Home / بشیر امیرخانی / کوردسان باشور لە شون ئەنفاڵ کەرکوک وەرەو کورە چوو؟؟

کوردسان باشور لە شون ئەنفاڵ کەرکوک وەرەو کورە چوو؟؟

لە ڕاسیدا ئەو نەهامەتیانە کە لە تویل تاریخ هاتنەسە سەر کورد هویچکامێ وە ئەندازەێ ئی نەهانتیە کە وە سەر کەرکوک و باقی شونەکانتر هات ئازار دەهندە و کوشندە نیە. لە تویڵ تاریخ کورد فرە چەلەمە سەری دیە،فرە لەوانە لە جەنگ و ژێر دەستەی کورد بیە و داخێ کەمترە. جێ داخ ئیەسە کە حکومەت داشتویت و لە ئەوج قودرەت بایت خاک و نیشتمان بفروشیتە بێگانە.شارێک کە ٥٠ ساڵە کورد لەو بەشە شەڕ ئەڕاێ کەێ.

پێشەنان وەتنە مرویجە ئەگەر خوەشێ بۆ باڵ لە ڵی ئیجاد بوو، کورد باشوریچ جور مرویجە وەپێان هات. ٢٦ ساڵ تەجروبە نیشان دا کە ئیانە دەوڵەتیچ بیەپێان ناتوانەێ. شعرێک لە ڕێزدار پەشێو کەفێتە یادمم ویشێ ئەگەر سەراوی هەوزی ئازادی هەڵ کەی ئەوان زەهری ماری تێ دەڕشێنن. وە ڕاسی نیشان دا کە نە تەنیا نەتوانستین لە شون ٢٦ ساڵ بینە خاون حکومەت خوەتان بەڵک ئزەت و کرامەت پێشمەرگەیچ شکانین.

لە ڕاسی وزئیەتێک هاتگەسە پێش لە باشور کە فرە خەتەرناک و بگرە رەهبری ئەو بەشە تویش شوک هاتنە وجور لەشکەر شکێاگ نازانن چە بکەن. باشور وەرە دو ئدارەی و بگرە شەڕ داخلیوە چوت، ئەگەر ئیجورە ڕاس بوت کە گشت ئمکاناتێ ئەڕا ئدارەێ سڵێمانیە واز بوت و تەێارە خانەیچێ کەفێتە ڕێ و حقوق و باقی مەزایایان لە بەخداوە تێت، خوەێ نیشانەێ دابەش بیین هەریمە وە دوبەش. ئەگەر ئی پلانە ڕاس بوت وە تەنیا ئیەوە ناوسن و بگرە فرە چشتێر هەس کە لە ئایندە بقومێ. هویچ کەس ناتوانێ شانە لە ژێر ئی خیانتە خالی بکەێ، چویکە ئیمڕوژ یا سو ئی خیانەتە کەفێتە دەیشت و گشت کەسێک زانن چە قومیاس. وە باوەڕ من بێ هورمەتی وە کرامەت کورد وە دەس حەشد وەحشی بە هورمەتیە و ئەو کەسگەلە کە کەرکوک فروشتن و ئی وەزئە خوڵقانن.

باوەڕ دێرم دی چەواڕوانی لە ئی بەشە کە بوتە حکومەتێکی جێ ئومێد دویرە لە ئنتزار، مەگەر ئەوێک سەران ئی دوحزبە بتوانن جوبران شکەستەکانێآن بکەن. هەرچەن پارتی و یکیتی دی باوەڕێان وە یەک نەماگە وەڵێ کەسان دڵسوزێک لە هەردوکلا هەس کە بتوانن ئومێد دوارە ئەڕا خەڵک بارنوە و لان کەم توزێک خوەێان تەکان بیەن. ئەگەر سەرکرداێەتی کورد نەتوانێ جواو ئی بێ هورمەتی حشد وەحشیە بیەێ باید هەرچێ زویتر خوەێ خانە نشین بکەێ و جێ ئەڕا جیل ڕوشنفکر واز بکەێ تا شاید بتوانن پینەێ هەزاران درد کورد لەو بەشە بکەن. ئەگەر ئەو کەسگەل دڵسوز هەردوکلا زویتر نەکەفنە تەقەلا و هەوڵ نیەن کارێک بکەن کە لان کەم شەڕ براکوژی دوارە نەوتوە چویکە هەر لەحزە ئمکان دێرێ وە فیت ئێران و تورکیە و عراق ئی شەڕە هەڵگیرسێ. کورد لە شون سەد ساڵ قوربانی فرە داگە و جێ دێرێ دوارە ئەڕا کورکوک صدها پێشمرگەێتر خوەێان فدا بکەن و پاتەک بیەن لە حشد شعبی، ئەگەر ئی کارە بکریەت ممکنە دەولەتەکان بانە سەر خەت و بونە ناوژیکەر وەڵێ ئەگەر کورد تەکانێک نەێەێتە خوەێ بێ گومان دەستآورد ٥٠ ساڵەێ خوەێان لە دەس دانە و تازە دی نە لە بەخدا و پارلمانەکەێ ئعتبار دێرن و نە ملەت خوەێانیچ باوەڕ وە پێان دێرێ.

بشیر

فنلاند

١٨.١٠.٢٠١٧

Visits: 90