نویسین مبارزە کردگە و خوین داگە. لە تویل تاریخ فرە جار کورد وە دەس خوەێ خوەی لەی هەقە بێ بەش کردگە. لە زەمان وەرین خانەکان خاون دەسەڵات بیین و خان خانی و فرە دەسەڵاتی، بیە بایس ئەوە کە دوەڵ دونیا وە کورد بێ باوەڕ بون و نەیڵن کورد بوتە دەوڵەت، چویکە ئەوان لەوە فرە شارەزاتر بین و زانستن کە کورد خوەێ، خوەێ قەبوڵ ناکەێ و ناتوانێ بوتە دەوڵەت یا وڵاتێکی یەک دەس و یەک دەسەڵات.لە شون نەمان خان و داڕمیان ئمارەت خانەکان، حزب هات شون خان گرد و لەی ٧٠ ساڵ ئاخرە لە ناو کورد شێواز خان دەسەڵاتی گوڕیا ئەڕا حزب دەسەڵآتی و ئیستایچ سەدان و بگرە زیاتریچ حزب لە گوڕەپان خاک کورد دروس بیە و هەرکەس خوەێ وە قەیوم و براگەورەێ کورد زانێ. هەر وەخت بیگانە داواێ دانیشتن و دیالوگ وەڵێانە کەێ بێ درەنگ قەبوڵێ کەن و چن لە بان کورسی زەڕین و وەرانوەر میکروفون دانیشن و قسەێ زڵ کەن، وەڵێ ئەڕا خوەێان جور دوژمن تماشاێ یەکتر کەن و بگرە ئەڕا ئەوێک دو حزب کوردی وەڵ یەک دابنیشن باێەد پەناە بویتە بێگانەێک کە باێت ناوژی بکەێ ئەڕا ئەوێک وەیەکوە داێان بنەێ.

ئیستا لە باشور کوردستان زمزەمەێ رفراندوم و دیاری کردن ماف چارەێ خوەێ نویسین بیەسە ڕوژەف میدیاکان و هەر میدیاێک و هەر حزبێک وە شەیپوڕ خوەێ باس لە شێواز رفراندوم کەێ.

لە هەر وڵاتێک کەڕفرانداوم کریەت،چەندین چشت و ڕی کار بایەد لە نەزەر بگریەت وە تایوەت لە باشور کوردستان کە فرە حزبی و فرە ئایینی و فرە نەتەوەییە.

یەک .کو دەنگی نیشتێمانی بێ جیاوازی،نەتەوەیی،ئاینی

.ئاکتیف کردن پارلمان،ئەڕا مشروعیت دان وە مسئڵەێ ڕفراندوم

دیاری کردن هەیئەت ڕفراندوم کە لە تەمام پێک هاتەکان لە تێ بەشدار بووت

دیاری کردن هەیئەت یا سخنگو ئەڕا مسئلەێ ڕفراندوم

ڕێک خستن میدیاێ کوردی بێ جیاوازی.

میدیا فەقەت بتوانێ قسەێ هەیئەت یا قسە کەر مسئەڵەێ ڕفراندوم باس بکەێ، نە ئەوێک هەر کەس و حزب و ڵاێەنێک وە باب مەیل خوەێ باس لە مسئەڵەێ ڕفراندوم بکەێ.

لە باشور کوردستان لە حاڵێک تاریخ ڕفراندومیچ دیاری کردنە کە فرە لە حزبەکان ناتەبان، هویچ پرس و ڕاوێژێک وە هویچ نەتەوەو کەماێەتی ئایینیک نەکریاس، میدیاێ کوردی هەرکام وە ساز و شەیپوڕ خوەێ قسە کەێ و گویا یەکیان لە کوریاێ باشور و یکی لەباکور قسە کەێ. پارلمان کە تەنیا ئورگان مشروع هەر وڵاتێکە چەندین مانگە پەکێ خریاس.هێز ئەمنیەتی کە شاڕەگ ئورگان هەر وڵاتێکە هەمراێ لە باشور دو هێز جیاوازە و بگرە جور دوژمن تماشاێ یەک کەن. پێشمرگە دو بەشە، وەزارەت دارایی دو بەشە، نە سڵێمانیە چوتە ژێر بار هوەڵێر و نە هوەڵێر قسەێ سڵێمانیە قەبوڵ کەێت.

