شێواز مبارزەێ یارسانی لە دەیشت وڵات ودەس وەردان ئحزاب کوردی لە کاروبار ڕێکخریاگ یارسانی

بشیر امیرخانی: لەئەوەلین ڕوژ دەسەڵآت جمهوری ئسلامی لە ئێران، کۆمەڵگاێ یارسان لەژێر گەورەترین فشار و ئاسمیلەێ ئی نزامە بینەسە و ڕوژ لە شون ڕوژ ئی زوڵمە پڕ ڕنەگتر و فرەتروە بو. لە تویل سی و پەنج سال ئی دەسەڵات سەدان کەس لە یارسانیەیل ئعدام، بێ سەرشون و هەزاران نەفەر ئاوارەێ وڵاتگەل بینە. لەی سی و پەنج ساڵە نە دەولەتەکان و نە ئحزاب ئێرانی و کوردستانی وە خەم ئی ملەتوە نەهاتن و بێ گومانیچ ناتیەن. تەنانەت تا ئی چەن ساڵ وەرینە فرە لە ئحزاب کوردستانی چشتێک وە ناو یارسان نەزانستن یا نەتواستن بزانن.

بێ ئاگاە بیین یا خوەێ بێ ئاگاە کردن لە وەزیەت کۆمەڵگاێک ئەویچ لەوڵاتێک جور ئێران کە زیاتر لە سێ میلیون یارسانی لە ژێر گەورەتەرین فشار زنەی کەن، چشتێکی قەێر عمد نیە، چە لە ڵاێەن دەولەتە دمکراتەکانوە و چە لە ڵایەن ئپوزسیونوە؟! تازە لە وڵاتگەل دویر دەس ئەگەر نەسڵ ئاژەڵەێک تواێ هەڵ بکەفێ، سازمان ملل و غرب و سازمانگەل حقوق بەشەری تیەنە جواو و ویشن نەسڵ ئی ئاژەڵە تواێ هەڵ بکەفێ، باید هەرچێ زویتر چارەسەرێک ئەڕای پەێا بکەیم!!! ئەما لە وڵات ئیمە سێ میلیون یارسانی دێرن ئاسمیلە بون، وە زور باوەڕێان لە لێان سێنن، ئاوارەێان کەن، زندان کن و شکەنجەێان دەن، ئەما کەسێک، وڵاتێک یا سازمان حقوق بەشەرییک نوق لە دەمێوە دەر ناتێ و سکوت کەێ!!!. ئایا ئیە توانێ عمدی بۆۆ؟ بێ گومان نە، دەلایلەکان موشەخەسن و کەم کەسیچ هەس بێ ئاگاە بووت لە ڵێ، وەڵێ من ئی بەشە حیلم ئەڕا کەسانێک دوس دێرن لەی باروە پرسجو بکەن و بێشتر بزانن. ئەما باموە سەر ئەسڵ مەوزو”.

یارسانەکان دەیش وڵات با تەوجو وە قسەکانم لە بان دانیشتنە شەور کردن، ئەڕا ئەوەێکە زیاتر لەیە پەراوێز نەخریەن، ئەوڵ هاتن هەرکام لە شار نیشتەجێ خوەێ ئەنجومەنێکی یارسانی یا وەناوێکتر ئەما یارسانی، تەشکیل دان،وەختی دیین ئیە ئەوە نیە کە یارسان تواێتەێ و چارەسەر دەردەکان ناکەێ، ڵە دەور یەک جەم بین و لە ساڵ ١٩٩٧ لە شار اسکلیستوناێ سوئد انجمن ئایینی یارسان تەشکیل دان، لە شون ماوەێک زانستن کە ئیەیچ چارەسەر نیە و بایەد فکر لە سازمانێکی سیاسی کە بتوانێ نمایندەگی سیاسی حقوقی کۆمەڵگاێ یارسان بکەێت، بکەنوە. لە شۆن ڕاوێژ و باس فرەێک جنبشێک وە ناو جنبش دموکراتیک یارسان دروس بی. لە ناو جنبش دموکراتیک یارسان کە من خوەم یکی لەو کەسانە بیم کە لە هەم لە دامەزراندنێ بەشدار بیم و هەم یکی لە چالاکەیڵێ بیم، وە ڕاسی تیمێکی کارابیمن،چویکە باوەڕ داشتیم کەدیریم کار ئەڕا کۆمەڵگاێکی ژێر دەس و زوڵم لە ڵێ کریاگ کەیم، شەکەتی و نەخەفتن و پویل لە گیرفان خوەمان خەرج کردن ئەڕامان ئەهمیەت نەێاشت، سەرەڕاێ تەمام پاچقوڵاوەکان و زدیەتیەکان وەڵێ توانستیم لە سەر پاێ خوەمان بوسیم، چویکە باوەڕ داشتیم وە کاریک کە کەیمەێ. لە ماوەێ چەندین ساڵ کار من لە جنبش دمکراتیک یارسان، دەێان حزب و سازمان پێشنیار کردن کە بچیمنەژێر باڵێان تا بتوانن کۆمەکمان بکەن، وەڵی ئیمە هەرگز ئەوە نەکردیم، چویکە ئیمە لە ژێر باڵ و چەتر و چەکمە و زوڵم هاتیمەسەدەیشت، ئیسە دی ناتوایم دوارە ئی نەننگە ئەڕا خوەمان بسێنیم، لە هەمان وەختیچ داوا کردیمە لە فرە کەس و ڵاێەن کە ئەگەر دڵسوز کۆمەڵگاێ یارسانین توانین کۆمەک ئی جونبشە بکەین!. وەڵێ کی و لە کۆ.?.

هەڵبەت ئیانە کە تا ئێردا من باسێ کەم کەم کەس یارسانی هەس نەزانێ، وەڵی یادئاوەری زەرەر نەێرێ. لە شوون یەک گردن جونبش دموکراتیک یارسان و یاریکورد کە نوینەراێەتی تەمام ئحزاب کوردستان ئێران و عراق لە تێ بەشدار بیین و خوەێان شاێەت یەک گردن ئی دو جەریانە بیین، پەێام تەبریک و دەس خوەشی ئەڕامان کڵ کردن و لە حزور خوەێان سازمان دموکراتیک یارسان هاتە دامەزرانن، کەمن خوەم یەکی لە دەسەێ وە رێوەبەری سازمانەکە بیم، ئەما دوینیم لەی ڵاو ە ئەولا فرە لەو سازنمانگەلە کە خوەێان بەشدار ئی ئتحادە بین ئەما هەمراێ ویشن جدی و یاریکورد!!!.

فرە لە سازمانگەل کوردی بین کە خوەێان وە دوس ئیمە و یارسان زانستن، بگرە دوساێەتی و هاوکاری وە یەکوە داشتیم، وەڵێ داخەکەم هویچکام لە ئیانە، نە سادق بین وەڵ ئیمە و نە سادق و دڵسوز کۆمەڵگاێ یارسانن. وە دەم دوسمان بین، وەڵێ لە ژێروە کار ئەڕا پەک خستن ئیمە کردن و هێمراێ هەر درێژە دێرێ، جویکە ئیمە هازر نەویمن باج بیەێم، خوەمان بفروشیم و خزمەتکارێکی بێ دەسەڵات بیمن، ئەوانیچ بێ گومان ئیە ناتوان.قسەکان من هویچکامێ داستان نیە، ئەمرێکە کە خوەم چەن ساڵە وەڵێا ژیامە، و هازرم ئەڕا ئثبات قسەکانم لە هە شون و کوڕ و کوبینەوەێک بۆ ثابت بکەم کە ڕاس ویشم.فرە لەی سازمانگەلە کە ناتوام ناویان بوەم هاتن دەس خوەشی لە ئیمە کردن کە دامەزرانن ئی حەرەکەتە باڕێکە لە سەر شان ئەوان کەم بیە، وەڵێ داخەکەم ئیستاء سەرەڕای ئەوێک خوەێان زانن، وەلێ تیەن پەڕ و باڵ دەنە کەس یان کەسانێک کە وەڕاسی شونێک لە ناو کۆمەڵگاێ یارسان نەێرن و ئەڕا ڕوژێکیچ وە خەم کۆمەڵگاێ یارسان نەوینە. من جور شەخس ڕێز دێرم ئەڕا هەر تاکێکی کۆمەڵگاێ کوردی وە گشتی و یارسان وە تاێوەتی، وەڵی ئەڕام جێ قەبول نیە کە تاک کۆمەڵگاێ یارسان نەزانێ مەنافەێ کۆمەڵگاکەێ ها کۆ و ئەڕا زەربە دایین لە کۆمەڵگاێ خوەی پەناە بوێتە هار دار و بەردێک.