ئەیانەو سەرەڕاێ هەزارو یەک پرسیارتر، وەی وەزیەتوە ئایا ڕفراندوم موەفقیەت خوەێ وە دەس تێرێ?. فرە جار وەختێ مەردوم باس لە نەهامەتی و بێ پویلی کەن و ویشن وەی وەزە چوی ڕفراندوم کریەت، مسئولەکان ویشن هویچ ملەتێک لە بان گەنج خەزێنە داواێ دەوڵەت یا ڕفراندوم ناکەێ!!! ئیە ڕاسە وەڵێ لە حاڵێکدا ئیە ڕاسە کە گیرفان مسئولەکان جور گیرفان فەقیرەکان بووت، نە مردوم لە ورسیاێ بناڵنێ و سەدان ملیارد حزب و مسئولەکان لە بانکەکان وڵآتگەل ئروپاە و آمریکاە خەفتوت. نزیک کمتر لە دو مانگ وە واێەێ ڕفراندوم مەنگە و هیچتان نە پارلمان و نە هێز و نە وەزارەت و نە حزبەکان و نە کوڵان و جەماوەر یەک دەنگ نیەن، وەی وەزیەتە کی توانێ بار سەنگین وە خەتەر کەفتن مسئەڵەێ ڕفراندوم قەبوڵ بکەێ، یا شایەت جور مسئەڵەێ قەدیمی ویشن من وە دەس خوەم داڵ بکەم دی هەرچێ بوت با بوت!.وە باوەڕم پارتی وە دەرەجەێ یەکم و یکیتی وە دەرەجەێ دوم باێەد وەرجە ئەوێک وە هەر قیمەتێک بچنە داڵ بایەد فکر لە مسئەلە ئەساسیەکان بکەنوە کە من لە بان ئشارە و فرەێان کردم، چویکە ئیستاە فرە ڕاحتر لە گوزەشتە داگیرکەر دەور دێرێ، توانێ پویل خەرج بکەێ و کەس و ڵاێەن بسێنێ ئەڕا سەرنەکفتن ئی ڕفراندومە، پەس بهتەرین ڕاحەڵ ئەوەسە کە پارتی ئی حەربە لە دەس دوژمن بگرێ، ئەگەر وە ڕاسی خەمێ ڕفراندوم ونەتەوەێ کوردە لەو بەشە.

یەک. بێ مەرج وبێ درەنگ پارلمان کار خوەێ شروع بکەێ و هویچ دەخاڵەتێک لە کار پارلمان نەکەێ

دوم. دەوڵەت کە خوەێ فەلەجێ کردگە کاراێ بکەێتوە

سوم. کو دەنگی گشتی بێ کەم و زیاد،هەم نەتەوەیی و هەم ئایینی ئەڕا پشتگیری ڕفراندوم وە دەس بارێ

چوارم. هێز ئەمنی و پێشمەرگە بکەنە یەکی و تەمام دامودەزگاێ حکومی لە ژێر یەک چەتر کار بکەن

پنجم و لە گشتێ مهمتر دەزگاێ دادوەری موستەقڵوە بکەێ و نەیڵێ نە حزب و نە حکومەت دەس لە کار و بار قەزایی وەر بیەێ، چویکە هەر وڵاتێک ئەگەریچ دەوڵەت بووت وەڵێ نزام مستقڵ قەزایی نەێاشتوت موەفەق ناوت و بوتە وڵاتێک جور ئەرەبستان و سەدان وڵات دیکتاتورتر.

وە ئومێد ئەوێک گشت ملەتێک وە ئازادی و حقوق خوەێ بڕەسێ

بەشیر

فنلاند

23.7.2017