هەرکام لەی حەرەکەتگەل یارسانیە چه تاک و چه گروە، ئەگەر لە ڕاستاێ منافەێ کۆمەڵگای یارسان بۆو، من نە تەنیا دەس خوەشی لە ڵێ کەم بەڵک هازرم بۆمە هەڵگر بەشێک لە ئەو کار و زامەتە کە ئەو کیشێتەێ، وەلی وەختی تماشاێ گوڕەپان مبارزەێ یارسانی کەیت چشتگەڵێک لە تاک یارسانی دوینی، جێ سەر سوڕ مانە. فرە کەس هەن شێواز مبارزە لە چوار تەبلیغات دەس پا شکیاگ و شرکەت لە دو بەرنامەێ تلویزیونی و گردن دو عکس خوەڵاسە کردنە، وە خەیاڵ کەن وەی شێوە کۆمەڵگاێ یارسان جێ پاێ خوەێ لە ناو جنبش ملی کورد و ئێرانی کەیتوە و دی لە ئایندە پەراوێز ناخریەت!!!. نەخەێر ئی شیوازە لە مبارزە نە تەنیا نەفێک وە هاڵ ئی کۆمەڵگاە نەێری بەڵک ئەگەر وە وریایوە وەلیا مامەڵە نەکەی زەرەیچ دەێ لە کۆمەڵگاکەت، “وە قەوڵ پێشینیان ئەتر بایەد خوەێ بۆ داشتوت نە ئەتر فروش تاریف لە ڵێ بکەێ”.

ئیمە و هەر تاک و گروێکی یارسانی بایەد بزانی ئیە مردم یارسانە کە داوەرن و زانن کی خزمەت وە کۆمەڵگاێ یارسان کەێت، نە ئەوێک تەنیا چوتە چوار چۆ تەبلیغات. باوەڕ دێرم قشر جوان کۆمەڵگاێ یارسان خوەنەوارن، سواد دێرن و زانن کی و کام و چ شێوە مبارزەێک وە قازانج کۆمەڵگاکەێانە.من مخاڵف ئەوە نیەم، کە تاک،گروە، یارسانی وەل هەر میدیاێک قسە بکەێ تەنانەت میدیا کونەپەرەستەکان جمهوری ئسلامی، ئەگەر ئجازە بیەن کە نایەن، ئەما وە چ قیمەتێک و لە سەر چ ئەساسێک?.ڕێکخریاگ یارسانی وەرجە هەرچشتێک بایەد بزانێ کە کۆمەڵگاکەێ ها ئەولەویەت،شێوازێک لە مبارزە هەڵوژنێ کە بتوانێ کۆمەڵگاکەێ زەرەرمەند یەکمێ نەوت. باوەڕ دێرم سازمان دموکراتیک یارسان سەرەڕاێ تەمام ئێرادەکانێ، ئا ئیستاء توانستگە ئی باڵانسە بگرێ،هەرچەن وە زەرەر سازمانەکەێ بیە، ئەما هەمویشە تماشاێ کولەکە ئەسلیەکە کردگە کە کۆمەڵگاێ یارسانە و هویچ وەخت نەخستگەسەێ مەزات ئەڕا فروشتن. من با بام پرسیار لە خوەم بکەم وەختێ نیەمە پاڵ ئی حەرەکەتە، ناتوانم یا ناتوام، ئەما ئەڕا بایەد زدیەت وەڵێا بکەم?. من نزیک ٨ ساڵ لە کومیتە ڕەهبەری ئی جەریانە بیمە، ئیسە نیەم وە هەر دەلیڵێک، ئەڕا باید بام زدیەت وەڵێا بکەم?!. پرسیار من لە ئەو وەناو گروە، یا کەسگەلە ئەوەسە،کە ئەگەر ئیوە دڵسوز کۆمەڵگاکەتانین،وە تواین وە شێوەێک چالاکی ئەڕا خزمەت وەی کۆمەڵگاە بکەین، ئەڕا دوشمناێەتی وەل ڕێکخریایکی یارسانی کەین کە وەڕاسی تەنیا هەم و خەمێ دەفاء لە کۆمەڵگاێ بیە?. ئەگەر ئیوە ئی شێوازە لە مبارزەێ ئی سازمانە وە ڕەوا ئەڕا یارسان نازانین، ئەڕا ناتیەین وە شێوازێکی متەمەدنانە وەڵێانە دابنیشین و شێواز خاسترێک دەسنیشان بکەین؟!. کام جار هاتین و ئی سازمانە دەس ڕەد نا سینەتانوە؟. ئەڕا فکر کەیم تەنیا دیگەران توانن خەت و نیشان ئەڕا ئیمە بکیشن و بچەرخننەمان!. ئەڕا ٣٥ ساڵ وەرین لە فکرتان نیە؟. ئەگەر لەی ٣٥ ساڵە ئی ئحزابگەلە بویچکترین دەردێک لە دەردەکان ئیمە دەوا بکردان،یا لان کەم خەوەر لە ڵێ بێاشتان، لازم بی ئەسڵەن ڕێکخریاگێکی یارسانی دروس بۆوت؟ بێ گومان نەخەێر.

دوستان خوەتان شایەتین٣٠ ساڵ تا زەمانێک هەرەکەت یارسانی کەفتە ڕێ، تاک و میدیای کوردی و ئێرانی ئاجز بین تەنانەت لە بردن ناو یارسان، (ئەگەر جار و بارێک ناوێک بیاتا، ئەویچ ئەهڵ هەق بی). پەێا کردن وشەێ پیروز یارسان یا خاستر بویشم وە دەس هاوردن و ناو زار مردم خستن وشەێ یارسان گەورەترین دەسکەفت ئی خویشکۆ براگەلتانە بیەسە کە ئیوە دیرین وەڵیانە وە شێوازێکی ناڕاسەوخۆ دوژمناێەتی کەین. وە قەوڵ پێشینیان چراخێک وە ماڵ ڕەوا بۆو وە مەسجد هەرامە. با بایم لە جیاتی زدیەت وەل یەک کردن وە بازیچەێ دەس ئی و ئەو بیین، گشتمان دەس لە ناو دەس یەک و وە یەک دەنگ هاوار بکەیم ئیمە یارسانیم، لە پاڵ ئەویچە هەر حزب و سازمانێکی کوردی و غەێر کوردیچ پشتیوانیمان بکەێ دەسێان ماچ کەیم و توانیم بیمنە دوس و هاوکارێان.

دوستان دەریچەێ دیالوگ هەمویشە هەس و وە باوەڕم نەوەسیاس، با بایم لەی شێوازە ئەڕا خزمەت وە کۆمڵگاکەمان ئستفادە بکەیم. ڕوژانێک دوستانێک ڕێکخریاگێک دروس کردن وە ناو یاریکورد،و کەفتنە زداێەتی وەل ج د ی، هەردوکلا ئەڕا تەشەنە نەکردن ئی زداێەتیە کە زانستیم وە نەف کۆمەڵگاێ یارسان نیە، کەفتیمنە دیالوگ و ڕێکتر دەسنیشان کردیم، من نازانم ئیمە ئەڕا باێەد هەمویشە لە دەر زداێەتیوە وەل یاک دیالوگ بکەیم. ئیمە ئەڕا نایم غرور و تەفرەقە بخەیمە لاێک و بایم فکر لە مبارزەێکی گشتگیر وە نەف کۆمەڵگاکەمان بکەیم!. دوستانێک هەمراێ فکر کەین کەسانگەڵیک لە دەیشت یارسان ناجی و فەریاد ڕەس ئیمەن، باوەڕ بکەن گشت ئی ڕێگاگەلە تاقی کریانەسوە نەتیجە نەیانە، تەنیا تاک کۆمەڵگاێ یارسانە توانێ خەم خوەر یارسان بۆو، “کەس پشتم ناخورنێ تەنیا ناخوینەکان خوەم نەوت”.

لە ئاخر داواێ بەخشین کەم لە تاک و گروە و انجمن ناو کۆمەڵگاێ یارسان کە بەش ئاخر نویسانەکە بوێ لە ئاموژیاری تێت، وە ڕاسی گشتێ وە خاتر خەمێکمە کە خەم کۆمەلگاێ یارسانە، وە گەرنە منیچ توانم لە ماڵ خوەم دانێشم و روی دم وە کەس نەکەم و کەس لە خوەم نەڕەنجنم و سەر خوەمیچ وە ژان نارم. دوارە لە ئاخر داوا لە تاک و گروە و انجمن ناو کۆمەڵگاێ یارسان کەم دو جار زیاتر لە جاران فکر بکەنوە و بزانن ئەڕا وە پێش بردن مبارزەێ یارسان کام هەنگاو بگریمە وەر خاسە.

دوارە لە ئاخر ئی نویسراوە، داوا لە ئحزاب کوردی وە تایوەت کوردستان ئێران کەم دەس نەخەنە ناو کار و بار کۆمەڵگاێ یارسان، ڕێکخریاگەکانیان هان نیەن لە وەرانوەر یەک بۆون، زداێەتی نەکەن وەلمانا، تا گشتمان وەڵ یەکا بتوانیم بار کەفتێک نەتەوەکەمان برەسنیمە سەر مەنزڵگاێ خوەی. ئەگەر وە یارمان ناوین وە خاریچمان مەون. باوەڕ بکەن تاریخ کۆمەڵگاێ یارسان نیشان داگە، ١٥٠٠ ساڵ بێ خود لە سەر پاێ خوەێ نەوساگە، هەم دوستی و هەم دوشمنی فەراموش ناکەیم. ئیستاء هایمنە گوڕەپان وەڵاتگەل دموکراتیک و هەرکەس ئەڕا خوەێ شاخ و نیشان کیشێ، وەڵی وەختێ پامان خواردە مەنتەقە ئەو وەختە نەێاران یارسان زانن قسەێ ئیمە چە بی.

بەشیر

26.12.2016

بازدیدها: 46